मीरे मासि काम किय्वल
3
1 दादलिर-बायिक्निट!
बगवंतना आत्मा वालिर सङा वड्क्तपिनय मी सङा नना वड्का पर्मकि.
बगवंतना आत्मा सेलुर वूर सादरन माय्नलिरे इन्जेर, अनि किरिस्तुनगा उंडे गिर पसि-बाललिरे इन्जेर मी सङा वड्क्तोन.
2 अद गट्कते मिरट पचि किया पर्विट इन्जेर मीकुन पाल उह्चि, पोसि कीतोन बति काने तिह्मकि.
इंके गिर काने तिता पेजे पचि किय्वल ताकद मी रोपो सेले.
3 बारितेके, मेंदोडङ इचङ पिय्सि ताक्वलिर मोडि, कड्क वेय्वल, जग्डङ किय्वल, पाल्टिङ आय्वल इंवलिक गुन्क, मी रोपो उंडे गिर मंतङ.
4 मिह्गटल वोरोर, ‘नना पव्लुन बाज्नोना आंदुन्’ इन्जेर इंतोर.
अनि उंडे वोरोर, ‘नना अपोलोना बाज्नोना आंदुन्’ इन्जेर इंतोर.
ते इदेन हिंदल, मिरट दुनियतुर सादरन माय्नलिरा लेकते वाय्विट कि बतल?
तप्वक वांतिट!
5 ते अपोलो इंवल बोर आंदुर?
पव्लु इंवना नना बोना आंदुन?
ममोट इविर्ते बगवंतनुर सेव्कलिरे आंदुम.
सिरिप माकुन पर्बु हव्लि कीता कार्यतुन हिंदल, मिरट किरिस्तुनगा बरोसा इर्तिट.
6 नना विजा वीत्तोन.
अपोलो येर वेडितोर.
बति अदेन पिरुसि, मोडोका आयुसि, बेर्सनल बगवंतले कीतोर.
7-8 अदेन साटि, वीत्ततुन बेर्सनल किय्वल बगवंतनगन सम्दो मंता.
बति विजा वीत्वनगन आयि, येर वेडिवनगन आयि बतय परक सेले.
बोना वोन, वोर कीता कामुन पिय्सि, बगवंतल इनम सींतोर.
9 ममोट बगवंतन सङा मीरे मासि, काम किय्वलिर आंदुम.
मिरट बगवंतना वावुर-सेत आंदिट.
बगवंतना रोतुन किरिस्तु इंवल उंदिय बुनदि मंता
अह्ने मिरट बगवंतना रोतुन मोडि गिर मंतिट.
10 बगवंतल पेर्मता-दयते सीता वरमुन हिंदल नना बेय जेटि-तापिदारन दात तान साटि बुनदि दोह्तोन.
अदेन पोरो बगवंतना रोन दुस्रुर दोह्चेर मंतेर.
हर वोरोर गिर अदेन पोरो, तना बहन दोह्चेर मंतोर इंवल दिहंते सूडना.
11 इद दोह्ता बुनदि येसु किरिस्तुय आंदुर.
इद बुनदि आय्वा, उंडे दुस्रोतुन बोरे दोहा परुर.
12 कहितुर इद बुनदित पोरो बगवंतना रोतुन कामि सीनल मंवलिक चोकोट्नङ वसतुन वाडकम कीसि, दोहंतेर.
अनि उंडे कहितुर नक्लि वसतुन वाडकम कीसि दोहंतेर.*
13 किरिस्तु उजगिरि अरुसन नेटि, हर वोरोना काम तात्कर दिसंता.
बारितेके तड्मिये वूरा कामुन परिक्सा कीसि, बातल काम इंवल तोहंता.
14 अद बुनदित पोरो वोरोर कीता काम निल्सि मंदर्ते, वोन इनम पुटंता.
15 बति वोर कीता काम तड्मित पाल आयर्ते, वोन इनम पुटो.
बति सिरिप वोर वोरोरे तड्मितल बचे मातपिनय बचे मांतोर.
16 मिरट सम्दिर गिर बगवंतना मंदिर आंदिट अनि बगवंतना आत्मा मी रोपो मंदंता इंवल मीकुन टावा सेले कि?
तप्वक टावय!
17 ते बोरे आयि, बगवंतना मंदिर आय्वलिर बक्तलिर नड्डुम पाल्टिङ कीसि, नासेडम कीनुर्ते, बगवंतल वोन नासेडम कींतोर.
बारितेके बगवंतना मंदिर पवित्रा मंदंता.
अद मंदिर मिरटे आंदिट.
18 अदेन साटि बोरे गिर तंवा तना पसि किय्वा.
मिह्गटल बोरे आयि, इद दुनियतगा तेलिवि-गियन वालेना इंदनुर्ते, बगवंतना नदुडे करलेन तेलिवि-गियन वाले आनल, मोदोल पिसन मोडि आया लागर.
19 बारितेके, इद दुनियता तेलिवि-गियन बगवंतना नदुडे बततुने कामि सियो.
इदेन बारेते, “तेलिवि-गियन वालिरङ कपट्नङ पिलनकुन पिय्सिन वूरकुन बगवंतल कोंडि कींतोर”+
20 अनि, “तमा तेलिवि-गियन वालिर आंदुम इंवलिरङ सोन्च्क बततुने कामि सियोङ इंवल बगवंतन टावा”+ इन्जेर गिर लिहि कीसि मंता.
21-22 अदेन साटि, सादरन माय्नलिर आय्वलिर ममोट इत्तेके नना, अपोलो अनि पेतुरु कीततुन पिय्सि, बोरे पोके माय्मट.
बारितेके, बगवंतले मिरट बक्तितगा बडे माय्ले, मा सम्दिरकुन मी साटि सीतोर.
अह्ने दुनियतगा मंवलिक अनुबव्क इत्तेके, जीवा सेलेके मरने आयि, इंके सेलेके मुने वाय्वलिके आयि, इव सम्दो गिर, मीवा पाय्दतुन साटिने मंतङ.
23 मिरट किरिस्तुनुर आंदिट.
किरिस्तु बगवंतनोर आंदुर.