रोमा 5

बरोसा सांति सींता

1 बगवंतल मावा बरोसतुन हिंदल, माकुन नियत्नुर इन्जेर वोप्तोर.

अदेन साटि, मा येसु किरिस्तु पर्बु कीततुन हिंदल, मरट बगवंतन सङा सांतिते मंतट.

2 बारितेके, येसुनगा इर्ता बरोसतुन हिंदल, बगवंतना पेर्मता-दयतगा ईसा येच्चि, गट निला पर्तट.

इदे आय्वा, बगवंतना मय्मतुन साटि आसते सूड्सेर, आनंद येच्चेर मंतट.

3 अचोरे आय्वा, मरट दुक्सङ गिर आनंद्ने बोगे मासेर मंतट.

बारितेके, दुक्सङ मावा वोर्च्वल गुंतुन बडि कींतङ.

4 इद वोर्च्वल गुन मह्‍गा चोकोट्ना गुंतुन बडि कींता.

इद चोकोट्ना गुन मह्‍गा मंवल आसतुन बडि कींता.

5 इद आसा माकुन नारज कियो.

बारितेके माकुन सीता पवित्रा आत्मतुन हिंदल, बगवंतल तंवा पेर्मतुन मा दिल्क्नगा बर्पुर वेडितोर.

6 बहन इत्तेके, पापिर आसि, मावा मरट मदत किया पर्वक मनेके, किरिस्तु बरोबर वकत्ने, मा साटि परन सिय्ले वातोर.

7 सिरिप कानुन पिय्सि बरोबर ताक्वन साटि, तम्वा परन सिय्वलिर वेले कमि मंदंतेर.

उंदि मोका बेय चोकोट ताक्वन साटि, बोरे वोरोर तंवा परन सिय्ले, दर्यम किया वचो.

8 बति मरट सम्दिर उंडे गिर पापेस्तलिर आसि मनेकेने, किरिस्तु मा साटि परन सीतोर.

इद तीर्दे, बगवंतल माकुन बचोर लाड कींतोर इंवल तोह्‍चेर मंतोर.

9 इंके किरिस्तु कीता नेतुडा अर्पनतुन हिंदले, मरट नियत्नुरा लेकते वातट.

अदेन साटि, बगवंतल आक्रिता तस्वा कीनेके, वोना सोङनल येसु माकुन तप्वक बचि कींतोर.

10 मरट बगवंतन पगा-दार्क आसि मनेकेने, तंवोर मरिना मरंतुन हिंदल, माकुन तन्गा तिरिसि मीरि कीतोर.

अदेन साटि, किरिस्तु पिस्ततुन हिंदल, मरट तप्वक बचे मांतट.

11 अचोरे आय्वा, मा येसु किरिस्तु पर्बुन हिंदल, बगवंतन सङा मीरे माया पर्तट अनि अदेनगा आनंद येच्चेर मंतट.

मरन आदामनल अनि बस्केट मंवल जीवा किरिस्तुनल वाता

12 आदम इंवल वोरोरे माय्नन हिंदल, इद दुनियतगा पाप वाता⁺ अनि पापुन हिंदल, मरन वाता.

इद मरन सम्दिर्गा पग्रे माता.

बारितेके, सम्दिर पाप कीसिन मंतेर.

13 इद पाप, मोसेना केय्दे दर्मता कानुन अंद्वक मनेकेडले, दुनियतगा मत्ता.

बति अस्के अद कानुन सेल्वा काड्कि, वूर कीतङ अव पाप्क, पाप्ना लेकतगा वाय्मकि.

14 आदम बगवंतल सीता आगे तीर ताक्मकि.

वोर कीतपिनय आय्वा, दुस्रो तरिकने सम्दिर पाप कीता काड्कि, वूर पोरो गिर मरन वाता.

ते पापुन हिंदल, वाता अद मरन आदमनल ते मोसे पर्वक्तन वेरि गिर अदिकार ताकुस्ता.

आदम बविसत्ने वाय्वल किरिस्तुना नमुना आसि मंतोर.^*

15 बति आदम्ना अनि येसुना काम्नगा वेले परक मंता.

आदम इंवल वोरोना गल्तितुन हिंदल, सम्दिर पोरो मरन वांता.

बति आदम कीता गल्तित तेर बगवंतल मा पोरो तोह्‍वल पेर्मता-दया बेय डगुर मंता.

इद पेर्मता-दया अनि बगवंतना पोकोट्ना वरम येसु किरिस्तु इंवल वोरोन हिंदल, सम्दिरकुन पुटंता.

16 बगवंतल सीता वरम अनि आदम कीता पाप्ना पंडि उंदि तीर सेलेङ.

बारितेके, उंदि पाप सम्दिर पोरो सिक्सा तचि वाड्ता.

बति मरट बेय वेले पाप्क कीतट तेर, बगवंतना वरम्ने नियत्नुरा लेकते वातट.

17 वोर आदम इंवल वोरोना पापुन हिंदल, मरन वासि, सम्दिर पोरो अदिकार ताकुसीता.

बति येसु किरिस्तु इंवल उंडे वोरोर बचोरो वेले कीतोर.

वोन हिंदले, बर्पुर पेर्मता-दया अनि नियत्नुर इंवल पोकोट्ना वरम येत्वलिर सम्दिर, पापुन अनि मरंतुन मेय्सि, पिसंतेर.

18 ते उंदिय पाप्ने, आदम सम्दिर पोरो सिक्सा तचि वाड्तोर.

अदे तीर्दे, येसु उंदिय जोका तंवा परन सीततुन हिंदल, सम्दिर नियत्नुरा लेकते वांतेर अनि पूना जिन्गनि पुटंता इन्जेर तोह्‍तोर.

19 बहन इत्तेके, बगवंतल वेह्‍ता तीर वोरोर ताक्वा काड्कि, सम्दिर पापेस्तलिर आतेर.

अह्‍ने बगवंतल वेह्‍ता तीर वोरोर ताक्ता काड्कि, वेलेटिर नियत्नुरा लेकते वांतेर.

20 बगवंतल दर्मता कानुन सियन मुनेतले लोकुर पाप कीसेर मत्तेर.

अव पापकुन करि कीसि, सुटि कीनिर इन्जेरेन कानुंतुन सीतोर.

बति पर्जतङ पाप्क वेले बडे मातङ.

अह्‍ने बगवंतना पेर्मता-दया गिर पापेस्तलिर पोरो उंडे अदिक बडे माता.

21 बहंते पाप अदिकार ताकुसि, लोकुर पोरो मरन तरंतयो, अह्‍ने बगवंतना पेर्मता-दया अदिकार ताकुसि, लोकुरकुन बस्केट मंवल जीवा पुटनल कींता.

अद बहन इत्तेके, मा येसु किरिस्तु पर्बुन हिंदल, नियत्नुर आसि, माकुन बस्केट मंवल जीवा पुटंता.