1वा कोरंति
कोरंतितुरकुन लिहि कीता मोदोडा चिटि
वोड्कि अरुस्वल गोस्टि
1
1-2 कोरंति नगुडे मंवलिर बगवंतना चर्चितुरकुन इत्तेके येसु किरिसतुन हिंदल, बक्तलिर आय्वलिर मी साटि, सोस्तेनेसु दादल अनि बगवंतना इचा तीर येसु किरिस्तुनोर अपोस्तुल आय्वल पव्लुना, इद चिटितुन लिहि कीसेर मंतोन.
मा येसु किरिस्तु पर्बुना पोरोडे पार्तना किय्वल हर जागतुर बरोबर, मिरट गिर पवित्रा वालिर आसि मंदना इन्जेर बगवंतल मीकुन आच्चि, नेमि कीतोर.
वूरकुन अनि माकुन वोर येसुये माल्कल आंदुर.
3 मा बाबो बगवंतल अनि मा येसु किरिस्तु पर्बु मीकुन पेर्मता-दया अनि सांति सियिर!
येसु किरिस्तुनगा पुट्वलिक वरम्क
4 येसु किरिसतुन हिंदल, बगवंतल मीकुन सीता अद तंवा पेर्मता-दयतुन पिय्सि, मी बारेते ना बगवंतन बस्केट नना दनेवाद वेह्चेर मंतोन.
5-6 बारितेके मिरट किरिसतुन बारेता कबुडगा बर्पुर बरोसा इर्ता काड्कि, हर चीज्नगा इत्तेके, वड्क्वडगन आयि, गियंतगन आयि मिरट वेले बडे मानल बगवंतल कीतोर.
7-8 इहिन मा येसु किरिस्तु पर्बुना वाय्वडुन साटि, आसते सूड्सेर मनेके, मी नड्डुम पवित्रा आत्मा सिय्वलिक वरम्क बवे गिर कमि मंवा.
अनि वोर पर्बु वाय्वल दिवोसुन नेटि, मिरट सम्दिर गिर बे-कसुर मंवलिरा लेकते वानल, बगवंतल मीकुन गट निपुसंतोर.
9 मा येसु किरिस्तु पर्बु इंवल तंवोर मरिन सङा मंले, मीकुन केय्तोर वोर बगवंतल बरोसतोर आंदुर.
बक्तलिरङ पाल्टिङ
10-11 दादलिर-बायिक्निट!
मी नड्डुम पाल्टिङ आसि, जग्डङ-लोलिङ ताक्सेर मंतङ इन्जेर क्लोये बायिना रोतुर नाकुन वेह्तेर.
अदेन साटि मिरट सम्दिर गिर बेद-बाव सेल्वक्ने उंदि गोस्टित पोरो निलट.
मी रोपो पगङ सेल्वक्ने उंदि मंदे, उंदि उदेसम्ने ताक्ले, येकि आयना इन्जेर, मा येसु किरिस्तु पर्बुना पोरोडे मीकुन कोर्सेर मंतोन.
12 मिह्गटल वोरोर, ‘नना पव्लुन बाज्नोना आंदुन्’, उंडे वोरोर, ‘नना अपोलोना बाज्नोना आंदुन्’, उंडे वोरोर, ‘नना पेतुर्तुन* बाज्नोना आंदुन्’ अनि उंडे वोरोर, ‘नना किरिसतुन बाज्नोना आंदुन्’ इन्जेर इंतिट अले.
13 बति किरिस्तु ते इहिन पाल्टिङ आय्मकि.
पव्लुना आय्वल नना मी साटि मोद्नगा टाङे मासि जीवा सिय्मकि अनि ना पोरोडे बाप्तिस्मा गिर सिय्मकि.
14-16 ना पोरोडे बाप्तिस्मा येत्तोम इन्जेर दुस्रोर बोरे वेह्वक्ने, नना सिरिप स्टेपेनस्ना रोतुरकुन, किरिस्पुन अनि गयियुन तपुसि, दुस्रोन बोने येसुना पोरोडे बाप्तिस्मा सिय्मकि.
उंडे बोने दुस्रोन बाप्तिस्मा सीतोन इंवल ते नाकुन हेतु सेले.
अदेन साटि बगवंतन दनेवाद वेह्चेर मंतोन.*
17 किरिस्तु नाकुन बाप्तिस्मा सिय्ले रोह्मकि बति, तंवा चोकोट्ना कबुडुन मत्ता तीर पचर किय्लेने, रोह्तोर.
