मोद्नगा टाङे मासि जीवा सीतोर वोर किरिस्तुना कबुर
2
1 दादलिर-बायिक्निट!
नना मिह्गा वातोन अस्के, गोड गोड मंवलिक गोस्टिनेन आयि, वेले करिता अद तेलिवि-गियंतेन आयि, बगवंतना मर्मतुन मीकुन पचर किय्ले वाय्मकि.
2 इत्तेके नना मी सङा मनेके, मोद्नगा टाङि कीसि, जीवा येत्तेर वोर येसु किरिसतुन तपुसि, उंडे दुस्रो बदे गोस्टि वड्क्वल नाकुन जुरत सेले इन्जि, निर्नय कीसि मत्तोन.
3 अद गट्कते, ना मेंदोडगा जिगि सेले मत्ता.
तान सोप्ति वेरेते अनि तरा तरा आसेर मी नड्डुम मत्तोन.
4-5 मीवा बरोसा माय्नलिरा तेलिवि-गियंतुन पोरो आदर आसि मंवक्ने, बगवंतना सक्तित पोरो आदर आसि मंदना इंवले नावा इचा मत्ता.
अदेन साटिने, मी सङा वड्क्नेकेन आयि, चोकोट्ना कबुडुन पचर कीनेकेन आयि, तेलिवि-गियंतङ गोड गोड मंवलिक गोस्टिङ वाप्रि किय्वक्ने, पवित्रा आत्मतुन अनि बगवंतना सक्तितुन तोह्वलिकुने वाप्रि कीतोन.
बगवंतल सिय्वल तेलिवि-गियन
6 बति बाव-बक्तितगा बडे मातुर नड्डुम तेलिवि-गियन वाले बोदतुन वेहंतोम.
अद तेलिवि-गियन इद दुनियता आयो.
अनि आक्रित मूरे मासि सोंवलिर इद दुनियतुर अदिकारिरा तेलिवि-गियन गिर आयो.
7 इदेन बद्लि, ममोट वेह्वल तेलिवि-गियन बगवंतना मर्मता तेलिवि-गियन आंद.
इंके वेरि, इद सते गियन सम्दिरा नदुडुन दिस्वक्ने मक्डिते मत्ता.
कलि गडि किय्वक मुनेने, माकुन मय्मा सिय्ले, बगवंतल इद तेलिवि-गियंतुन नेमि कीसि इर्तोर.
8 इद तेलिवि-गियंतुन बारेते दुनियतुर बूरे अदिकारिरकुन टावा सेले.
टावा मन्मड इत्तेके, मय्मता रूप वाले पर्बुन मोद्नगा टाङि कीसि, वोना जीवा येच्चि मनुर.
9 दर्मा-ग्रंत्नगा,
“बगवंतल तनकुन पेर्मते सूड्वलिर साटि बव्ते तयर कीसि इर्तोरो,
इंके वेरि, अव बोनय नदुडुन दिस्मकि.
बोनङे केवकुन केन्जा वाय्मकि.
अनि अवेन बारेते बोनय मंदगा गिर सोन्च वाय्मकि”+
इन्जेर लिहि कीसि मंता.
10 बति इंके बगवंतल मक्डिते मंवलिक अव सम्दोन तंवा आत्मते माकुन बह्रि अरुस्तोर.
बगवंतना आत्मा सम्दोन अनि वेले रोपो मक्डिते मंवलिक बगवंतनङ गोस्टिन गिर मह्क्सि, पुटुसंता.
11 वोरोर माय्ननङ सोन्च्क वोना आत्मतुने टावा बति, दुस्रोन बोने टावा सेले.
अह्ने बगवंतनङ सोन्च्क बगवंतना आत्मतुने टावा बति, दुस्रोन बोने टावा सेले.
12 बगवंतल तंवा पेर्मता-दयते मा साटि कीतङ सम्दो कामकुन करि किय्ले, दुनियता आत्मा माकुन मदत कियो बति, बगवंतल सीता आत्मा मदत कींता.
13 अदेन साटिने इव गोस्टिन बगवंतना आत्मते करि कीसि, अद आत्मा ताकुस्वलिर लोकुरकुन माय्नना गियन पिय्सि वेहोम बति, बगवंतना आत्मा करुस्ता तीर अव गोस्टिङ वेहंतोम.
14 सादरन मायनल बगवंतनङ गोस्टिन वोपोर.
अव गोस्टिङ वोन वटि आगय्तन मोडि दिसंतङ.
अवेन सिरिप बगवंतना आत्मतेन अर्तम किया परंतट.
अदेन साटि वोन अर्तम आयोङ.
15 बगवंतना आत्मा मंवल सम्दिन अर्तम किया परंतोर.
बति वोन बारेते दुस्रोर बोरे बर्पुर अर्तम किया परोर.
16 इदेन बारेते,
“बगवंतना मंदुन बोरे करि किया परोर,
अनि वोन बोरे सूचना वेहा परोर”+
इन्जेर दर्मा-ग्रंत्नगा लिहि कीसि मंता.
बति मरट, किरिस्तुना मन वालिर आता काड्कि, अवेन अर्तम किया परंतट.