येसुना नेंड्वडुन बारेता गोस्टि
15
1 दादलिर-बायिक्निट!
नना मीकुन पचर कीता चोकोट्ना कबुडुन उंडे उंदि जोका हेतु कियना इंतोन.
इदेने मिरट वोप्तिट अनि इदेनगन बरोसा इर्सि, इंके गट निल्सि मंतिट.
2 नना वेह्ता चोकोट्ना कबुडुन सुटि किय्वक्ने पिय्सि ताक्तेके, अद मीकुन बचि कींता.
सेल्वेके मीवा बरोसा बततुने कामि सियो.
3 नना वोप्सि ताक्तोन अद बोदतुन मोदोल मीकुन अंदुस्तोन.
अद बतल इत्तेके, दर्मा-ग्रंत्ना वचन तीर किरिस्तु मावङ पापकुन साटि मार्तोर.
अहन मार्ता पेजे वोन माति कीतेर.
4 अनि दर्मा-ग्रंत्ना वचन तीर बगवंतल मूंद रोज्क्ने वोन नेंडुस्तोर.
5 अहन नेंड्ता पेजे वोर पर्बु, पेतुरतुन अनि कड्मतुर सिस्यलिरकुन दिस्तोर.
6 अद आता पेजे, उंदि जोका सियुङ नुहकुन (500) तेर अदिक बक्तलिरकुन दिस्तोर.
वीर्गटल वेलेटिर इंके गिर पिसिन मंतेर बति, कहितुर मार्तेर.
7 अद आता पेजे पर्बु, याकोबुन अनि सम्दिर अपोस्तुल्कुन दिस्तोर.
8 वीर सम्दिर्गटल आक्रि पुड्तपिनय मंवल नाकुन गिर दिस्तोर.
9 बहन इत्तेके, नना सम्दिर अपोस्तुल्क्नगटल चुडुर-पान वालेना आंदुन.
नना बगवंतना चर्चितुरकुन दुक्सा सीतोना आंदुन.
अदेन साटि, नना अपोस्तुल्ता इन्जेर केय्ले गिर कामि सियोन.
10 बति इंके नना बतल आसि मंतोनो अद, बगवंतना पेर्मता-दयतेन आसि मंतोन.
अनि बगवंतल नाकुन सीता पेर्मता-दयतुन आगम किय्मकि.
बति वूर सम्दिर अपोस्तुल्क्नगटल वेले पर्पेडे मासेर सेवा कीतोन.
11 अदेन साटिने ननय आयि, वूरे आयि, ममोट सम्दिर उंदितुने पचर कीतोम.
अदेनगन मिरट बरोसा इर्तिट.
सातुर वूर नेंड्वडुन बारेते
12 इदेन मुने ममोट, ‘किरिस्तु सासि-नेंड्तोर्’ इन्जेर मीकुन पचर कीतोम.
बति इंके मिह्गटल कहितुर, ‘सातुर नेंडुर्’ इन्जेर बारि इंतेर?
13 मोका इद गोस्टि करल मत्तेके, किरिस्तु गिर सासि-नेंड्मकि इत्तपे अर्तम वांता.
14 अनि किरिस्तु नेंड्वेके, ममोट पचर किय्वल येर्तम आंता.
अह्ने मीवा बरोसा गिर येर्तम आंता.
15 इदे आय्वा, ‘बगवंतल किरिसतुन नेंडुस्तोर्’ इन्जेर वोन बारेते मीकुन गवा वेह्तोम.
सातुर नेंड्वेके दानिर्ते बगवंतल वोन नेंडुस्मकि इत्तपे आंता.
इदेन बारेते, ममोट लबड गवा-दारकुन मोडि दिसंतोम.
16 अह्ने मोका सातुर वूर नेंड्वेके दानिर्ते किरिसतुन गिर बगवंतल नेंडुस्मकि इत्तप आंता.
17 किरिसतुन नेंडुस्मकि इत्तेके, मीवा बरोसा बततुने कामि सियो अनि मिरट उंडे गिर पाप्नगन कोंडे मासि मंतिट इत्तपे.
18 अचोरे आय्वा, किरिसतुन नम्ता पेजे सातुर वूर गिर नासेडमनल बचे माय्मकि इत्तपे.
19 सिरिप इद जिन्गनित साटिने मोका मरट किरिस्तुनगा आसा कीसि मत्तट इत्तेके, मावा गति सम्दिर माय्नलिर्गटल तेर बेय गोसा लागनल मंदंता.
20 बति करल सूड्तेके, सातुर्गटल किरिसतुन बगवंतल नेंडुस्ता काड्कि, वूर सम्दिर्गटल वोर मोदोडा पंडि आसि निल्तोर.
21 वोरोर माय्नन हिंदल, मरन वाता काड्कि, वोरोरे माय्नन हिंदल नेंड्वल गिर वाता.
