किरिस्तुनुर सेव्कलिर
4
1 अदेन साटि, अपोस्तुल्क आय्वलिर ममोट किरिस्तुनुर सेव्कलिर आंदुम अनि बगवंतनङ मक्डिते मंवलिक गोस्टिन उजगिरि अरुस्वलिर आंदुम इन्जेर मिरट सम्दिर सम्जे मायना.
2 अनि इंके माकुन हव्लि कीता सेवतुन बरोसते किया लागर.
3 नाकुन, ‘वेर बरोसतोर आंदुर कि आयोर?’
इन्जेर मिरटे आयि, दुस्रोर बोरे आयि इत्तेके गिर नना पटि कियोन.
बारितेके, नावा ननय बस्केन तस्वा कियोन.
4 ना रोपो नाकुन बदे गल्ति दिसेर सेले.
तेर बति इदेन पिय्सि, नना नियत्नोना लेकते वायोन.
नावा तस्वा पर्बुय कींतोर.
5 वोर पर्बु सिकटितगा मक्सि मंवलिकुन वेड्चितगा तरंतोर.
माय्नलिरा मन-दिलतगा मंवल सोन्चुन उजगिरि अरुसंतोर.
अस्के हर वोरोन बगवंतले मेचंतोर.
अदेन साटि, तस्वा किय्वल पर्बुना गट्का वानल वेरि, बततुने तस्वा किय्मट.
6 दादलिर-बायिक्निट!
मीकुन चोकोट जर्गना इन्जेरेन नावा अनि अपोलोना नमुना येच्चि, इव गोस्टिङ पोडि कीसि वेह्तोन.
नना दर्मा-ग्रंतनल वेह्ता तीर मिरट दिहंते ताककिट्ते, मिरट मीकुन ताकुस्तुरा गोस्टित पिय्सि असले पोके माय्विट.
7 सम्दिर्गटल डगुक आंदुम इन्जेर मिरट बारि सोन्च कींतिट?
मिह्गा मंवलिक सम्दो वरम्क बगवंतले सीतङ आंदुङ.
ते अव सम्दो कुद मीवङे आतप बारि पोक्डा कींतिट?
8 एहे!
इंद्केट्के मीकुन पह्जे मत्तङ अव सम्दो पवित्रा आत्मतङ वरम्क पुड्तङ अले!
इदेन मुनेने दनेवंतलिर आतिट अले!
ममोट सेल्वक्नेने राजलिर आतिट अले!
मी बरोबर ममोट गिर राज ताकुसनल, मिरट करलेन राजलिर आयना इन्जेर कोर्सेर मंतोम.
9 बति किरिस्तुनुर अपोस्तुल्क आय्वलिर माकुन बगवंतल सम्दिर्गटल आक्रि इर्तोर इंवल वाटे मासेर मंता.
बारितेके, माकुन मरंता सिक्सा अर्तपिनय, ममोट दुनियत साटि, दूतलिर साटि अनि माय्नलिर साटि केल तोह्वलिर दात आसि मंतोम.
10 ममोट किरिसतुन साटि पिसलिर आतोम बति, मिरट किरिसतुन साटि गड्स्नुर आतिट अले.
ममोट जिगि सेलुर वूर आंदुम बति, मिरट ताकद वालिर आंदिट अले.
ममोट चुडुर-पान वालिर आंदुम बति, मिरट डगुर-पान वालिर आंदिट अले.
11 इद गट्का वेरि, ममोट येर-काने पुट्वा करुते मन्जेर मंतोम.
सर्तङ पाङुक पोंड्सेर मंतोम.
दन्कङ तिन्जेर मंतोम.
माकुन रोन-रचा सेल्वक मंतोम.
12 मावङ केय्क्ने कुद काया-कस्टम कीसेर मंतोम.
माकुन सापेना सिय्वलिरकुन आसिर्वाद सीसेर मंतोम.
दुक्सङ बोगे मानेके, अवेन सोसि कीसेर मंतोम.
13 लजा वोतुर सङा दयते वड्क्सेर मंतोम.
इंके वेरि, दुनियतुरा नदुडे काडि-कचेडत दात अनि मोरिता डेह्डत दात ममोट मंतोम.
14 मीकुन सिर्मिंदिङ कियना इन्जेर आयो बति, नावुर लाड्नुर मरि-मियड आय्वलिर मीकुन, बुदि वायना इन्जेरेन इव गोस्टिङ लिहि कीसेर मंतोन.
15 किरिसतुन बारेता जिन्गनितगा बडे माय्ले, वेह्वलिर मीकुन दहा हजर (10,000) मांदि मंदनिर.
बति येसु किरिस्तुना चोकोट्ना कबुर वेह्वडुन हिंदल, नना वोरोनय मीकुन बाबोना आसि मंतोन.
16 अदेन साटि, मिरट ना मोडिन ताकना इन्जेर कोर्सेर मंतोन.
17 इद कारंतुन साटिने पर्बुन हिंदल, नाकुन मरिन मोडि बरोसते मंवल लाड्नोर तिमोतिन मिह्गा रोह्चेर मंतोन.
नना येसु किरिस्तुना बक्तितगा बहन ताक्सेर मंतोनो, अनि हर जागता चर्चितुर्गा नना किय्वल बोदतुन बारेते, वोर मीकुन हेतु वानल कींतोर.
18 नना मिह्गा वायोन इन्जेर कहितुर पोके मासेर मंतेर.
19 मोका पर्बुना इचा आयर्ते, कोरुम किय्वक्ने मिह्गा वांतोन.
अस्के पोके माय्वलिरङ गोस्टिन आयो बति, वूरकुन बचोर ताकद मंतयो सूडंतोन.
20 बारितेके, बगवंतना राज डगुक डगुक गोस्टिङ वेह्वडगा दिसो.
बति तंवा सक्तितुन पिय्सि ताक्वलिरा जिन्गनितगा अद दिसंता.
21 नना सुर्पुटि पिय्सि मिह्गा वायना कि?
सेलेके पेर्मते अनि सांतिता मंदे वायना?
बद तरिकते मिह्गा वायना इंतिट?