मोका नावङ गियंतङ गोस्टिङ वाप्रि कीकते, मोद्नगा किरिस्तु कीता कार्यतुन सक्ति सेले इत्तप कीतोना आंतोन.
बगवंतना सक्ति अनि गियन किरिस्तुय आंदुर
18 मोद्नगा टाङे मासि, कीता किरिस्तुना अर्पनता कबुर, नासेडम आय्वलिरकुन बेकर दिसंता.
बति बचे माय्वलिर माकुन बगवंतना सक्ति अद आंद इन्जेर टावा.
19 इदेन बारेते,
“तेलिवि-गियन वालिरा तेलिवि-गियंतुन नासेडम कींतोन.
चतुर वालिरा चतुर गुंतुन कामि सिय्वक कींतोन”+
इन्जेर दर्मा-ग्रंत्नगा लिहि कीसि मंता.
20 ते अस्के, तेलिवि-गियन वालिर, चतुर मंवलिर सास्तिरिर अनि इद दुनियतुर जट-पट लाग्वलिर बेके सोत्तेर?
इद दुनियतुरा तेलिवि-गियंतुन बगवंतल बततुने कामि सिय्वक कीतोर इत्तपे कि!
21 अदेन साटिने बगवंतल तनकुन दुनियतुर तेलिवि-गियंते करि किय्वक मंदना इन्जेर निर्नय कीतोर.
इदेन बद्लि, लोकुर बततुने कामि सियो इंवल पचर कीता चोकोट्ना कबुडगा, बरोसा इर्वलिर बचे मायना इन्जेर बगवंतल निर्नय कीतोर.
22 यूदुल्क मय्मतङ काम्क कियना इन्जेर पूसि कीसेर मंतेर.
दुस्रोक जातिनुर* तेलिवि-गियंतुन मह्क्सेर मंतेर.
23 बति ममोट मोद्नगा परन सीतोर वोर किरिस्तुना कबुडुन बारेतेन पचर कीसेर मंतोम.
इद कबुर यूदुल्क्नगटल वेलेटिरकुन कोदपायुसि अरुसनल मत्ता काड्कि, तान्गा वूर बरोसा इर्मकि.
अनि अद दुस्रोक जातिनुर्गटल वेलेटिरकुन बततुने कामि सियो अदेन मोडि दिसंता.
24 बति बगवंतल केय्तुर वूरकुन इत्तेके, यूदुल्कुने आयि, दुस्रोक जातिनुर्कुने आयि, बगवंतना ताकदुन मोडि अनि बगवंतना तेलिवि-गियंतुन मोडि किरिस्तु दिसंतोर.
25 इद सम्दोतुन पिय्सि, बगवंतना पिसल गियन माय्नलिरा तेलिवि-गियंतुन तेर वेले विलुवता आंद.
अनि बगवंतना कम्जोर-पान माय्नलिरा ताकदुन तेर वेले ताकद वाले आंद इन्जेर करे मांता.
26 नावुर दादलिर-बायिक्निट!
मीकुन बगवंतल केय्तोर अद, गट्कतुन हेतु कीसि सूडट.
अद गट्कते, मी रोपो दुनियता लेकते गियन वालिर, डगुर पोरोल वालिर, पेर्सा कांदान वालिर वेलेटिर सेले मत्तेर.
27-29 बति बोरे आयि तंवा तना पोके माय्वक मंले, बगवंतल दुनियतगा गियन वालिरकुन सिर्मिंदिङ किय्ले, पिसलिरकुन नेमि कीतोर.
दुनियतगा ताकद वालिरकुन सिर्मिंदिङ किय्ले, कम्जोर वालिरकुन नेमि कीतोर.
दुनियतगा, ‘ममोटे डगुर-पान वालिर्’ इन्जेर पोके माय्वलिरकुन सिर्मिंदिङ किय्ले, इद दुनियतगा वेले चुडुर-पान वालिरकुन, कमि-पान वालिरकुन अनि बततुने कामि सियुर वूरकुन नेमि कीतोर.
30 बति बगवंतन हिंदल, येसु किरिस्तुनगा मिरट येकि आतिट.
बगवंतल मीकुन तेलिवि-गियन आसि मंवल किरिसतुन सीतोर.
वोर किरिस्तुये माकुन नियत अनि सुदुड-पान सीसि, पापनल सुटि कियुसंतोर.
31 अद कारंतुन हिंदल दर्मा-ग्रंत्नगा, “पोक्डा किय्वल सिरिप पर्बु आय्वल बगवंतना गोस्टित पिय्सिने पोक्डा कियना”+ इन्जेर लिहि कीसि मंता.