22 आदम्नगा+ येकि आता काड्कि, सम्दिर बहंते सासेर मंतेरो, अह्ने किरिस्तुनगा बरोसा इर्सि येकि आता काड्कि सम्दिर नेंडंतेर.
23 बति सातोर वोर हर वोरोर तंवा तंवा वंतुन पिय्सि नेंडंतोर.
नेंड्तुर्गटल मोदोडा पंडि आय्वल किरिस्तु उंडे उंदि जोका वाता पेजे, वोनुर पर्जा नेंडंतेर.
24 अद आता पेजे, वोर किरिस्तु इद दुनियता राज ताकुस्वलिर सम्दिरकुन, अनि दुस्रुर सम्दिर अदिकारिरकुन, वूरा सक्तितुन पासि वाट्सि, तंवा राजुन बगवंतना केय्दे हव्लि कींतोर.
अस्के कलि डुबे माय्वल कालम वांता.
25 बहन इत्तेके, किरिस्तु तंवुर पगा-दारलिर सम्दिरकुन तंवङ कालकुन बूड इरनल वेरि, वोर राज ताकुसा लागर.
26 आक्रि वेरि, पगा पिय्सि मंवल मरंतुन, वोर नासेडम कींतोर.
27 बारितेके, “बगवंतल सम्दोतुन वोनङ कालकुन बूड इर्तोर”+ इन्जेर दर्मा-ग्रंत्नगा लिहि कीसि मंता.
इद सम्दोतुन किरिस्तुनङ कालकुन बूड इर्वल बगवंतल तपुसि, कड्मतङ सम्दो किरिस्तुनङ कालकुन बूड मंतङ इंवल कुला कुला अर्तम आंता.
28 बति सम्दोन तंवङ कालकुन बूड इर्सि मनेके, मरि तंवा तनय बगवंतना अदिकारदुन बूड मंतोर.
अद तीर्दे, बगवंतल सम्दोतुन ताकुसंतोर.
29 इंके नेंड्वले सेले इत्तेके, मरन आतुर साटि बाप्तिस्मा येत्तुर वूर बतल कीनिर?
वूर बहन नेंड्सि वानिर?
सातुर वूर नेंडुर इत्तेके, वूर साटि उंडे बारि बाप्तिस्मा येत्वल?
30 अनि अहन नेंडुर इत्तेके, चोकोट्ना कबुर पचर किय्वडुन हिंदल, हर गट्का मा परंतुन बारि आपतितगा वाट्सेर मंदना?
31 दादलिर-बायिक्निट!
मा पर्बु येसु किरिस्तुनगा निल्सि मंवलिर मीकुन सूड्सि, नाकुन वेले चोकोट लाग्सेर मंता.
इद कारंतेने, नना रोजि नावा मरंतुन सूड्सेर मंतोन इन्जेर मीकुन वेह्चेर मंतोन.
32 मोका सातुर नेंड्वेके, केडता जिव्रसुन मोडि मंवलिर एपेस नगुडुर सङा, नना लडेय किय्वडुन हिंदल, नाकुन बतल पाय्दा पुटंता?
इदेन बारेते, “नाडिता दिवोस्ने मरट परन सुटि किय्वलिर आता काड्कि, इंके तिन्कट-उन्कट”+ इन्जेर सास्तुरतगा मत्तपिनय कीकट कि बतल?
33 सातुर वूर नेंडुर इन्जेर वेह्वलिरा केय्दे पसे माय्मट.
बारितेके, “करेबलिरा सोप्ति चोकोट ताक्वडुन नासेडम कींता” इंवल सास्तुर मंता.
34 अदेन साटि नियत्ना सरि बद आंद इन्जेर सोन्च कीसि, पाप किय्वक मंट.
बगवंतन बारेता गियन कहितुरकुन सेले.
मीकुन लजन वाटेङ आयना इन्जेर इहिन वेह्चेर मंतोन.
नेंड्सि वाय्वल मेंदोल
35 बति कहितुर, “सातुर वूर बहन नेंडंतेर?
बातल मेंदोडा रूप्ने वांतेर?”
इन्जेर पूसि किया वचो.
36 ये पिसलिर्निट!
मिरट विजा वाटा बीगर पंटा बहन वायर?
असले वायो!
37 मिरट विजा वाट्ता पेजे, अद विजा बोमितल मोडोका इंवल दुस्रो रूप येच्चि वांता.
38 अनि बगवंतले हर विजतुन पिय्सि ताना डेटेता रूप सींतोर.
39 सम्दो तीर्क्नङ सविङ उंदि आयोङ: माय्नलिरा सवि, जंवर्ता सवि, पिटेना सवि अनि मीन्क्ना सवि अलग अलग मंदंतङ.
