बगवंतल बरोसते मंवल आंदुर
3
1-2 अहन बेहेते, “यूदुल्क आय्वडुन हिंदल माकुन बतय पाय्दा मंता कि?
तोल कत्रि कियुस्वडुन हिंदल, माकुन बतय पाय्दा मंता कि?”
इन्जेर मिरट पूसि कीकिट्ते, माकुन वेलेन पाय्दा मंता इन्जेर नना वेहंतोन.
बगवंतल मोदोल तंवङ गोस्टिङ यूदुलकुन सीतोर.
3 बति वूर्गटल कहितुर अदेन बरोसते पिय्सि ताक्मकि.
ते वूर हिंदल बगवंतल बरोसतोर आयोर इन्जेर इंदा पर्कटिय?
4 असले इंदा पर्वट!
हर मायनल लबड वेहा वचो बति, बगवंतल वेहोर.
इदेन बारेते,
“ये बगवंता!
नीवङ गोस्टिङ सत्नङ आंदुङ.
अनि बूरे नीकुन तस्वा कीतेके गिर,
बति निमे वेह्वल करले आंद इन्जेर वूर वोपा लागर”+
इन्जेर दर्मा-ग्रंत्नगा लिहि कीसि मंता.
5 ते मा यूदुल्क्ना ताक्वल बगड-नियत्ने मत्ता काड्कि, बगवंतना नियत बेय तात्कर दिसेर मंता.
अस्के कहितुर, “करेबलिर आय्वलिर माकुन बगवंतल सिक्सा कीनेके, तप कीसेर मंतोर” इन्जेर सादरन माय्नन दात सोन्च कींतेर.
6 बति अहन सोन्च किय्वल तप आंद.
बारितेके, बगवंतल मा यूदुल्कुने बरोबर तस्वा किय्वेके, दुनियतुरकुन बहन सत्ने तस्वा किया परंतोर?
असले किया परोर!
7-8 अनि, “मावङ करेबलिक कामकुन हिंदले, बगवंतन डगुर-पान अनि सतेम वासेर मंता.
अहन वातेके मावङ पापकुन पिय्सि, माकुन सिक्सा किय्वल जुरत सेले” इन्जेर कहितुर सोन्च किया वचो.
अहन सोन्च किय्वल करल मत्तेके, “चोकोट जर्ग्ले पाप कीकट वरट!”
इन्जेर गिर वूर इंदा वचो.
ननये इद तीर्दे बोदा कीसेर मंतोन इन्जेर उंडे कहितुर नावा हिजत वोसेर मंतेर.
बति इद करल आयो.
अहन सोन्च किय्वलिर पापिरकुन सिक्सा अर्वल नायमे आंद.
पर्जा सम्दिर पापेस्तलिर आंदिर
9 इदेना बाव इहिन मंता: यूदुल्क आय्वलिर मरट, यूदुल्क आयुर वूरकुन तेर चोकोट्नुर आय्वट.
नना मोदोल वेह्ता तीर सम्दिरे तप कीतुर आंदट.
बारितेके मरट अनि दुस्रुर सम्दिरे पाप कीसि मंतट.
10 इदेन बारेते, दर्मा-ग्रंत्नगा,
“नियत्नोर वोरोर गिर सेलोर!
11 नियत्नङ सरिन बारेते वोरोर गिर अर्तम कियोर!
बगवंतन मह्क्वल वोरोर गिर सेलोर!
12 सम्दिरे सरि बह्के मासि,
बततुने कामि सिय्वक आतेर.
चोकोट्ना काम किय्वल वोरोर गिर सेलोर!”
+
इन्जेर लिहि कीसि मंता.
13 “वूरङ गोस्टिङ, तेरितङ वीच्क्ना गाडित मोडि मंदंतङ.
*
वूर तम्वङ वेन्जेक्ने लबड वड्क्सेर पसि कींतेर”+
इन्जेर मंता.
अह्ने,
“वूरङ गोस्टिङ तरस्ना विकुन मोडि मंदंतङ”+
इन्जेर उंडे उंदि जागा लिहि कीसि मंता. अनि,
14 “वूरा तोड्डि मंदुन नोयुस्वलिक गोस्टिने
अनि सापेनने निन्चि मंता”+
इन्जेर लिहि कीसि मंता.
अनि,
15 “वूर जग्डङ किय्ले अनि जीवा येत्लेक गिर
बस्केट तयर मंदंतेर.
