रोमा 9

बगवंतल अनि तना नेमि कीतुर लोकुर

1-3 इंके बगवंतना पेर्मतल माकुन बवे गिर अलग किया परोङ.

ते ना सोंता जातितुर यूदुल्क बगवंतनल बारि अलग आयना?

असले आय्वा!

वीर साटि नावा दिलतगा बस्केट मारो अद दुक्सा अनि तक्लिब मंता इन्जेर, किरिस्तुनोर बक्तल आय्वल नना वेह्‍चेर मंतोन.

वीर ना सोंता जातितुरकुन बचि किय्ले, बगवंतल नाकुन बस्केट सापेना सीतेके गिर बतय आयो सेलेते किरिस्तुनल नाकुन अलग कीतेके गिर बतय आयो इंवले नावा इचा.

इद लबड आयो, सतेमे आंद इन्जेर, नावा मन-दिलतगा मंवल पवित्रा आत्मा गिर गवा वेह्‍चेर मंता.

4 वीर ना सोंता जातितुर इज्रयेल देस्नुर संतान^* आंदिर.

बगवंतल वीरकुन तंवुर मरि-मियड इन्जेर नेमि कीतोर.

⁺ वीरकुन तंवा मय्मता सक्तितुन तोह्‍तोर.

तंवङ नियम्क वीर्गा हव्लि कीतोर.

वीरा केय्देने तंवा कानुन अनि तंवङ वाग्दन्क सीतोर.

अनि तनकुन बहन पार्तना-विंति कियना इंवल वीरकुन तोह्‍तोर.

5 अब्राहम, इसक अनि याकोब इंवलिर तादुर-बाबुर गिर वीरुरे आंदिर.

वीरा कांदांतगन किरिस्तु माय्नना रूप्ने जल्मा आतोर.

⁺ अनि वेर किरिस्तुये सम्दोतुन ताकुस्वल अदिकार वाले बगवंतल आंदुर.

सम्दिर वेने बस्केट हेतु कीसेर, डगुर-पान सियना.

आमेन!

6 बगवंतल तना सीता वाग्दन तप्तपिनय आयो.

बारितेके, इज्रयेल्ता कांदांतुर सम्दिर, बगवंतनुर करल मरि-मियड आयुर.

7 अह्‍ने अब्राहम मिय्तुर, सम्दिर वोना संतांदा लेकते वायुर.

बारितेके दर्मा-ग्रंत्नगा, “सिरिप इसके नीवोर मरि आंतोर.

अनि वोन हिंदल साङ्ता वेलिये, नीवा संतांदा लेकते वांतेर”⁺ इन्जेर मंता.

8 इदेना अर्तम सादरन मेंदोडा रूप्ने अब्राहम मिय्तुर वूर बगवंतनुर मरि-मियड आयुर.

बति वाग्दन सीततुन हिंदल, अब्राहम मिय्तुर वूरे करल वोनुर मरि-मियडा लेकते वांतेर.

9 इदेन बारेते बगवंतल, “वाय्वल साल इद गट्कते निह्‍गा मल्सि वानेके, सारल मोड्डन जल्मा सीसि मंदंता”⁺ इन्जेर अब्राहमुन वाग्दन सीतोर.

वेर मोड्डना पोरोल इसक.

10 अदे तीर्दे उंडे उंदि गोस्टि, वोर इसक मा तोत्तोर बाबो आंदुर.

अनि रिब्कन वोर तुङ्ता पेजे, अद येसवु अनि याकोब इंवलिर येमलिरकुन जल्मा सीता.

11-12 वूर येमलिर पुट्वक मनेके, अनि वूर चोकोट-वायुट किय्वक मनेकेने बगवंतल रिब्कन सङा, “मडनोर, सेव्टतोना सेवा कींतोर”⁺ इन्जेर वेह्‍तोर.

माय्नलिरङ कामकुन पिय्सि आयो बति, तंवा पिलंतुन पिय्सि, वूरकुन नेमि कींतोर इंवल तोह्‍लेने बगवंतल अहन जर्गुसीतोर.

13 इदेन बारेते, “नना याकोबुन लाड कीतोन.

बति येसवुन किय्मकि”⁺ इन्जेर लिहि कीसि मंता.

14 इदेन पिय्सि मरट, ‘बगवंतल अनेलम कीतोर्’ इन्जेर इंद्कट कि?

असले इंवा.

15 बारितेके बगवंतल, “नाकुन पसंद वातुर वूर पोरो नना दया तोहंतोन अनि पसंद वातुर वूर पोरो नाकुन किवुल वानल कींतोन”⁺ इन्जेर मोसेन वेह्‍तोर.

16 ते बोन पोरो दया तोहना इंवल बगवंतले निर्नय कींतोर.

तान साटि मरट इचा कीतेकेन आयि, सेलेके तान साटि पर्पेडे मासेर काम कीतेकेन आयि अद माकुन पुटो.

17 बारितेके परो राजन सङा, “नी पोरो नावा सक्तितुन तोह्‍ले अनि नावा पोरोल दुनियतगा पग्रे माय्ले, नना नीकुन राजा-गादितगा उपुसीतोन”⁺ इन्जेर बगवंतल दर्मा-ग्रंत्नगा वेह्‍तोर.

