सम्दोनल पेर्मा बेय चोकोट्ना आंद
13
1 नना मोका माय्नलिर सम्दिरङ बासङ अनि दूतलिरा बासा वड्क्तेके गिर, ना रोपो पेर्मा सेल्वेके, नना जोर्ते आवज सिय्वल गुङुडुन मोडि, सेलेके पितुडङ जालरकुन मोडिन मंदंतोन.
2 मोका नाकुन बगवंतन बारेता बोदा वेह्वल वरम मत्तेके गिर, मक्डिते मंवलिक सम्दोन करि किय्वल गियन मत्तेके गिर, ना रोपो गुटन चड्क्ने बूडनल तेर्वल बर्पुर बरोसा मत्तेके गिर, ना रोपो पेर्मा सेल्वेके नना बततुने कामि सियोन.
3 गरिबुन साटि नावा आस्ति पूरो सीतेके गिर, वेयन साटि नावा मेंदोडुन हव्लि कीतेके गिर, ना रोपो पेर्मा सेल्वेके नाकुन बतय पाय्दा मनो.
4 पेर्मते सूड्वल बस्केट वोर्चंतोर.
पेर्मते सूड्वल दया तोहंतोर.
पेर्मते सूड्वनङ कड्क वेयोङ.
पेर्मते सूड्वल पोके मायोर.
पेर्मते सूड्वल गर्वते मनोर.
5 पेर्मते सूड्वल बगड तरिकते ताकोर.
पेर्मते मंवल तंवा पाय्दा सूडोर.
पेर्मते सूड्वनगा सिर्डल गुन मनो.
पेर्मते सूड्वल तनकुन नुक्सन कीततुन मंदगा इरोर.
6 पेर्मते सूड्वल बगड-नियतुन हिंदल आनंद येतोर.
बति सतेमुन पिय्सि आनंद येतंतोर.
7 पेर्मते सूड्वल बस्केट सम्दोन सोसि कींतोर.
पेर्मते सूड्वल बस्केट नमंतोर.
पेर्मते ताक्वल बस्केट आसते सूडंतोर.
पेर्मते सूड्वल सम्दोन बस्केट वोर्चंतोर.
8 पर्वक्तलिर वेह्तङ गिर कामि सिय्वक आंतङ.
वायोङ अव दुस्रोक बासङ वड्क्वल वरम गिर आगंता.
गियंता वरम गिर बततुने कामि सिय्वक आंता.
बति पेर्मा बस्केट निल्सि मंदंता.
9 बारितेके, मह्गा मंवल गियन अनि बगवंतल वेहा इततुन वेह्वल वरम, मा रोपो बर्पुर सेले.
10 बति बस्केते सम्दोतुन बर्पुर किय्वल किरिस्तु वांतोरो, अस्के बर्पुर सेले अद कामि सिय्वक आंता.
11 नना चुडुर-कांडिना आसि मनेके, चुडुर-कांडिन मोडि वड्क्तोन, सोन्च कीतोन अनि अर्तम कीतोन.
बति नना डियोना आतोन अस्के, चुडुर-कांडिन मोडि मनेकेडङ गुनकुन मरुङ्तोन.
12 इंके मरट बदुर बदुर दिस्वल आर्सतगा मावा मोकोटा सूड्तपिनय सूड्सेर मंतट.
बति वोर किरिस्तु वाता पेजे, सम्दो तात्कर सूडंतट.
इंके नाकुन जरसिने करे मांता बति, ना बारेते बगवंतन बर्पुर करे मांता.
वोर वाता पेजे, नाकुन गिर सम्दो बर्पुर करे मांता.
13 ते इंके बरोसा, आसा, पेर्मा इव मूंद बस्केट निल्सि मंदंतङ.
बति इवेनल पेर्मा मुकेता आंद.