आत्मता सक्तिते पिस्वल
8
1 अदेन साटि इंके, येसु किरिस्तुनगा येकि आसि मंवलिरकुन, बगवंतल सिक्सा कियोर.
2 बारितेके, बगवंतना आत्मा येसु किरिसतुन हिंदल, माकुन पूना जिन्गनि सीता.
मावङ पाप्क अनि मरंता सक्तितल अद आत्मता सक्ति माकुन सुटि कियुस्ता.
3 मा करेबलिक आसन हिंदल, दर्मता कानुन बततुंते पूरि किया पर्मकियो, अदेन बगवंतल पूरि कीतोर.
अदेन साटिने, तंवा जीवता अर्पना कीसि, मा पापकुन कंडि किय्ले, बगवंतल तंवोर मरिन माय्नना रूप्ने सारि कीतोर.
इद तीर्दे, बगवंतल येसुना मेंदोडुन हिंदल, मा पापुन सिक्सा वाड्तोर.
4 ते मा मेंदोडङ करेबलिक आसन पिय्सि ताक्वक्ने, बगवंतना आत्मा वेह्ता तीर ताक्ता काड्कि, कानुंतुन पिय्सि ताक्तुरा लेकते वांतट.
इहिन पूना तरिकते कानुंतङ आगेन पूरि किय्वलिर आंतट.
5-6 बूर्ते तम्वा मन-दिल्ता बक्तितगा बगवंतना आत्मा वेह्ता तीर ताकंतेरो, वूरकुन बस्केट मंवल जीवा अनि सांति पुटंता.
बति बूर्ते करेबलिक आसन बारेते सोन्च कीसेर पिसंतेरो, वूर तम्वङ गुनकुन पिय्सि मरंता सर्दे दांतेर.
7 अदेन साटि, बूर्ते तम्वा मंदे वाता तीर करेबलिक आसन पिय्सि ताकंतेरो, वूर बगवंतन उल्टा ताक्तुर आंतेर.
आतुरा मन बगवंतल सीता दर्मता कानुंतुन वोपो अनि ताना सतुन पिय्सि ताको.
8 इहिन करेबलिक आसङ पिय्सि ताक्वलिर, बगवंतन आनंद सिया परुर.
9 बति बगवंतना आत्मा मी रोपो मत्ता काड्कि, अद वेह्ता तीर मिरट ताकंतिट.
अचोरे बति, करेबलिक आसङ पिय्सि ताक्विट.
बूर्गते अद आत्मा मनोयो, वूर किरिस्तुनुर आयुर.
10 पापुन पिय्सि मी मेंदोल साता.
बति किरिस्तु मी रोपो मत्ता काड्कि, मीवा आत्मा पिसिन मंता.
बारितेके, बगवंतल मीकुन नियत्नुरा लेकते येत्तोर.
11 बगवंतना आत्मा मी रोपो मत्ता काड्कि, येसु किरिसतुन मरंतल नेंडुस्तोर वोर बगवंतल, मरन आय्वलिक मीवङ मेंदोलकुन गिर तंवा आत्मतुन हिंदल, पिसुसंतोर.
12 अदेन साटि, ना बरोबर्तुर बक्तलिर्निट!
मरट मावङ करेबलिक आसन पिय्सि, पिस्वल जुरत सेले.
13 बारितेके, बूर्ते करेबलिक आसन पिय्सि पिसंतेरो, वूरा मरन आंता.
बति बूर्ते बगवंतना आत्मते अव आसन जकंतेरो, वूर पिसंतेर.
14 सिरिप बूर्ते बगवंतना आत्मा वेह्ता तीर पिसंतेरो, वूर बगवंतनुर मरि-मियड आंतेर.
15 बहन इत्तेके, मिह्गा मंवल आत्मा वेरुसेर दासि-पांदे इर्वल आयो.
बति अद माकुन बगवंतनुर मरि-मियड कीता.
अनि इदेन हिंदल बगवंतन, “मा बाबगो!
बाबगो!”
इन्जेर केय्ले माकुन दर्यम सीता.
16 अद आत्मये मरट बगवंतनुर मरि-मियड आंदट इन्जेर, मावा आत्मतुन सङा गवा वेहंता.
17 इहिन मरट बगवंतनुर मरि-मियड आता काड्कि, वोनोर मरि किरिसतुन बरोबर ईसदार्क गिर आंतट.
मरट वोर किरिसतुन दात दुक्सङ बोगे माकट्ते, वोन बरोबर मय्मा गिर माकुन पुटंता.
माकुन बविसत्ने पुट्वल मय्मता डगुर-पान
18 इंके मरट बोगे माय्वलिक दुक्सङ, माकुन बविसत्ने पुट्वल मय्मतगा जरा गिर लेकते वायोङ.
19 बगवंतनुर मरि-मियड आय्वल माकुन, वोर बगवंतल बस्के डगुर-पान सीनुर इन्जेर, कलितगा मंवल सम्दो गिर बेय आसते सूड्सेर मंता.
20 बारितेके कलिता इचा तीर आयो बति, बगवंतल तंवा इचा तीर कलितगा मंवल सम्दोतुन सापेना सीतोर*.
21 ते कलितगा मंवल सम्दो सडे मासेर मंता.
अदेन साटि, अद सडे माय्वडल सुटे मासि, बगवंतना मरि-मियडुन बरोबर मय्मता डगुर-पांदुन येत्ले, कलि सम्दो आसते सूड्सेर मंता.
22 ते इंके वेरि, कलि सम्दो गिर दिवोस्क मंवल वेय्लो नोपिते तल्मेले मातपिनय, तल्मेले मासेर मंता इंवल माकुन टावा.
