रोमा 11

बगवंतल सम्दिर पोरो दया तोहंतोर

1 ते बगवंतल तना नेमि कीता इज्रयेल पर्जतुन वोप्मकि इंतिट कि? अहन असले इन्मट. नना गिर इज्रयेल देस्नोनय आंदुन. अब्राहम्ना संतांदोना अनि बेन्जमींता कांदांतोना आंदुन. 2-3 तनकुन मुनेतले टावा मंवल पर्जतुन बगवंतल सुटि किय्मकि. मंवल इद गोस्टितुन बारेते मीकुन टावये. अद बतल इत्तेके, इज्रयेल पर्जत पोरो येलिया , “ये बगवंता! वूर नीवुर पर्वक्तलिरकुन जक्तेर. नी साटि बलिदान सिय्वलिक बोव्लन उल्टि कीतेर. नीवा सेवा किय्वलिर्गटल नना वोरोनय मेय्सि मंतोन. अनि इंके नाकुन गिर, वूर जक्ले सूड्सेर मंतेर” इन्जेर बगवंतन पिरदि कीतोर. 4 अस्के बगवंतल, “अद बयलु इंवल पेंदुन काल कर्मकि वूर, येडुङ हजर्क (7,000) मांदितुन ना साटि अलग कीसि इर्तोन” इन्जेर येलियन वेह्‍तोर.

5 अदे तीर्दे इंके गिर, बगवंतल तंवा पेर्मता-दयतुन हिंदल, तंवा गोस्टि तीर पिस्वलिर कहितुर यूदुलकुन नेमि कीसि इर्तोर. 6 इहिन नेमि कीसि इर्वल, वूर कीतङ कामकुन हिंदल आयो बति, बगवंतल तोह्‍ता पेर्मता-दयतुन हिंदल पोकोटे जर्ग्ता. अहन जर्ग्वेके, पेर्मता-दयतुन अर्तमे मन्जि मनो.

7 इदेना बाव बतल इत्तेके: बगवंतना नदुडे नियत्नुर आयना इन्जि, इज्रयेल पर्जा आसते कोर्ता तीर वूर आया पर्मकि. बति बगवंतल सिरिप कहितुरकुन नेमि कीसि, नियत्नुर इन्जेर वोप्तोर. बारितेके बगवंतल इज्रयेल देस्नगा मंवलिर मेय्तुर तंवा गोस्टित वोप्वक्ने मूजोर्क आनल कीतोर.

8 इदेन बारेते,

“बगवंतल वूरङ मन-दिलकुन सातपिनय नर्मुस्तोर.

वूर सूडंतेर बति वूरकुन दिसो.

केन्जंतेर बति वूरकुन अर्तम आयो.

इंके गिर वूर लोकुर अदे तीर्दे मंतेर”

इन्जेर लिहि कीसि मंता.

9 दाविद राजल तंवुर पगा-दारकुन बारेते,

“ये बगवंता! ‘आनंद्ने मंतोम, तिन्कट अलेट!’ इंवल गट्कते,

वूर डाप्कनगा अनि जार्क्नगा उर्तपिनय बेय सप्ने उरिर.

वूर कोदा पासि डोडोतगा अरिर.

वूरङ पाप्क्ना सिक्सता वजंतुन वूरे तोचिर.

10 सतेमुन बारेते अर्तम कियुर वूर गुड्डिर दात आयिर.

हर गट्का वूर काया-कस्टम्ने वरिसि मनिर”

इन्जेर दर्मा-ग्रंत्नगा लिहि कीतोर.

यूदुल्क आयुर वूर बचे माय्वल

11 ते नना मीकुन पूसि किय्वल बतल इत्तेके, यूदुल्क करलेन तेदा पर्वक कोदा पासि, बूड अर्सि, मंतेर इंतिट कि? असले सेलुर. बति किरिसतुन वूर वोप्वा काड्कि, यूदुल्क आयुर वूरकुन पुट्ता. अद मुक्ति पुटना इंवल आसा वूर यूदुल्क्ना मंदे गिर पुटना इन्जेरेन इहिन जर्ग्ता. 12 वूर यूदुल्क किरिसतुन वोप्वा काड्कि, दुनियते मंवलिर यूदुल्क आयुर वूरकुन, बगवंतल आसिर्वाद सीतोर. ते तना नेमि किय्वलिर यूदुल्क बर्पुर तंवा चर्ना पिय्तेके, यूदुल्क आयुर वूरकुन उंडे बचोर अदिक वोर बगवंतल आसिर्वाद सींतोरेय! मिरटे अर्तम कीम्ट.

