रोमा 7

आड-माड्सता नमुना

1 ना बरोबर्तुर यूदुल्क्ना जातितुर बक्तलिर्निट!

दर्मता कानुन मायनल पिसि मनल वेरिन, वोन पोरो अदिकार ताकुसंता इंवल मीकुन टावये.

2-3 नमुनत मर्मिना कानुंतुन पिय्सि, उंदि वेय्लो तंवोर माड्सो पिसि मनल वेरि, वोन बाय्को आसि मंदंता.

बति वोर माड्सो सानुर्ते, अद कानुन तीर वोन बाय्को आसि मंवडल सुटे मांता.

अस्के अद उंडे वोरोन तुङ्तेके गिर, तान पीर कीता इंनुर.

बति माड्सो पिसि मनेकेन, उंडे वोरोन सङा मंवल सुरु कीतेके, पीर कीता इन्जेर तान केयंतेर.

4 ना बरोबर्तुर बक्तलिर्निट!

अदे तीर्दे, मरट गिर किरिसतुन बरोबर सासि, दर्मता कानुंतल सुटे मातट.

सासि-नेंड्तोर वोर किरिसतुन सङा मरट उंदि आसि, बगवंतन साटि चोकोट्नङ काम्क किय्लेके, अहन जर्ग्ता.

5 बारितेके, मरट मोदोल मा रोपो मंवलिक मेंदोडङ करेबलिक आसने ताक्नेके, अव मा सङा पाप कियुस्तङ.

बति बस्केते दर्मता कानुंतुन करि कीतटो, मावङ करब आसङ बडे मासेर सोत्तङ.

इव माकुन मरंतेके ताकुस्तङ.

6 बति इंके, येसुन बरोबर मरट मरन आता काड्कि, अद कानुंता अदिकार्दल सुटे मातट.

अनि बगवंतना आत्मतुन हिंदल, पूना तरिकते वोना सेवा कीसेर मंतट.

बति लिहि कीसि मंवल कानुंतङ रीति-रिवजकुन पिय्सि, पडना तरिकते सेवा कीसेर सेल्वट.

पापुन सङा लडेय किय्वल

7 ते बतल इंद्कट?

दर्मता कानुन पाप्ना आंद इंद्कटिय?

अहन इंवा.

बारितेके नमुनत, “आजु-बाजुतोना बततुने आसा किय्वा”⁺ इन्जेर कानुंता आगे वेह्‍वक इत्तेके, अद पाप इन्जि माकुन करे मासि मनो.

8 बति अद कानुंता आगेतुन वाडकम कीसि, पाप, ना रोपो सम्दो तीर्क्नङ करब आसङ पुटुस्ता.

कानुन सेल्वेके पापुन जीवा मन्जि मनो.

9-10 उंदि गट्कते नना दर्मता कानुंतुन अर्तम किय्वक्ने पिस्तोन.

बति कानुंतगा मंवल नाकुन अर्तम आनेकेन, ना दिलतगा पाप पुड्ता.

ते नावा बक्तिता जिन्गनितुन निपुस्वल कानुंता आगे, अद जिन्गनितुन नासेडम किय्वल नना सूड्तोन.

11 बहन इत्तेके, अद आगेतुन पिय्सि, पापुन मोका पुड्ता.

ते अद नाकुन पसि कीसि, नावा बक्तिता जिन्गनितुन नासेडम कीता.

12 तेर बति, बगवंतनल कानुन वाता काड्कि, अद अनि तान्गा मंवल हर उंदि आगे पवित्रा मंता.

अव सम्दो गिर नायम्ने अनि चोकोट ताक्ले, कामि सींतङ.

13 ते अव चोकोट ताक्ले, कामि सिय्वलिक नावा परन वोतङ कि?

असले वोय्मकि.

अद पाप कानुंतङ मदत किय्वलिक आगेन वाडकम कीसि, नावा जिन्गनितुन नासेडम कीता अनि तंवा करेबल गुंतुन बह्‍रि अरुस्ता.

अदेन साटि, कानुंता आगेतुन पिय्सि, अद पाप बचोर करेबल आंदुयो, करि किया वचो.

बगवंतना कानुन मावङ पापकुन तोहंता

14 अद दर्मता कानुन बगवंतनल वाता काड्कि, अद चोकोट्ना आंद इन्जेर माकुन टावा.

बति नना सादरन माय्नना आंदुन.

नना पापुन दासिना आसि, पाप कीसेरेन मंतोन.

15 नना किय्वल नाकुन अर्तम आसेर सेले.

बारितेके, नना कीका इंवल कीसेर सेलोन.

बति बदेंते किय्वा इंतोनो, अदेने कीसेर मंतोन.

16 नावा मन-दिल नना किय्वल तप इन्जेर वेहर्ते, नना कानुंतुन चोकोट्ना इन्जेर वोप्तोन इंवडुन अद तोहंता.

17 बति अहन तप किय्वना नना आयोन.

ना रोपो मंवल पापे, अहन कियुसेर मंता.

18 हो करलेने, बद्ते चोकोट्ना काम कियना इंतोनो, अदेन किया पर्सेर सेलोन.

ना दिलतुन रोपो जरा गिर चोकोट्ना सेले.

ना मेंदोडगा मंवलिक करेबलिक आसङ नाकुन पाप कियुसेर मंतङ.

19 बति नना कीका इंवल चोकोट्ना कामुन बद्लि, किय्वा इंवल करब कामुने कीसेर मंतोन.

20 इहिन नना तप कीसेर मंतोन इत्तेके, अहन किय्वना नना आयोन.

बति ना रोपो मंवल पापे अहन कियुसेर मंता.

21 ते नना जिन्गनिता उंदि नियम मंता इंवल करि कीतोन.

अद बतल इत्तेके, ना रोपो मंवल करेबल गुन चोकोट किय्वडुन बद्लि, बस्केट वायुट कियुसेर मंता.

22 ना रोपोडा मन-दिल बगवंतना कानुंतुन पसंद कीसेर मंता.

23 बति नावा मेंदोडगा मंवल करेबल गुन ना रोपोडा मन-दिलतुन सङा लडेय कीसेर मंता.

अद गुन नावा मेंदोडगा मंवल पाप्ना केय्दे, नाकुन हव्लि कीसेर मंता.

24 अय्यो!

नना बेय तक्लिब्नगा कोंडे मासि मंतोन.

मरन आय्वल इद मेंदोडल नाकुन बोर बचि कीनुर?

25 इद बचि किय्वल कार्यतुन मा येसु किरिस्तु पर्बुन हिंदल, कियुस्वल बगवंतने दनेवाद वेह्‍चेर मंतोन.

ते ना रोपो मंवल आत्मा बगवंतना कानुंतुन पिय्सि ताकुस्ले सूडंता.

बति ना मेंदोडगा मंवलिक करेबलिक आसङ ना केय्दे पाप्ना सेवा कियुसेर इर्ले सूडंतङ.^*