येरुसलेम्नुर पर्बुनुर बक्तलिर साटि चंदा
16
1 येरुसलेम्नुर पर्बुनुर बक्तलिर साटि मीरि किय्वल चंदतुन बारेते, नना गलतिया येरियतङ चर्चिनुरकुन नेमि कीता तीर मिरट कीम्ट.
2 नना वाता पेजे उंदिय जोका चंदा मीरि किय्मट.
बति मिह्गटल हर वोरोन पर्बु आसिर्वाद सीता तीर इचुक इचुक पेजे वाट्सि, हर आय्त्वर मीरि कीम्ट.
3 नना वाता पेजे, मिरट चिटिङ अनि अद चंदा सीसि बोन बोंते रोहना इंतिटो, वूरकुन नना येरुसलेम रोहंतोन.
4 उंदि मोका मिरट नना गिर, वूर सङा सोंवल चोकोट इंद्किट्ते, मीरे मासि दांतोन.
पव्लुना यात्रता पिलन
5-7 पर्बु आगे सीनुर्ते मी सङा कहि रोज्क मंदना इन्जेर आसते सूड्सेर मत्ता काड्कि, मासिदोनिया येरियते सोनेके नड्डुम मिह्गा आग्वल नाकुन पसंद सेले.
अदेन साटि अगा सोन्जि मिह्गा वांतोन.
अस्के मिह्गा कहि रोज्क मंदा वचो, सेलेके पीनि गालुम पूरो गिर मंदा वचो.
अद आता पेजे, नना सोंवल जागते मिरट नाकुन सारि किया वचो.
8 बति इंके, नना इद एपेस नगुडेन पेंतेकोस्तु सड वेरि मंदंतोन.
9 इगे चोकोट्नङ काम्क किय्ले, नाकुन बेय डगुर मोका पुड्ता बति, वेलेटिर मर्ला बड्सेर मंतेर.
10 तिमोति मिह्गा वाता पेजे, मी नड्डुम वोर दर्यम्ने मनल सूडट.
ना दाते वोर गिर पर्बुना सेवा कीसेर मंतोर.
11 अदेन साटि, वोन बोरे गिर कमि-पांदे सूड्वा.
नह्गा वोन सांतिते रोहट.
मिह्गटुर कहितुर बक्तलिर आय्वलिर, दादलिर सङा, वोर वानुर इन्जेर सरि सूड्सेर मंतोन.
12 अपोलो दादना गोस्टित बारेते बतल इत्तेके, ‘वीर दादलिर सङा वूर्गा सोन्’ इन्जेर वोन जुल्मा कीतोन.
बति वोन इंके मिह्गा वाय्वल पसंद सेले.
वोर तीरेम्ने मिह्गा वांतोर अले.
13 दादलिर-बायिक्निट!
मीवा मिरट काबाड्ले दिहंते मंट.
बरोसतगा हाले माय्वक मंट.
दर्यम्ने अनि सक्ति वालिर आसि मंट.
14 मिरट किय्वल हर उंदि काम पेर्मते कीम्ट.
15 स्टेपेनस अनि वोना रोतुर अकया येरियतुर बक्तलिर्गटल मोदोडा पंडि आंदिर.
अनि बगवंतनुर बक्तलिरा सेवा किय्ले, वूर तम्वा जिन्गनितुन हव्लि कीतेर इंवल मीकुन टावा.
16 अदेन साटि दादलिर-बायिक्निट!
आतुरा अनि वूर दात सेवा किय्वलिर सम्दिरा नमुना येच्चि, मिरट ताकना इन्जेर मीकुन कोर्सेर मंतोन.
17 नह्गा स्टेपेनस, पोर्टुनाटस, अकयिका इंवलिर वाता काड्कि, नाकुन वेले आनंद लाग्ता.
18 बारितेके, मी बद्लि नह्गा वासि, नावङ जुरतकुन पूरि कीतेर.
अनि वूर ना आत्मतुन अनि मीवा आत्मतुन आनंद सीतेर.
ईतुरकुन मान सिय्वल जिमा मी पोरो मंता.
आक्रितङ दंडोस्क
19 आसिया येरियतगा मंवलिक चर्चिनुर बक्तलिर मीकुन दंडोस वेह्चेर मंतेर.
अकुला दादल, पिरिस्किला बायि अनि वूरा रोन मीरे माय्वल चर्चितुर पर्बुना पोरोडे मीकुन दंडोस वेह्चेर मंतेर.
20 इगे मंवलिर दादलिर-बायिक सम्दिरे मीकुन दंडोस वेह्चेर मंतेर.
मिरट वोरोन वोरोर पवित्रा पेर्मते कलिसि, दंडोस वेहट.
21 पव्लु इंवना नना कुद ना केय्दे मीकुन दंडोस इन्जेर लिहि कीसेर मंतोन.
22 बोरे आयि पर्बुन पेर्मा किय्वक मत्तेके, वोन सापेना लागि!
मा पर्बु वासेर मंतोर.
23 येसु किरिस्तु पर्बुना पेर्मता-दया मीकुन सात मनि!
24 येसु किरिस्तुनगा मंवल ना पेर्मा मी सम्दिर सङा मंदना.
आमेन!