दुस्रोक बासङ अनि बगवंतल वेहा इततुन वेह्वलिक वरम्क
14
1 अदेन साटि पेर्मते मंले वेले कोसिद कीम्ट.
पवित्रा आत्मा सिय्वलिक वरमकुन वेले आसते कोरट.
मुकेते बगवंतल वेहा इततुन वेह्वल वरमुन कोरट.
2 बारितेके करे मायो अद बासते वड्क्वल माय्नलिर सङा आयो बति, बगवंतन सङा वड्क्सेर मंतोर.
बगवंतना आत्मता सक्तिते वोर मर्मतङ गोस्टिङ वेहंतोर.
इदेन माय्नलिर बोरे अर्तम किया परुर.
3 बति बगवंतल वेहा इततुन वेह्वना बोदा, माय्नलिरा बरोसतुन बडि किय्ले, बक्तितगा मुने सोंले अनि सांतिते मंले कामि सींता.
4 करे मायो अद बासते वड्क्वना वरम तंवा तना बडे माय्ले कामि सींता.
बति बगवंतल वेहा इततुन वेह्वल वरम पूरो चर्चितुर बक्तलिर बक्तितगा बडे माय्ले कामि सींता.
5 मिरट सम्दिर वायोङ अव बासङ वड्कना इंवल आसा कींतोन.
बति इदेन तेर अदिक बगवंतल वेहा इततुन वेहना इन्जेर आसा कीसेर मंतोन.
बारितेके, वड्क्तङ अव बासना अर्तम वेह्वल बोरे सेल्वेके, चर्चितुरकुन बतय पाय्दा पुटो.
बति चर्चितुर बक्तलिरा बरोसा बडे मानल बगवंतल वेहा इततुन वेह्वल बस्के गिर वेहा वचो.
अदेन साटि, बासना वरमुन तेर इद वरमे वेले कामि सींता.
6 दादलिर-बायिक्निट!
नना मिह्गा वासि, मीकुन वायोङ अव बासने वड्क्तेके मीक बतल पाय्दा पुटंता?
ना हिंदल बगवंतल मीकुन पूना गोस्टि करुसना सेलेके, मीकुन गियन सियुसना सेलेके, ना तोड्दे तंवा बोदा वेहुसना.
इव बवे गिर नना वेहा पर्वेके, ना हिंदल मीकुन बतल पाय्दा पुटंता?
बतय पुटो!
7 जीवा सेलेङ अव वस्तुङ आय्वलिक बोङा अनि पेप्रे वडुस्नेके, वूर अवेना नांद बरोबर तेंड्वेके, बदेन वडुसंतेर इंवल माकुन बहन करे मांता?
करे मायो!
8 अनि तुरता नांद* बरोबर पेसिवेके लडेय किय्ले, बोर तयर आंतेर?
बोरे आयुर!
9 अदे तीर्दे, मिरट वड्क्वल वेन्जेडे चोकोट वड्कबीगर केन्ज्वलिरकुन बगा अर्तम आंता?
असले अर्तम आयो!
इव सिरिप वडितगा वड्क्तप मंदंतङ.
10 इद परिपन्चम्नगा वेले तीर्क्नङ बासङ मंतङ बति, अर्तम सेल्वक्ने बदे बासा मनो.
11 बति बोरे वोरोर वड्क्वल बासा नाकुन अर्तम आय्वेके, वोर नाकुन मुसपरिन दात मंदंतोर.
वोन नना मुसपरिन दात मंदंतोन.
12 मिरट पवित्रा आत्मा सिय्वलिक वरमकुन साटि आसते मत्ता काड्कि, चर्चितुर बक्तलिर सम्दिर बरोसतगा बडे माय्ले, अव मीकुन पुटना इन्जेर कोरट.
13 करे मायो अद बासते वड्क्वल, ताना अर्तम वेहनल सक्ति सीम इन्जेर बगवंतन पार्तना कियना.
14 बारितेके मोका अद बासते पार्तना कीकते, नावा आत्मा पार्तना किय्मड मंदर बति, नावा मन लङ मंदंता.
15 अदेन साटि, नना रंडुते तीर्क्ने कींतोन: कहि जोकङ आत्मते पार्तना कींतोन अनि उंडे कहि जोकङ वाय्वल बासते मंदे पार्तना कींतोन.
कहि जोकङ आत्मते वारंतोन अनि उंडे कहि जोकङ वाय्वल बासते मंदे वारंतोन.
16 सिरिप मिरट आत्मते बगवंतन डगुर-पान सीसेर, बोने करे मायो अद बासते पार्तना कीतिट इंट.
इदेन बारेते वोड्कि सेलोर वोर, निमे किय्वल पार्तना अर्तम आय्वा सोन्जि, ‘आमेन्’ इन्जेर वोर बहन इंदनुर?
असले इनोर!
17 निम्ते बगवंतन डगुर-पान सीसेर चोकोट पार्तना कीसेर मंति.
बति दुस्रुर बक्तितगा बडे माय्ले, अद बततुने कामि सियो.
18 नना वायोङ अव बासना वरमुन मी सम्दिर्गटल अदिक वाडकम किय्ले, कारन आय्वल बगवंतने दनेवाद वेह्चेर मंतोन.
19 तेर बति, चर्चितुर बक्तलिर सङा वूरकुन करे मायो अद बासते दहा हजर (10,000) गोस्टिङ वेह्वडुन तेर, वूरकुन वाय्वल बासते सियुङ गोस्टिङ वाप्रि कीसि, बोदा वेह्वल चोकोट मंदंता.
चर्चितुर बक्तलिरकुन सूचना किय्वल
20 दादलिर-बायिक्निट!