18 ते बगवंतल बोन पोरोते दया तोह्‍का इंतोरो, वोन पोरो दया तोहंतोर अनि बोनते दिलतुन किवुल लाग्वक कीका इंतोरो, वोना दिलतगा अहन कींतोर.

तंवा इचा तीरे, इहिन जर्गुसंतोर इंवल माकुन टावा.

बगवंतना सोङ अनि दया

19 ते मिरट नाकुन, “बगवंतले अहन कियुस्वल बेहेते, वोन बोरे उल्टा आया परोर.

ते अस्के तप कीतेर इन्जेर मा पोरो बगवंतल बहन कसुर वाटा परनुर?”

इन्जेर पूसि किया वचो.

20-21 बति ये दादलिर-बायिक्निट!

कुंमल उंदिय चिक्ला गोंडतल उंदि बुड्डितुन काय्दा वीडुस्ले अनि उंडे उंदि बुड्डितुन सादा काम किय्ले, तयर कींतोर.

अहन किय्ले वोन अदिकार सेले कि?

तप्वक मंता!

ते, “माकुन इहिन बारि गडि कीति?”

⁺ इन्जेर सिरिप नरिमन्कलिर आय्वलिर मरट माकुन गडि किय्वल बगवंतन, पूसि किया वचो कि?

असले पूसि किया वायो!

22 अदे तीर्दे, नास आय्ले, तयर मंवलिर सम्दिर पोरो, बगवंतल तंवा वेले सोङुन तोह्‍चि, सिक्सा किय्वल अदिकार करलेन वोन मंता.

बति इदेन बद्लि, वूरकुन वोर्चेर मंतोर.

23 इहिन बारि कींतोर इत्तेके, गिंति किया परुर अद तंवा डगुर-पान अनि तंवा मय्मतगा ईसा येत्ले, तोलेने नेमि कीतुर पोरो दया तोह्‍चेर मंतोर.

24 अनि यूदुल्क्ना जातितले आय्वा, यूदुल्क आयुर वूर्गटल मंवलिर मा सम्दिरकुन गिर, तंवा साटि नेमि कीतोर.

25 यूदुल्क आयुर वूर बारेते, होसेया पर्वक्तल लिहि कीता ग्रंत्नगा,

“नावा पर्जा आयुर वूरकुन,

नावा पर्जा इन्जेर केयंतोन.

नना मोदोल पेर्मा किय्मकि वूरकुन

नावा पेर्मा तोहंतोन”⁺

इन्जेर बगवंतल लिहि कियुस्तोर.

26 अचोरे आय्वा, “‘मिरट ना पर्जा आय्विट’

इन्जेर इत्ता जागतगने,

‘जीवते मंवल नावुर मरि-मियड’ इन्जि मीकुन केयंतोन”⁺

इन्जेर बगवंतल वेह्‍चेर मंतोर.

27 अनि येसया पर्वक्तल गिर यूदुलकुन बारेते,

“इज्रयेल्ता संतान सम्दुर्ता उस्के कडकुन दात मत्तेके गिर,

सिरिप कहितुरे बचे मांतेर.

28 बारितेके बगवंतल दुनियतुर सम्दिरकुन वाट्का इत्ता अद सिक्सा

कोरुम किय्वक्ने वाटंतोर”⁺

इन्जेर पचर कीतोर.

29 इवेन पचर कियन मुने येसया पर्वक्तल,

“स्वर्ग्ना दलम्नोर पर्बु^* कहितुरकुन मा साटि सुटि किय्वक इत्तेके,

मरट सोदोमा अनि गोमोरा नगुक्नुर नासेडम आतपिनय नासेडम आंदट”⁺

इन्जेर वेह्‍चि मत्तोर.

चोकोट्ना कबुर अनि यूदुल्क्ना जाति

30 ते मरट बतल इंद्कट?

नियत्नुर आय्ले कोसिद किय्मकि वूर, यूदुल्क आयुर वूर पर्जा नियत्नुरा लेकते वातेर.

इद सिरिप किरिस्तुनगा इर्ता बरोसतुन हिंदले जर्ग्ता.

31 बति दर्मता कानुंतुन पिय्सि, नियत्नुर आकोम इन्जि कोसिद किय्वलिर यूदुल्क्ना जातितुर नियत्नुर आया पर्मकि.

32-33 बारितेके, वूर बरोसते आय्वा, कानुंतङ काम्क कीसि, नियत्नुर आय्ले सूड्तेर.

इदेन बारेते,

“इचुला!

नना सियोंतगा^* बंडत दात्नोन इर्सेर मंतोन.

अदेन साटि, वोन हिंदल वेलेटिर कोदा पासि अरंतेर.

बति बूर्ते वोन पोरो बरोसा इरंतेरो,

वूरा बरोसा टूटे मायो अनि वूरा हिजत गिर सोनो”⁺

इन्जेर येसया पर्वक्तल लिहि कीतोर.

अदेन साटि, वूर लोकुर अद कोदा पाय्वल बंडतगा कोदा पासि अर्तेर.

किरिस्तु अद बंडत दात्नोर आंदुर.