रोमा 4

अब्राहम्ना बरोसा

1 मा तोत्तोर बाबो अब्राहमुन बारेते सोन्च कीम्ट.

मेंदोडे कीतङ कामकुन पिय्सि, बगवंतना नदुडे वोर नियत्नोर आया पर्तोर कि?

असले आय्मकि!

2 मोका कीतङ काम्क्ने अब्राहम नियत्नोर आय्मड इत्तेके, गर्वते मंले कारन मंदु.

बति बगवंतन मुने गर्वते मंले वोन कारन सेले.

3 बारितेके, वोन बारेते, “अब्राहम बगवंतन पोरो बरोसा इर्तोर.

अदेन हिंदले वोन नियत्नोर इन्जि बगवंतल वोप्तोर”⁺ इन्जेर दर्मा-ग्रंत्नगा लिहि कीसि मंता.

4 काम किय्वन बूति पुटंता.

तान साटि वोर काम कीता काड्कि, अद बूति पोकोट पुड्ता आयो.

5 बति काम किय्वडुन हिंदल, बगवंतना नदुडे बोरे नियत्नोर आया परोर.

सिरिप तन्गा बरोसा इर्वने नियत्नोर इन्जेर, पापेस्तलिरकुन मापि किय्वल बगवंतल वोपंतोर.

6 काम्क किय्वेके गिर बोंते बगवंतल नियत्नोर इन्जि वोपंतोरो, वोर वेले आसिर्वाद येत्वल आंतोर इन्जेर दाविद राजल वेह्‍तोर.

इदेन बारेते,

7 “बगवंतल बोनङ्ते करेबलिक कामकुन मापि कीसि,

अव पापकुन मर्न्गंतोरो, वोर आसिर्वाद येत्वल आंतोर.

8 बगवंतल बोनङ्ते पापकुन वोना लेकते वाटोरो,

वोर आसिर्वाद येत्वल आंतोर”⁺

इन्जेर दर्मा-ग्रंत्नगा लिहि कीतोर.

9 आसिर्वाद येतंतेर इंवलिर बारेते, वोर वड्क्नेके, तोल कत्रि कियुस्तुर बारेते कि सेलेके कियुस्मकि वूर बारेते वेह्‍चेर मत्तोर?

रंडुते वर्गनुर बारेते इहिन वेह्‍तोर.

“अब्राहम बगवंतन पोरो बरोसा इर्तोर.

अदेन हिंदले, वोन नियत्नोर इन्जि बगवंतल वोप्तोर” इन्जेर इंतट.

10 अहन अब्राहमुन बस्के वोप्तोर?

तोल कत्रि कियुस्ता पेजे कि, कियुस्वक मनेके?

तोल कत्रि कियुस्ता पेजे आयो बति, कियुस्वक मनेकेने बगवंतल वोप्तोर.

11 इहिन बरोसतुन हिंदल, नियत्नोर इन्जेर वोप्तता निसनि आसि मंले, तोल कत्रि किय्वल काय्दा इर्तोर.

इद तरिकते, तोल कत्रि कियुस्वक्ने, बरोसा इर्वलिर सम्दिरकुन अब्राहम तोत्तोर बाबो आतोर.

तन्गा मंवल वूरा बरोसतुन सूड्सि, बगवंतल वूरकुन नियत्नुरा लेकते येतंतोर.

12 अनि अब्राहम तोल कत्रि कियुस्वक मनेके, बहंते बरोसते ताक्तोरो, अह्‍ने तोल कत्रि कियुस्तुर वूर गिर ताक्तेके, वूरकुन तोत्तोर बाबो आंतोर.

13 इद दुनियता सम्दो अब्राहम्ना अनि वोना संतांदोना आंता इन्जेर बगवंतल वाग्दन सीतोर.

इदेन बगवंतल तंवा कानुंतुन पिय्सि अब्राहम ताक्तोर इन्जेर सिय्मकि बति, वोना बरोसतुन पिय्सि, नियत्नोर आता काड्किने, वोन सीतोर.

14 सिरिप कानुन पिय्सि, ताक्वलिरे बगवंतना वाग्दंतगा ईसदार्क आतेके, मरट बगवंतनगा इर्वल बरोसा बततुने कामि सियो अनि बगवंतल सीता वाग्दंतुन विलुवा मनो.

15 इत्तेके बोरे आयि, अद दर्मता कानुन पिय्सि ताक्वेके, बगवंतन सोङ वांता.

बति बस्केते अद कानुन मनोयो, अस्के अदेन बह्‍के मासि ताक्वल गिर मनो.

16 अदेन साटि, बगवंतनगा बरोसा इर्वडुन हिंदले, वोना पेर्मता-दयते अद वाग्दन पुटंता.

ते इद वाग्दन सिरिप दर्मता कानुन मंवलिर यूदुल्कुने आयो बति, अब्राहमुन दात बरोसा इर्वलिर सम्दिरकुन गिर अद पुटंता.

वोर अब्राहमे मा सम्दिरोर बाबो आंदुर.

17 इदेन बारेते, “नीकुन वेले जातिनुरकुन बाबो कींतोन”⁺ इन्जेर दर्मा-ग्रंत्नगा लिहि कीसि मंता.

बगवंतना नदुडे अब्राहम मा तोत्तोर बाबो आंदुर.

सातुरकुन नेंडुस्वल अनि सेले अदेन्गटल मंवडुन गडि किय्वल बगवंतनगा वोर बरोसा इर्तोर.

18-19 “नीवा संतांदुर वेलेटिर मंदंतेर”⁺ इन्जेर बगवंतल अब्राहमुन वेह्‍ता तीर जर्ग्ता.

अद गट्कते, वोन नूर (100) साल्क्ना वहि मत्ता.

वोना मेंदोडगा मरि-मियड आय्ले, जिगि सेले मत्ता.

अनि वोना वेय्लो सारल गिर डुगा डुगा आसि, मरि-मियड आय्वल वहि वीड्सि मत्ता.

ईतल आसा किया वायो अद गट्कते गिर, आसते अब्राहम, बगवंतना वाग्दंतगा बरोसा कीसेरेन ताक्तोर.

अदेन साटिने वोर वेले जातिनोर बाबो आया पर्तोर.

20 बगवंतल सीता वाग्दंतुन बारेते, वोर अनमिना आयन बद्लि, बरोसतगा बडे मासेर, बगवंतन डगुर-पान सीतोर.

21 बगवंतल तनकुन सीता वाग्दंतुन पूरि किया परंतोर इन्जेर बर्पुर बरोसा कीतोर.

22 इद बरोसतुन हिंदले, अब्राहमुन नियत्नोर इन्जि बगवंतल वोप्तोर.

23-24 इद गोस्टि, सिरिप अब्राहमुन साटिने दर्मा-ग्रंत्नगा लिहि कीसि सेले बति, मा साटि गिर लिहि कीसि मंता.

मावोर येसु पर्बुन नेंडुस्वल बगवंतनगा मरट बरोसा इर्सेर मंतट.

अदेन साटि, बगवंतल माकुन गिर नियत्नुरा लेकते येतंतोर.

25 बगवंतल मावङ पापकुन साटि मरन आय्ले, येसुन हव्लि कीतोर.

माकुन नियत्नुर इन्जेर वोप्ले, वोन नेंडुस्तोर.