तंवा बक्ति किय्वलिरकुन बगवंतल सिय्वलिक वरम्क
12
1 अनि दादलिर-बायिक्निट!
बाव-बक्ति वालिरकुन बगवंतल सिय्वलिक आत्मतङ वरमकुन बारेते, मीकुन करे माय्वक मंवल नाकुन पसंद सेले.
2 किरिस्तुनगा बरोसा इरन मुने, दुस्रोक दुस्रोक आत्मन हिंदल, मिरट वड्कोङ अव पेन्क्नङ मूर्तिना पूजा कीसेर मत्तिट.
3 बति इंके, किरिस्तुनगा बरोसा इर्ता पेजे, बगवंतना आत्मते वड्क्वल बोरे आयि, “येसु सापेना लाग्तोर वोर आंदुर” इन्जेर वेहा परोर.
अनि पवित्रा आत्मता सात सेल्वा बोरे आयि, “येसुये पर्बु आंदुर” इन्जेर वेहा परोर इंवल मिरट करि कियना.
4 बगवंतना आत्मा उंदिये बति, वोर सिय्वलिक वरम्क वेले तीर्क्नङ मंतङ.
5 अनि पर्बु वोरोरे बति, वोन साटि किय्वलिक सेवङ वेले तीर्क्नङ मंतङ.
6 वेले तीर्क्नङ काम्क मंतङ बति, बगवंतल वोरोरे सम्दिर रोपो मन्जि, अव सम्दोन कियुसेर मंतोर.
7 तेर बति, सम्दिरा पाय्दत साटि बगवंतल तंवा आत्मतुन हर वोरोर बक्तनगा इर्तोर.
8 बहन इत्तेके, अद आत्मतुन हिंदले, वोरोर बुदि-गियंते बोदा वेहा परंतोर अनि उंडे वोरोर तेलिविते बोदा वेहा परंतोर.
9 अद आत्मतुन हिंदले, वोरोनगा वेले बरोसा पुटंता अनि उंडे वोरोनगा बेमरिन चोकोट किय्वल वरम पुटंता.
10 अदेनेन वोरोन मय्मतङ काम्क किय्वल सक्ति पुटंता.
उंडे वोरोन बगवंतल वेहा इततुन वेह्वल वरम पुटंता.
अदेनेन वोरोन आत्मन बारेता तेडा करि किय्वल सक्ति पुटंता.
उंडे वोरोन वायोङ अव दुस्रोक बासङ वड्क्वल सक्ति पुटंता.
अनि उंडे वोरोन अव बासना अर्तम वेह्वल वरम पुटंता.
11 तंवा अद उंदि आत्मतुन हिंदले बगवंतल इव सम्दो जर्गुसीसेर, तनकुन इस्टम वाता तीर हर वोरोन अलग अलग्ना वरम तूसि सीसेर मंतोर.
उंदि मेंदोडगा वेले बागल्क मंतङ
12 मावा मेंदोडगा वेले बागल्क मंतङ.
उंदि उंदि बागम उंदि काम कींतङ.
अह्ने मरट दुस्रुर दुस्रुर वेलेटिर मंतट.
तेर बति, किरिसतुन हिंदल, वोना उंदि मेंदोल आया पर्तट.
13 बहन इत्तेके, मरट यूदुल्क आतेके गिर, दुस्रोक जातिनुर आतेके गिर, दासिर आतेके गिर, मोक्डो मंवलिर आतेके गिर, मरट सम्दिर उंदि मेंदोल आय्ले, उंदिय बाप्तिस्मा येत्तट अनि उंदिय आत्मतगा ईसा येत्वलिर आतट.
14 मेंदोल पूरो उंदि बागम्ने तयर आसि सेले बति, वेले बागल्क्ने तयर आसि मंता.
15 मोका काल, “नना केय्दा आय्वा काड्कि, मेंदोडा बागम्ना आयोन” इन्जेर इत्ता इंट.
ते अद करलेन मेंदोडा बागम आय्वक मंदर कि?
तप्वक बागम आंता!