सोन्च किय्वल गोस्टितगा चुडुकुन मोडि मन्मट बति, डगुकुन मोडि मंट.
अनि करब-पांदा गोस्टितगा चुडुकुन मोडि मंट.
21 दर्मा-ग्रंत्नगा,
“नना वीर पर्जत सङा दुस्रोक बासङ वड्क्वलिरा केय्दे,
अनि मुसपरिरङ सिव्लिने वड्कुसंतोन.
तेर बति वीर नावा गोस्टि केन्जुर”
इन्जेर बगवंतल लिहि कियुस्तोर.
22 अदेन साटि करे मायो अद बासते वड्क्वल नम्तुर साटि आयो बति, नंमकि वूर साटिने निसनि आसि मंता.
बगवंतल वेहा इततुन वेह्वल नंमकि वूर साटि आयो बति, नम्तुर साटिने निसनि आसि मंता.
23 चर्चितुर्गा मिरट सम्दिर मीरे मासि मनेके, बोने वायोङ अव बासने वड्क्वल सुरु कीतेर इंट.
अस्के अवेन बारेते अर्तम कियुर वूर सेलेके, पर्बुन नंमकि वूर मिह्गा वानिर्ते, वीर सम्दिरकुन पिसङ पिय्तङो बतलो इन्जेर मीकुन इनुरिय?
तप्वक इंतेर!
24-25 बति मिरट सम्दिर बगवंतल वेहा इततुन वेह्तिट इंट.
अस्के इदेन बारेते अर्तम कियुर वूर सेलेके, पर्बुन नंमकि वूर मिह्गा वानिर्ते, मिरट वेह्वल केन्चि तम्वा पापुन करि कींतेर.
वूरङ दिल्क्नगा मक्डिते मंवलिक सम्दो उजगिरि अरंतङ.
अद गट्कते वूर बगवंतन मुने मुर-टोङ्रङ कोट्सि, चुक चुके मासेर, “करलेन बगवंतल मी नड्डुम मंतोर” इन्जेर वोपंतेर.
पार्तना-विंति किय्वल तरिका
26 दादलिर-बायिक्निट!
इंके मी नड्डुम पार्तना-विंति बहन ताक्सेर मंता?
मिरट चर्चितुर सङा मीरे माता पेजे, वोरोर पाटा वारना इंतोर.
उंडे वोरोर उंदि चोकोट्ना गोस्टिता बोदा वेहना इंतोर.
उंडे वोरोर तनकुन बगवंतल उजगिरि अरुस्ततुन वेहना इंतोर.
वोरोर करे मायो अद बासते वड्क्ले सूडंतोर.
उंडे वोरोर अद बासता अर्तम वेह्ले सूडंतोर.
इव सम्दोन इह्ने जर्गुसीम्ट अनि चर्चितुर सम्दिर बक्तितगा बडे माय्ले, इवेन वाप्रि कीम्ट.
27 करे मायो अद बासते वड्क्वल मत्तेके, इविर जुरत अर्तेके मुविरकुन अदिक वड्क्वा.
वूर गिर तंवा वंतुन पिय्सि वड्कना.
अनि अव बासना अर्तम वेह्वल वोरोर तप्वक मंदना.
28 बति चर्चितुर रोपो अर्तम वेह्वल सेल्वेके, करे मायो अद बासते वड्क्वल मायनल दब मंदना.
वोर तंवा आत्मते बगवंतन सङा वड्का वचो.
29 बगवंतल वेहा इततुन वेह्वलिर पर्वक्तलिर इविर सेलेके मुविर वेहा वचो.
मेय्तुर वूर वेह्ता अदेन दिहंते परिक्सा किया लागर.
30 बति उच्चि मंवलिर्गटल अचनक बोने बगवंतल तंवा गोस्टि वेहा इंदनुर्ते, मोदोडोर मायनल वड्क्वल आपुसा लागर.
31 सम्दिर करिनल अनि सम्दिर बक्तितगा मुने सोंले, मिरट वोरोन पेजेय वोरोर बगवंतल वेहा इततुन वेहा वचो.
32 अनि बगवंतल वेहा इततुन वेह्वलिर पर्वक्तलिर, बस्के वड्कना, बतल वड्कना इंवल तम्वा तमकुन जरब्ने इरंतेर.
33-34 बारितेके, बगवंतल कला गुला कीसि, लोलि पुटुस्वल आयोर.
बति चर्चितुर बक्तलिर नड्डुम बर्पुर सांतितुन रेहि किय्वल आंदुर.
चर्चितुर सम्दिर मीरे मासि मनेके, वेय्लोक दब मंदा लागर.
वड्कन साटि अवेन अदिकार सेले.
इदेन बारेते दर्मा-ग्रंत्नगा, “वेह्ता तीर वेय्लोक ताकना”+ इन्जेर लिहि कीसि मंता.
35 वेय्लो बतय करिका इंदर्ते, रोन सोत्ता पेजे तंवोर माड्सोन पूसि कियना.
चर्चितुर नड्डुम वड्क्वल वेय्लो तंवा हिजत तनय वोतप आंता.
36 बगवंतना वचन मिह्गटले पुड्ता इंतिट कि, सेलेके सिरिप मिह्गने वाता इंतिट?*
37 मिह्गटल बोरे वोरोर बगवंतल वेहा इततुन वेह्वल पर्वक्तल, सेलेके आत्मता बाव-बक्ति वालेना इंवल मंदनुर्ते, इव मीकुन लिहि किय्वलिक आगेङ पर्बुनङे आंदुङ इन्जेर करि कियना.
38 बति इदेन बोरे वोप्वेके दानुर्ते, वोन मिरट वोप्मट.*