वचंतुन पोरो बरोसा इर्तेके माकुन बचि कींता
10
1 दादलिर-बायिक्निट!
बगवंतल नावुर इज्रयेल लोकुर्कुन* बचि कियना इन्जेर नना बर्पुर दिल्ते पार्तना कीसेर मंतोन.
2 वूर बेय आसते बगवंतना सेवा कीसेर मंतेर इन्जेर गवा वेहा परंतोन.
बति बद तरिकते वोना सेवा कियना इंवल, वूरकुन टावा सेले.
3 बहन इत्तेके, बगवंतल बद तरिकते लोकुरकुन पवित्रा अनि नियत्नुर कीसि वाटंतोर इंवल वूरकुन टावा सेले.
अदेन साटि, तम्वङ नेकि-बदिङ पिय्सि, नियत्नुर आय्ले कोसिद कीता काड्कि, बगवंतना सरदुन वूर वोप्मकि.
4 बति किरिस्तु तन्गा बरोसा इर्वलिर सम्दिरकुन नियत्नुर इन्जेर वोप्सि, दर्मता कानुंता उदेसुन पूरि कीतोर.
अहन नियत्नुर आय्ले, अद कानुंतुन पिय्सि ताका लागर इन्जेर वेह्वल गोस्टितुन पासि वाड्तोर.
पाप्ना सिक्सतल सम्दिर बचे माया वचो
5 अदेन साटि बोर्ते मोसेना कानुंतुन पिय्सि, नियत्नोना आका इंवल, पूरो कानुंतुन पिय्सि ताका लागर.
अस्केन वोर पर्वक्तल लिहि कीता तीर पिस्वल आंतोर.+
6-7 बति बरोसतुन हिंदल, पुट्वल नियतुन बारेते, “बचि किय्वल किरिसतुन तर्ले, स्वर्ग्नगा तेर्ग्सि, बोर दानुर?
सेलेके किरिसतुन मरंतल नेंडुसि तर्ले, अंत-लागो अद कोल डोडोतगा रेय्सि, बोर दानुर?”
+ इन्जेर मिरट पूसि किय्मट.
बारितेके, बचि किय्वल किरिस्तु, इदेन मुनेने मह्गा वातोर.
अनि बगवंतल वोर किरिसतुन मरंतल नेंडुस्तोर.
8 इद बचे माय्वडुन बारेते, “अद वचन मिह्गा मंता.
अद मीवा तोड्दगा अनि मीवा दिल्तगन मंता”+ इन्जेर दर्मा-ग्रंत्नगा मंता.
ममोट गिर, अद बरोसता वचंतुन बारेतेन वेह्चेर मंतोम.
9 अद बतल इत्तेके, येसु पर्बुये मा माल्कल* आंदुर इन्जेर मा तोड्दे वोप्सि, बगवंतल वोन मरंतल नेंडुस्तोर इन्जेर, मा दिलतगा बरोसा कीतेकेन, मरट बचे मांतट.
10 बारितेके, मरट दिलतगा बरोसा कीततुन हिंदल, बगवंतल माकुन नियत्नुरा लेकते येतंतोर.
अनि मरट तोड्दे वोप्ता काड्कि, बचे मांतट.
11 इदेन बारेते दर्मा-ग्रंत्नगा, “बूर्ते वोन पोरो बरोसा इरंतेरो, वूरा बरोसा टूटे मायो अनि वूरा हिजत गिर सोनो”+ इन्जेर लिहि कीसि मंता.
12 बरोसा इर्वडगा यूदुल्क्ना जातितुर अनि यूदुल्क आयुर वूर* इन्जेर तेडा सेले.
दुनियतुर सम्दिरकुन वोरोरे पर्बु आय्वल बगवंतल मंतोर.
तनकुन पार्तना किय्वलिर सम्दिरकुन बर्पुर आसिर्वाद सिय्वल वोरे आंदुर.
13 बहन इत्तेके, “बगवंतना पोरोल मुट्सि, पार्तना किय्वल हर वोरोर बचे मांतोर”+ इन्जेर दर्मा-ग्रंत्नगा लिहि कीसि मंता.
14 बति वोन्गा बरोसा इर्वक्ने माकुन बचि कीम इन्जेर, वूर बहन पार्तना किया परंतेर?
असले पार्तना किया परुर!
ते वोन बारेते केन्ज्वक्ने, वूर बहन वोन पोरो बरोसा इरा परंतेर?
असले बरोसा इरा परुर!
ते बोरे वेह्वक्ने, वोन बारेते वूर बहन केन्जंतेर?
असले केन्जा परुर!
15 ते बगवंतल बोने रोह्वेके वूर्गा सोन्जि, वोर बहन वेहा परंतोर?
असले वेहा परोर!
इदेन बारेते दर्मा-ग्रंत्नगा, “बोरे चोकोट्ना कबुर पिय्सि, वाय्वन सूड्तेके मरट बेय आनंद येतंतट”+ इन्जेर लिहि कीसि मंता.
16 बति अद कबुडुन केन्चि, सम्दिर वोप्मकि.
इदेन बारेते, दर्मा-ग्रंत्नगा येसया पर्वक्तल, “बगवंता!
ममोट वेह्ता कबुडगा बोरे बरोसा इर्मकि”+ इन्जेर बगवंतन सङा इत्तोर.
17 वूर किरिसतुन बारेता चोकोट्ना कबुडुन पचर कींतेर.
अद कबुर केन्ज्वडुन हिंदल, पर्जा वोन्गा बरोसा इरंतेर.
18 ते यूदुल्क्ना जातितुर चोकोट्ना कबुर केन्ज्मकि इन्जेर सोन्च कींतिट कि?
वूर तप्वक केन्ज्तेर इन्जि नना वेहंतोन.
इदेन बारेते,
“वूर वेह्ता कबुर पूरो दुनियतगा केन्जा वाता.
वूरङ गोस्टिङ दुनियतङ नालुङ कोन्क्नगा पग्रे मातङ”+
इन्जेर दर्मा-ग्रंत्नगा लिहि कीसि मंता.
19 इव गोस्टिङ वूर यूदुलकुन अर्तम आय्मकि इंतिट कि?
वूरकुन तप्वक अर्तम आतङ इन्जि, नना वेहंतोन.
तोले दर्मा-ग्रंत्ना कानुंतगा मोसे,
“यूदुल्क्निट!
नना यूदुल्क आयुर वूरकुन लाड किय्वल सूड्सि,
मिरट कुटा कुटा आंतिट.
नाकुन करि किय्मकि वूर यूदुल्क आयुर वूरकुन,
नना चोकोट सूड्वल सूड्सि,
मिरट सोङ आंतिट”+
इन्जेर यूदुल्क आयुर वूर बारेते लिहि कीतोर.
20 अनि दर्मा-ग्रंत्नगा बगवंतल, यूदुल्क आयुर वूर बारेते,
“नाकुन मह्कुर वूरकुन नना पुट्तोन.
नाकुन पूसि कियुर वूरकुन, ननये कुद पावे मातोन”+
इन्जेर वेह्तङ गोस्टिन येसया पर्वक्तल दर्यम्ने वेह्तोर.
21 बति यूदुलकुन बारेते,
“नाकुन मानि किय्वक मंवलिरकुन अनि मर्ला बड्वलिरकुन,
करुम कीका इन्जि, हर दिवोस सूड्सेर मत्तोन”+
इन्जेर बगवंतल वेह्तोर.