16 अह्ने मोका केवि, “नना कड्दा आय्वा काड्कि, मेंदोडा बागम्ना आयोन” इन्जेर इत्ता इंट.
ते अद करलेन मेंदोडा बागम आय्वक मंदर कि?
तप्वक बागम आंता!
17 मेंदोल पूरो कडे आतेके बहन केन्ज्कट?
मेंदोल पूरो केवि आतेके, बहन गाडि येत्कट?
18 करल बतल इत्तेके, बगवंतल तंवा इचा तीर, हर बागमुन मेंदोडगा बगा इरनयो अगा इर्तोर.
19 अव सम्दो बागल्क उंदि बागमुन मोडि आनुङ्ते, मेंदोल बगा मंदर?
असले मनो!
20 अदेन साटि बागल्क वेले मंदनुङ तेर मेंदोल उंदिय मंदंता.
21 ते कड, केयदुन सङा सेलेके तला, कादुन सङा, “निमे नाकुन जुरत सेले” इन्जेर इंदा परो.
22 अचोरे आय्वा, मेंदोडङ बागल्क्नगा बव्ते वेले कम्जोर दिसंतङो, अवे वेले मुकेम्नङ आंदुङ.
23 अनि मेंदोडङ बव बागलकुन कमि-पान वालेक इन्जेर सोन्च कींतटो, अवेन वेले मानि कींतट.
बव्ते सोबते दिसोङो, अवेने वेले सजि कींतट.
24-25 सोबते मंवलिक बागलकुन सोबते तयर किय्वल जुरत सेले.
मेंदोडङ बागलकुन नड्डुम बदे तेडा मंवा इन्जि, उंदित साटि उंडे उंदि पटि कीसेर मंदना इन्जेरेन बगवंतल कमि-पान वालेतुन डगुर-पान सीसि, मेंदोडुन तयर कीतोर.
26 अदेन साटिने, मेंदोडा उंदि बागम दुक्सा येत्नेके, मेय्तङ गिर तान बरोबर दुक्सा येतंतङ.
उंदि बागमुन मान पुट्नेकेन मेय्तङ बागल्क सम्दो आनंद येतंतङ.
27 इंके मिरट किरिस्तुना मेंदोल आंदिट.
मिह्गटल हर वोरोर अद मेंदोडङ बागल्क आंदिट.
28 अनि बगवंतल तंवा चर्चितुरकुन इहिन तम्वा तम्वा जागतगा इर्तोर: मोदोल कहितुरकुन अपोस्तुल्क इन्जेर नेमि कीतोर.
बगवंतल वेहा इततुन वेह्ले उंडे कहितुरकुन पर्वक्तलिर इन्जेर नेमि कीतोर.
अद आता पेजे, कहितुरकुन बोदा करुस्वलिर इन्जेर नेमि कीतोर.
उंडे कहितुरकुन मय्मतङ काम्क किय्ले नेमि कीतोर.
अनि कहितुरकुन बेमरिन चोकोट किय्वलिक वरम्क सीतोर.
अनि उंडे कहितुरकुन मदत किय्वलिर इन्जेर, कहितुरकुन राज ताकुस्वलिर इन्जेर, उंडे कहितुरकुन तीर-तीर्दङ बासङ वड्क्वलिर इन्जेर नेमि कीतोर.
29 वीर्गटल सम्दिर अपोस्तुल्क आंदिर कि?
सम्दिर पर्वक्तलिर आंदिर कि?
सम्दिर बोदा करुस्वलिर आंदिर कि?
सम्दिर मय्मतङ काम्क किय्वलिर आंदिर कि?
सम्दिर बेमरिन चोकोट किय्वलिक वरम्क वालिर आंदिर कि?
30 सम्दिर तमकुन वायोङ अव दुस्रोक बासङ वड्क्वलिर आंदिर कि?
सम्दिर अव बासना अर्तम वेह्वलिर आंदिर कि?
असले आयुर!
31 आत्मतङ वरम्कनल वेले चोकोट्नङ वालेकुन आसते कोरट.
इव वरम्के आय्वा, बेय चोकोट्ना सरदुन बारेते मीक वेहंतोन.