40 हाबडगा अनि दर्तुरितगा वस्तुनङ रूप्क मंतङ.
बति हाबडगा अनि दर्तुरितगा मंवलिक वस्तुना मय्मा अलग अलग मंदंता.
41 पोड्द, नेलेन्ज अनि सुकुक्ना मय्मा अलग अलग मंदंता.
इद मय्मतुन पिय्सि उंदि सुकुमुन अनि उंडे उंदि सुकुमुन परक मंदंता.
42 इदे तीर्दे सासि-नेंड्वलिरकुन गिर जर्गंता.
सडे माय्वल मेंदोल माति कींतट.
अनि सडे मायो अद मेंदोडे नेंड्वल जर्गंता.
43 सडे मासि, जिगि सेल्वक मंवल मेंदोडुन माति किय्वल जर्गंता.
अनि सोबते गट मंवल मय्मता मेंदोडे नेंड्वल जर्गंता.
44 इद दिस्वल मेंदोडुन माति कीसि, आत्मता मेंदोडे नेंड्वल जर्गंता.
इद सादरन मेंदोल मंता इत्तेके, अद आत्मता मेंदोल गिर मंता.
45 इदेन बारेते दर्मा-ग्रंत्नगा, “मोदोडोर मायनल आय्वल आदम परन वाले आतोर” इन्जेर लिहि कीसि मंता.
आक्रितोर आदम आय्वल किरिस्तु परंतुन पिसुस्वल आत्मा आसि मंतोर.
46 इद कलिता वाले कडकुन दिस्वल मेंदोल मोदोल वाता.
अद आता पेजे, आत्मता मेंदोल वाता.
47 मोदोडोर मायनल आदम दर्तुरितोर आसि, तोडितल निव्डे मातोर.
रेंडवा मायनल किरिस्तु पोरो मंवल स्वर्गनल वातोर.
48 तोडितल निव्डे मातोर वोर बातोरेय्ते, तोडितल निव्डे मातुर वूर गिर आतुरे आंदिर.
स्वर्गनल वातोर वोर बातोरेय्ते, स्वर्ग्नगा लागि-बागि मंवलिर गिर आतुरे आंदिर.
49 अनि मरट तोडितल निव्डे मातोना रूप येत्ता तीरे, स्वर्गनल वातोना रूप गिर येतंतट.
50 दादलिर-बायिक्निट!
मीकुन वेह्वल बतल इत्तेके, इद नेतुर अनि सवि वाले मेंदोडुन बगवंतना राज्नगा ईसा पुटो.
मूरे मासि सोंवल, बस्केट मूरे मायो अदेनगा ईसा येतो.
51-52 केन्जट!
इद मर्मतुन बगवंतल मोदोल करे माय्वक इर्सि मत्तोर.
बति इंके, नाकुन अदेन बारेते, उजगिरि अरुस्तोर.
अद बतल इत्तेके, मह्गटल कहितुर मरन आय्वट बति, मावा रूप मारियंता.
इद बहन जर्गंता इत्तेके, आक्रिता तुरा उह्क्वल वकत्ने, कड्मिंदि पायनच्चोर वकत्नेने जर्गंता.
अद तुरता आवज केन्जा वानेके, सातुर वूर बस्केट मूरे माय्वक मंले, नेंडंतेर अनि मावा रूप मारियंता.
53 बारितेके सडे माय्वलिक इव मेंदोल्क, बस्केन साव सेल्वक अनि सडे माय्वक मंवलिक मेंदोलकुन मोडि मारिया लागर.
54 इहिन मारिवल गट्कतुन बारेते दर्मा-ग्रंत्नगा,
“बगवंतल मरंतुन मेय्तोर.
इङे उंडे गिर मरन इंवल मनो”+
इन्जेर लिहि कीता गोस्टि पूरे मांता.
55 “ये मरंति!
निम माकुन बगा मेय्ति?
ये मरंति!
नीवा विक्ना कोंडि बगा मंता?”
+
इन्जेर दर्मा-ग्रंत्नगा लिहि कीसि मंता.
56 मरंता विक्ना कोंडितुन ताकद मावा पापनल वांता.
दर्मता कानुंतुन पिय्सि ताक्वट अदेनल, अद पापुन ताकद वांता.
57 तेर बति, मा येसु किरिस्तु पर्बुन हिंदल, माकुन मेयुस्वल बगवंतन दनेवाद वेह्चेर मंतोन.
58 अदेन साटि, नावुर लाड्नुर दादलिर-बायिक्निट!
पर्बुन साटि पर्पेडे माय्वल मीवा काया-कस्टम येर्तम सोनो.
इदेन करि कीसि, हाले माय्वक बरोसतगा गट निल्सि, पर्बुना सेवतुन उंडे अदिक कीसेर सोंदना.