पूरो तन-मंदे बगवंतना सेवा किय्वल
12
1 अदेन साटि, दादलिर-बायिक्निट!
बगवंतल माकुन बेय दयते सूड्वल आंदुर.
अदेन हिंदल मीकुन नना कोर्वल बतल इत्तेके, पवित्रा अर्पना सीतपिनय, मिरट बर्पुर दिल्दे मीवा जिन्गनितुन बगवंतन सीसि वाटट.
इहिन किय्वल वोन आनंद सींता अनि वोना सेवा सत्ने किय्वल इदे तरिका आंद.
2 बगवंतनगा बरोसा इर्मकि वूर मोडि पिस्मट.
बति पडनङ सोन्च-विचर्कनल बगवंतल मीकुन मार्युसीतपिनय पूना तरिकते पिसट.
अहन पिस्तेके, बगवंतना इचा तीर ताक्वलिर आंतिट.
अद इचा बेय चोकोट्ना, वोपनल मंवल अनि जरा गिर गल्ति सेले अद बर्पुर वाले आंद.
3-5 बगवंतना पेर्मता-दयते नना अपोस्तुल्ता आतोन.
इदेन हिंदल, मीकुन दम्कि सिय्वल बतल इत्तेके, मिरट मंवडुन तेर अदिक आंदुम इन्जि, सोन्च किय्मट.
मावा मेंदोडगा वेले बागल्क मंतङ.
उंदि उंदि बागम उंदि उंदि काम कींतङ.
अदे तीर्दे, मरट दुस्रुर दुस्रुर वेलेटिर मंतट तेर बति, किरिस्तुनगा बरोसा इर्वडुन हिंदल, माकुन उंदिय मेंदोडङ बागलकुन मोडि मीरि कीसि, इर्तोर.
ते बगवंतल मीकुन सीतोर अव तीर-तीर्दङ वरमकुन बारेते, दिहंते सोन्च कीसेर पिसट.
6 ते बगवंतना पेर्मता-दयतुन पिय्सि, माकुन दुस्रोक दुस्रोक वरम्क पुड्तङ.
नमुनत, बगवंतल तोह्ता तीरे अद गोस्टि दुस्रुरकुन वेह्वल वरम नीकुन पुड्सि मत्तेके, अदेन निमे बरोसते बरोबर वाडकम कीम.
7 मदत किय्वल वरम नीकुन पुड्सि मत्तेके, निमे तप्वक मदत कियना.
बोदा करुस्वल वरम नीकुन पुड्सि मत्तेके, निमे तप्वक बोदा करुसना.
8 दुस्रुरकुन गटि-दीर्या सिय्वल वरम नीकुन पुड्सि मत्तेके, अदेन तप्वक वाडकम कियना.
निह्गा मंवडुन तूस्वल वरम नीकुन पुड्सि मत्तेके, नीवा बर्पुर दिल्ते उंडे इचुर वेले तूसना.
दुस्रुरकुन ताकुस्वल वरम नीकुन पुड्सि मत्तेके, काया-कस्टम कीसेर तेर बति, दिहंते वूरकुन ताकुसना.
दयते सूड्वल वरम नीकुन पुड्सि मत्तेके, वेले आनंद्ने वूरकुन दयते सूडना.
9 अदेन साटि, मीवा पेर्मा कपट सेल्वक्ने मंदना.
अद बहन इत्तेके, करबनल लङ मन्जेर, चोकोट्नतुन पिय्सि ताकट.
10 उंदि कुटुंबतुर मोडि पेर्मते मंट.
वोरोन वोरोर अदिक मानि कीसेर ताकट.
11 गह्ललिर आय्वक्ने मीवा बर्पुर दिल्ते, येसु पर्बुना सेवा कीम्ट.
12 पर्बुनगा मिरट आसा इर्ता काड्कि गट निल्सि, आनंद्ने मंट.
दुक्सङ वातेके अवेन वोर्चि ताकट.
बरोसते बस्केट पार्तना कीसेर मंट.
13 बगवंतनुर लोकुर बूरे जुरत्ने मत्तेके, वूरा जुरतुन पूरि कीम्ट.
वातुर वेर्तलिरकुन मान-पान कीसेर मंट.
14 मीकुन दुक्सा सिय्वलिरकुन आसिर्वाद सीम इन्जेर बगवंतन कोरट.
बति सापेना सीम इन्जेर मात्रम कोर्मट.
15 आनंद्ने मंवलिर सङा आनंद्ने मंट.
आड्वलिर सङा आडट.
16 वोरोन सङा वोरोर मंदगा येकि आसि मंट.
गर्वते मन्मट बति, बद तीर्दा काम किय्ले गिर पेजे वाय्मट.
* मीवा मिरट बेय गियन वालिर इन्मट.
17 वायुट कीतोर वोन बस्केन वायुट किय्मट.
बति सम्दिर मानि कीनल मंवलिक कामकुन बारेते दिहंते सोन्च कीम्ट.
18 मी सङा आयर्ते, हर वोरोन सङा सांतिते मंले, कोसिद कीम्ट.
19 लाड्नुर दादलिर-बायिक्निट!
मीवा मिरट बोन पोरोन पगा येत्मट.
वूर पोरो तंवा सोङुन तोह्ले, बगवंतन मोका सीम्ट.
बारितेके दर्मा-ग्रंत्नगा,
“पगा येत्वल काम नावा आंद.
ताना बर्पेय किय्वना ननय आंदुन”+
“मी पगा-दारन कर वस्तेके तप्वक काने दोसट.
येर वट्क्सि मतेके तप्वक येर सीम्ट.
अनि वोर पगा-दारना रोतुर अट्सि तिंले पह्जे मत्ता अद तड्मितङ गोकङ गिर सीम”+