अदिकारिर वेह्ता तीर कियना
13
1 हर मायनल सर्कार्दुर अदिकारिर वेह्ता तीर कियना.
बारितेके, बगवंतले अद सर्कारदुन नेमि कीतोर.
बगवंतल वूरकुन अदिकार सिया बीगर वूर अदिकारिर आया परुर.
2 अदेन साटि, अदिकारकुन मर्ला बड्वल बगवंतल नेमि कीता सर्कारदुन मर्ला बड्वल आंतोर.
इहिन मर्ला बड्वलिर तम्वा पोरो तमय सिक्सा तच्चेर मंतेर.
3 सर्कारि अदिकारिर करब काम्क किय्वलिर्कुने वेरुसंतेर.
बति चोकोट्नङ काम्क किय्वलिरकुन वेरुसुर.
ते निमे अदिकारिरकुन वेरिवक पिस्का इंद्किते, तप्वक चोकोट्नङ काम्क कियना.
अस्के वूर अदिकारिर नीकुन मेचंतेर.
4 नीवा चोकोटुन साटिने, बगवंतल तंवोर सेव्कन मोडि, अद सर्कारदुन इर्तोर.
बति निमे वायुट्नङ काम्क कीतेके, तप्वक सर्कार्दुर अदिकारिरकुन वेरिया लागर.
वायुट्नङ काम्क किय्वलिरकुन सिक्सा किय्लेने, बगवंतल अद सर्कारदुन अदिकार सीसि, पर्जत पोरो इर्तोर.
5 ते वूर अदिकारिर वेह्तप मरट ताकना.
सिरिप सिक्सतल तपुस्ले आयो बति, मावा मन-दिलतुन आनंद सिय्ले तेर अहन ताकना.
6 इद कारंतुन पिय्सिने, मिरट टेक्सा गिर दोह्चेर मंतिट.
वूर अदिकारिर बगवंतनुर सेव्कलिर आसि, पर्जता सेवा कीसेर पिसंतेर.
7 ते बोंते बाकि मंतिटो अनि बोंते टेक्सा दोहनयो, वोन तप्वक दोहना.
बोंते डगुर-पान सियनयो अनि बोंते मानि कियनयो, वोन तप्वक मानि कियना.
दर्मा-ग्रंत्नङ जुरतकुन पेर्मा पूरि कींता
8 बोने बतय बाकि मन्मट.
बति वोरोन वोरोर कंडि किया परुर आतङ पेर्मतङ काम्क कीसेर मंट.
आजु-बाजुतोन पेर्मते सूड्वले दर्मता कानुन पूरि किय्वल आंतोर.
9 अद दर्मता कानुंतगा पीर किय्वा, बोनय जीवा येत्वा, कल्वा, आजु-बाजुतोना बततुने आसा किय्वा इंवलिक आगेङे आय्वा, उंडे दुस्रोक सम्दो गिर, “नीवा निमे पेर्मते सूड्तपे, नी आजु-बाजुतुरकुन पेर्मते सूडना” इंवल आगेत रोपोन मंतङ.
10 दुस्रुरकुन पेर्मते सूड्वल वायुट कियोर.
अदेन साटि पेर्मये दर्मता कानुंता जुरतुन पूरि कींता.
11 मिरट इद सम्दो तप्वक कियना.
वोरोन वोरोर पेर्मते सूड्सेरेन मंदना.
बारितेके इद दुनियतल बगवंतल माकुन बचि किय्वल दिवोस वेले करुम वासेर मंता.
मरट पर्बुनगा बरोसा इर्ता दिवोसुन तेर, वोना वाय्वल दिवोस वेले करुम मंता.
अदेन साटि, मिरट इदेन करि कीसि, जोपनल तेच्चि, दिहंते वेरिसि पिसट.
12 रात मार्सि, दिहा करुम येव्सेर मंता.
अदेन साटि, सिकटित मोडि मंवलिक करब काम्क सुटि कीसि, वेड्चित मोडि मंवलिक चोकोट्नङ काम्क किय्ले, आय्तर्क पिय्कट.
13 वेड्चितगा पिस्वलिर मोडि मरट गिर पिस्कट.
निसा वरुस्वलिक उंवले आयि, लावर्सि तिरिवले आयि, पीर किय्वले आयि, बगड-नियत्ने ताक्वले आयि, पगा अनि कड्क वेय्वल इंवलिक ईतङ गुन्क्ना जोलित सोंवक मंद्कट.
14 इदेन बद्लि, येसु किरिस्तु पर्बु पिस्तपिनय पिस्कट.
मीवङ करेबलिक आसन पूरि किय्वलिक सोन्च्क सुटि कीम्ट.