तंवा पेर्मता-दयते बगवंतल मावङ पापकुन मापि कींतोर
6
1 ‘बगवंतल मावङ पाप्क मापि कीसेर, मा पोरो तंवा पेर्मता-दया तोह्चेरेन मंदंतोर.
ते पाप कीसेरेन मंद्कट्’ इन्जेर मरट इंद्कट कि?
2 अहन असले इंवा!
बारितेके, अदिकार ताकुस्वल पाप्ना सक्ति, मा रोपोडल सासि सोडिता.
ते मरट उंडे गिर पाप कीसेर बहन पिसेर मंद्कट?
मंवा!
3 उंडे उंदि गोस्टि, मरट येसु किरिस्तुनगा बरोसा इर्ततुन तोह्ले, बाप्तिस्मा येत्तट अस्के, वोन बरोबर मरन आतट इंवल मीकुन टावय कि?
4 अनि अद बाप्तिस्मा मरट येत्वडुन हिंदल, येसुन बरोबर माति आतपिनय मंतट.
अदेन साटि, बाबो बगवंतल तंवा मय्मता सक्तिते किरिसतुन मरंतल नेंडुसीतपे, मरट गिर इंके, पूना जिन्गनिते पिसा परंतट.
5 मरट येसुना मरंतगा उंदि आतपे, वोर नेंड्ता पूना जिन्गनितगा गिर तप्वक उंदि आंतट.
6 बतल इत्तेके, मावा मेंदोडगा पाप तंवा अदिकार ताकुस्वडुन तोड-मोड कियन साटि, मावा पाप्ना जिन्गनितुन पिय्सि, येसुन बरोबर मोद्नगा मरन आतट इंवल माकुन टावा.
7 बारितेके बोरे आयि सातेके, वोर पाप्ना अदिकार्दल सुटे मांतोर.
8 ते मरट किरिसतुन बरोबर मरन आतट अनि वोन बरोबर पिसंतट गिर इन्जेर नमंतट.
9 बारितेके, किरिस्तु सासि-नेंड्ता पेजे, उंडे उंदि जोका मरन आयोर इन्जेर माकुन टावा.
वोन पोरो मरंतुन अदिकार सेले.
10 बारितेके, पाप्ना सक्तितुन पासि वाटन साटि, वोर उंदिय जोका परन सीतोर.
अनि नेंड्सि, इंके बगवंतन डगुर-पान सिय्ले, जीवते मंतोर.
11 अद तीर्दे, ‘ममोट पाप्ना गोस्टितुन हिंदल मरन आतोम.
बति बगवंतन सङा मंले, मा येसु किरिसतुन हिंदल नेंड्तोम्’ इन्जेर मिरट सम्जे माम्ट.
12 अदेन साटिने, मरन आय्वल मीवा मेंदोड पोरो अदिकार ताकुस्ले, पापुन वोप्मट.
तानङ आसनगा कोंडे माय्मट.
13 पाप अनि करब किय्वलिक वसतुन दात मीवङ मेंदोलकुन वाडकम किय्मट.
मीकुन मरंतल सुटि कियुसि, पूना जिन्गनि सीता काड्कि, बगवंतने मीवा मिरट बर्पुर हव्लि कीम्ट.
मिरट नियत्नङ काम्क किय्ले, मीवा मेंदोडा हर बागमुन बगवंतने हव्लि कीम्ट.
14 बारितेके, मिरट दर्मता कानुंता अदिकारदुन बूड सेल्विट.
बति बगवंतना पेर्मता-दयतुन बूड मंतिट.
अदेन साटि, पाप मी पोरो अदिकार ताकुसो.
बगवंतन आनंद सिय्वलिर दासिर
15 ते मिरट, ‘दर्मता कानुंता अदिकारदुन बूड सेलोम.
बति पेर्मता-दयतुन बूड मंतोम.
इङे पाप कीसेर मंद्कट्’ इन्जेर इंदा वचो.
अहन असले इंवा!
16 वोरोर मायनल उंडे वोरोनगा दासि आसि मंतोर इत्तेके, वोर माल्कल वेह्ता तीर, चाकोरा किया लागर इन्जेर मीकुन टावय.
पापुन दासिर आकिट्ते, मीकुन मरंता पंडि पुटंता.
बति बगवंतनुर दासिर आकिट्ते, वोर मीकुन नियत्नुर इन्जेर वोपंतोर.
17 बगवंतन नना दनेवाद वेह्चेर मंतोन.
बारितेके, मोदोल मिरट पापुन दासिर आसि मत्तिट.
बति इंके, मिरट केन्ज्तङ बोदन पिय्सि, मीवा दिलतगा बर्पुर वोप्सि, ताकंतिट.
18 अद तीर्दे, मिरट पाप्ना अदिकार्दल सुटे मासि, नियत्नङ काम्क किय्ले, बगवंतनुर दासिर आतिट.
19 इव सम्दिन अर्तम कीनल सक्ति मिह्गा सेल्वा काड्कि, नना सादरन नमुनङ येच्चि, वेह्चेर मंतोन.
इदेन मुने दासिर मोडि, मीवङ मेंदोलकुन पाप्ना केय्दे हव्लि कीता काड्कि, बे-सुदुड-पांदङ अनि करेबलिक काम्क वेले बडे मातङ.
बति इंके बगवंतनुर दासिर मोडि सुदुड-पांदङ अनि नियत्नङ काम्क किय्ले, मीवङ मेंदोलकुन हव्लि कीम्ट.
अस्के मिरट पवित्रा आंतिट.
20 मिरट पाप्नगा दासिर आसि मनेके, बगवंतन आनंद सिय्वल जुरत सेले मत्ता.
21 बति आतङ कामकुन हिंदल, मीकुन बतय पाय्दा पुट्ता कि?
बतय पुट्मकि!
अव मोदोल कीतङ कामकुन बारेते इंके लजे मासेर मंतिट.
आतङ काम्क आक्रित मरंतेकेने वोंतङ.
22 बति इंके, मिरट पाप्ना अदिकार्दल सुटे मासि, बगवंतनुर दासिर आतिट.
इदेन हिंदल, मिरट सुदुड आंतिट.
इदेना आक्रिता इनम मीकुन पुट्वल बस्केट मंवल जीवा आंद.
23 अनि पाप किय्वडा आक्रिता इनम मरन आंद.
बति मा येसु किरिस्तु पर्बुन हिंदल, बगवंतना पेर्मता-दयता वरम बस्केट मंवल जीवा माकुन पुटंता.