13-14 इंके यूदुल्क आयुर वूर्गटल बक्तलिर आसि मंवलिर मी सङा वड्क्सेक मंतोन. नाकुन मी साटिने इन्जेर बगवंतल नेमि कीतोर. अदेन साटि नना किय्वल इद सेवतुन वेले डगुर-पान सीसेर मंतोन. इहिन किय्वडुन हिंदल, ना सोंता लोकुर्गटल कहितुरा मंदे तेर अद मुक्तितुन बारेते आसा पुटुसि, बगवंतन पोरो बरोसा इर्सि, वूर बचे मायना इंवले नावा इचा. 15 बस्केते यूदुल्क बगवंतन वोप्मकियो, अस्के दुनियतगा मंवलिर कड्मतुर बगवंतन वोप्तेर. मोका वूर यूदुल्क गिर बगवंतन वोप्तेके, बतल जर्गंता इंतिट? सातपिनय मंवलिर जीवते नेंड्तेर इत्तेके बेय आनंद्ना गोस्टि! 16 नमुनतुन बगवंतल सीता पंटतल इचुसि सेसा वोर बगवंतन सीतेके, मेय्ता पंटता रासि पूरो गिर वोनय आंता इंवल माकुन टावा.

अद तीर्दे, मरतङ सीर्क बगवंतनङ आतेके, अद मरा पूरो गिर बगवंतनय आंता. इगे मरतङ सीर्क तोत्तुर बाबुर अब्राहम, इसक अनि याकोबुन मोडि मंतङ. अनि अद पूरो मरा वूरा संतान आय्वल यूदुलकुन मोडि मंता. 17 बति बगवंतल तना पोसि कीता ओलिवा मरतल कहितङ कांदन नट्क्सि वाड्तोर. अनि केडते मंवलिक दुस्रोक ओलिवा मरक्नङ कांदन मोडि मंवलिर मी यूदुल्क आयुर वूरकुन तंवा मरतगा अत्कुस्तोर. इदेन हिंदल, वोर पोसि कीता मरतङ सीर्कनल पुट्वल लगुतुन मिरट येच्चेर मंतिट. 18 बति अत्कुस्तुर वूर्निट! मिरट, ‘नट्क्सि वाड्तङ अव कांदन तेर चोकोट्नुर आंदुम्’ इन्जेर पोके माय्मट. बारितेके सीर्क्नले कांदन लगु वांता बति, कांदनल सीरकुन लगु वायो इन्जेर माकुन टावा. 19 इदेन पिय्सि, “माकुन अत्कुस्लेके अव कांदन नट्क्तोर” इन्जेर बोरे आयि, गर्वते सोन्च किया वचो. 20 हो! करलेन, बगवंतनगा बरोसा इर्वा सोन्जि, वूरकुन सुटि कीतोर अनि मिरट बरोसा इर्ता काड्कि, मीकुन करुम कीतोर. बति इदेन बारेते पोके माय्वक्ने दाक्ने मंट. 21 बारितेके, बगवंतल तना पोसि कीता ओलिवा मरतङ कांदने नट्क्ले पेजे वायोर्ते, अद मरतगा अत्कुस्तङ दुस्रोक मरक्नङ कांदङ आय्वलिर मीकुन नट्क्लेते, असले पेजे वायोर.