16 वूर बगा सोत्तेके गिर नासेडम
अनि तक्लिब कीसेर मंदंतेर.
17 वूरकुन सांतिता सरि टावा सेले”+
इन्जेर लिहि कीसि मंता.
अनि,
18 “वूरकुन बगवंतल इत्तेके असले वेरे सेले”+
इन्जेर गिर लिहि कीसि मंता.
इव सम्दो बगवंतले लिहि कियुस्तोर.
19-20 यूदुल्क आय्वलिर मा केय्दे दर्मता कानुंतुन हव्लि कीता काड्कि, इव मा साटिने मंतङ इन्जेर माकुन टावा.
बति इद कानुंतुन पिय्सि ताकोम.
अदेन साटि बगवंतल तस्वा कीनेके, “नना तप किय्मकि” इन्जेर वोना सिक्सतल दुनियतोर वोरोर गिर तपुसिया परोर.
बारितेके, इद कानुंतुन हिंदले, पाप इत्तेके बतल इंवल माकुन करे मांता.
ते बगवंतल, अद कानुंतङ काम्क किय्वडुन हिंदल, बोने गिर नियत्नोर इन्जेर केयोर.
किरिस्तु मा बद्लि सिक्सा बोगे मातोर
21 बति इंके दर्मता कानुंते आय्वा, बगवंतल माकुन नियत्नुर इन्जि वोप्ले, पूना सरि तेरितोर.
इद पूना सरितुन बारेते, बगवंतल तोले मोसेना केय्दे अनि दुस्रुर पर्वक्तलिरा केय्दे लिहि कियुस्तोर.
22 बेद-बाव सूड्वक्ने येसु किरिस्तुनगा बरोसा इर्वल हर वोरोन नियत्नुर इन्जेर बगवंतल वोपंतोर.
23 बारितेके, हर वोरोर पाप कीतट अनि बगवंतल सिय्वल मय्मतुन येता पर्सेर सेल्वट.*
24 बति बगवंतल तंवा पेर्मता-दयते नियत्नुर इन्जेर माकुन वोप्तोर.
इद सिरिप येसु किरिस्तु माकुन पाप्कनल सुटि कियुस्वडुन हिंदले जर्ग्ता.
25-26 बगवंतल मावङ पापकुन कंडि किय्ले, नेतुडा अर्पना आय्ले, येसुन सारि कीतोर.
बूर्ते वोर कीता अर्पनतगा बरोसा इरंतेरो, वूरकुन बगवंतल नियत्नुर इन्जेर वोपंतोर.
तंवा नियतुन तोहना इन्जेरेन बगवंतल इहिन कीतोर.
बारितेके, मोदोल कीतङ पापकुन बगवंतल वोर्चि, बोने सिक्सा किय्मकि.
बगवंतल अव पापकुन मरुङ्मकि बति, येसु वासि, अव सम्दो पाप्क्ना चुक्ता कींतोर इन्जेर टावा मत्ता.
बति इंके, बगवंतल तना नियत्नोना आंदुन इन्जेर तोह्ले, येसुनगा बरोसा इर्वलिरकुन नियत्नुर इन्जेर वोप्तोर.
27 अदेन साटि, मरट गर्वते मंले, कारन बतय सेले.
बारितेके, मरट बदे कानुंतुन पिय्सि ताक्ततुन हिंदल, बगवंतल माकुन वोप्मकि.
बति सिरिप तन्गा बरोसा इर्ता काड्किने, माकुन वोप्तोर.
28 ते अद कानुंतुन पिय्सि ताक्वडुन हिंदल आयो बति, बरोसा किय्वडुन हिंदले, बगवंतना नदुडे नियत्नुर आंतट इंवल माकुन टावा.
29-30 ते, बगवंतल सिरिप यूदुल्कुने बगवंतल आंदुर कि?
असले आयोर.
बगवंतल वोरोरे मत्ता काड्कि, यूदुल्क आयुर वूरकुन गिर वोरे बगवंतल आंदुर.
अदेन साटि, येसुनगा इर्ता बरोसतुन हिंदल, यूदुलकुन अनि यूदुल्क आयुर वूरकुन गिरे नियत्नुरा लेकते येत्तोर.
31 मावा बरोसतुन पिय्सि, दर्मता कानुंतुन विलुवा सेल्वक कीसेर मंतट कि?
असले कीसेर सेल्वट.
इदेन बद्लि, अद कानुन बततुन साटि मंतयो, उंडे इचुर अर्तम कीसेर मंतट.