23 अद कलिये आय्वा, बगवंतल सीता पवित्रा आत्मतुन मोदोल येत्वलिर मरट गिर तल्मेले मासेर मंतट.
बारितेके, पाप्ना केय्दल मावङ मेंदोलकुन सुटि कियुसि, तंवा वोटिते बगवंतल माकुन येतना इन्जेर, अद दिवोसुन साटि, आसते सूड्सेर मंतट.
24 बगवंतल माकुन बचि कीतोर अस्के, मा रोपो इद आसा पुड्ता.
उंदि मोका मरट आसा कीसेर मंतट इत्तेके, माकुन पुट्मकि अदेन बारेतेन आसा कींतट.
तम्गा मंवडुन साटि बूरे गिर आसा कियुर.
25 बति मह्गा सेले अद वस्तुत साटि* आसते वोर्चि, सूड्सेर मंदंतट.
26 अदे तरिकते मावा मन-दिल अविसि मत्ता काड्कि, पवित्रा आत्मा माकुन सात सीसेर मंता.
बारितेके, मरट बहन पार्तना कियना इंवल माकुन टावा सेले.
बति माकुन इंदा वायो आतङ गोस्टिने, मा बद्लि, पवित्रा आत्मा तनय तल्मेले मासेर, बगवंतन विनंति कीसेर मंता.
27 इहिन बगवंतना इचा तीर, वोनुर बक्तलिर साटि, विनंति कीसेर मंता.
बारितेके, नरिमन्कना दिलतगा मंवल अनि पवित्रा आत्मा बतल वेह्चेर मंता इंवल गिर बगवंतन टावा.
बगवंतना पेर्मतल माकुन बदे अलग किया परो
28 बूर्ते बगवंतल केय्नेकेन वोप्तेरो, वूरे वोन पेर्मा किय्वलिर आंदिर.
वूरकुन सम्दो चोकोट जर्गन साटि, वोर बगवंतल तंवा इचा तीर उंदित पेजेय उंदि सम्दोन जर्गुसेर मंतोर इंवल माकुन टावा.
29 बहन इत्तेके, मोदोल आच्तुर वूर, तंवोर मरि येसुन मोडि मारियना इन्जेर बगवंतल निर्नय कीतोर.
तंवुर मरि-मियडगटल वोर मरि मडनोर आयना इन्जेरेन इहिन जर्गुसीतोर.
30 अनि बगवंतल बूरकुन ते मोदोल निर्नय कीतोरो, वूरकुन केय्तोर.
बूरकुन ते केय्तोरो, वूरकुन नियत्नुर इन्जेर वोप्तोर.
बूरकुन ते नियत्नुर इन्जेर वोप्तोरो, वूरकुन मय्मा सींतोर.
31 इद सम्दो मा साटि, बगवंतले कीतोर इन्जेर करे मातेके, करलेन मावङ दिल्क बक्तितगा बडे मांतङ.
बगवंतले मा बाजुन मत्तेके, माकुन बोर मेया परंतोर?
बोरे मेया परोर!
32 बगवंतल तंवोर मरिन तन्गन इर्मकि बति, मा सम्दिर साटि वोन अर्पना सिय्ले वोप्तोर.
वोर बगवंतल तंवोर मरिने, मा साटि सीतोर इत्तेके, माकुन पह्जे मत्तङ सम्दो पोकोट सियोर इंतिट कि?
तप्वक सींतोर.
33 बगवंतल नेमि कीतुर वूर पर्जा गल्ति कीतेर इन्जि, वूर पोरो बोर पिरदि कींतेर?
बोरे कियुर.
बारितेके, बगवंतले कुद वूरकुन नियत्नुर इन्जेर वोप्तोर.
34 अहन वोप्ता पेजे, मरट गल्ति कीतट इन्जेर बोरे इंदा परनुर कि?
बोरे इंदा परोर.
येसु किरिस्तु मा साटि, परन सीतोर.
अचोरे आय्वा वोर नेंड्सि, इंके बगवंतना तिना बग्ला* उच्चि, मा साटि पार्तना अनि विनंति कीसेर मंतोर.
35 ते इद किरिस्तुना पेर्मतल माकुन बदे दुक्सय आयि, तक्लिब आयि, करुय आयि, गरिब-पान आयि, गंडम आयि, मरने आयि पाकि किया परनुङ कि?
असले पाकि किया परोङ.
36 इदेन बारेते,
“ये बगवंता!
ममोट नीवुर आता काड्कि,
बस्केट माकुन जक्ले, सूड्सेर मंतेर.
वूर अस्क्वलिक गोरेन दात माकुन सम्जे मासेर मंतेर”+
इन्जेर दर्मा-ग्रंत्नगा लिहि कीसि मंता.
37-39 मरन सेलेके पिस्वले आयि, बगवंतनुर दूतलिर सेलेके बूत्के आयि, इंके मंवलिक सेलेके बविसत्ने वाय्वलिके आयि, हाबडगा पोरो मंवलिक वस्तुङे आयि, बोमित पोरो सेलेके बोमित बूड मंवलिक वस्तुङे आयि, बवे सक्तिङे आयि, कलितगा गडे मासि मंवलिक दुस्रोक बवे गिर आयि बति, येसु किरिस्तु पर्बुन हिंदल, माकुन पुट्वल बगवंतना पेर्मतल अलग किया परोङ.
माकुन पेर्मा किय्वल बगवंतन हिंदल, इव सम्दिन बर्पुर मेया पर्सेर मंतट.