22 इदेनगा मंवल बगवंतना दयतुन अनि कटिंता गुंतुन सूडट. बरोसा किय्मकि वूर यूदुलकुन पोरो बगवंतल कटिंता गुंतुन तोह्‍तोर. अनि यूदुल्क आयुर वूर मिरट, बगवंतनगा बरोसा कीसेर पिस्किट्ते तंवा दया तोहंतोर. अहन पिस्वेके दाकिट्ते, मीकुन नट्क्सि वाटंतोर. 23 बति नट्क्सि वाड्तङ कांदन मोडि मंवलिर वूर यूदुल्क तन्गा बरोसा इर्वल मोदोल कीनिर्ते, तिरिसि वूरकुन अद मरतगा अत्कुसंतोर. बारितेके, अहन मल्सि अत्कुस्ले, बगवंतन सक्ति मंता. 24 बहन इत्तेके, केडते मंवलिक दुस्रोक ओलिवा मरक्नङ कांदङ आय्वलिर मीकुन, तना पोसि कीता मरतगा बगवंतल अत्कुसा पर्तोर. ते कुद अदे मरतगा बेर्स्तङ कांदंते बेय हल्कोते अत्कुसा परंतोर.

यूदुल्क बगवंतनगा मल्सि वाय्वल

25 यूदुल्क आयुर वूर दादलिर-बायिक्निट! मीवा मिरट गियन वालिर आंदुम इंवक मंले, उंदि मर्मतुन बारेते मीकुन वेहंतोन. अद बतल इत्तेके, बगवंतल यूदुल्क आयुर वूर बारेते मंवल तंवा पिलन बर्पुर आनल वेरि, बरोसा इर्वक्ने मूजोर-पांदा दिलतुन कहितुर यूदुलकुन सीतोर. 26-27 यूदुल्क सम्दिर बद तरिकते बचे मांतेर इंवडुन बारेते,

“बचि किय्वल सियोन गुटतल वासि,

याकोब्ना संतान पिय्सि ताक्वल करब-पांदुन तेंड्सि वाटंतोर.

‘नना वूरङ पापकुन तेंड्सि वाटंतोन’

इन्जेर वूर सङा इरंतोन”

इन्जेर दर्मा-ग्रंत्नगा लिहि कीसि मंता.

28 वूर यूदुल्क बगवंतना चोकोट्ना कबुडुन वोप्वा काड्कि, मी साटि वोनुर पगा-दार्क आतेर. बति बगवंतल वूरेर तोत्तुरकुन सीता वाग्दंतुन हिंदल वूरकुन नेमि कीसि, पेर्मते सूड्सेर मंतोर. 29 बारितेके, बगवंतल तना सीतङ वरमकुन मल्सि येत्वल आयोर. अनि तना नेमि कीतुरकुन मरुङ्वल आयोर. 30-31 इदेन मुने दुस्रोक जातिनुर आय्वलिर मिरट बगवंतल वेह्‍ता तीर ताक्मकि. बति इंके वूर यूदुल्क वोर वेह्‍ता तीर ताक्वा काड्कि, बगवंतल मी पोरो दया तोह्‍तोर. अदे तीर्दे इंके, वूर यूदुलकुन पोरो गिर दया तोहंतोर. 32 अदेन साटि, सम्दिर पोरो दया तोहना इन्जेरेन बगवंतल वूरकुन मूजोर-पांदगा कोंडि कीसि, इर्तोर.

पव्लु बगवंतन डगुर-पान सिय्वल

33 अहा! बगवंतनगा मंवल बर्पुर बुदि-गियंतुन

अनि बुदितुन बोरे गिंति किया परुर.

वोनङ निर्नयकुन अनि पिलनकुन,

बोरे बर्पुर अर्तम किया परुर.

34 बगवंतना सोन्च-विचरदुन बोरे करि किया परुर!

वोन बोरे गिर करुसा परुर!

35 अनि, बगवंतन बोर बाकि सीतोर? बोरे सिय्मकि!

वोर बगवंतल बोने बाकि सेलोर!

36 बारितेके हर चीज बगवंतनल वाता.

वोरे हर उंदितुन गडि कीतोर

अनि हर उंदि वोन साटिने मंता.

सिरिप वोर बगवंतने बस्केट डगुर-पान वायना!

आमेन.

उंडे करि कीका इंदकिते, www.koyang.in सूडा.