रोमा 14

बरोसतगा डीला मंवलिरकुन चुडुर-पांदे सूड्वा

1 बरोसतगा कम्जोर मंवलिर बक्तलिरकुन करुम कीम्ट.

बति वूरा बरोसतुन पिय्सि, ताक्वलिकुन बारेते वूर सङा तगपर लाग्मट.

2 नमुनतुन बरोसतगा गट मंवल वोरोर सम्दो तीर्क्ना काने तिंदा वचो इंतोर.

बति बरोसा कमि मंवल वोरोर सिरिप, बाजि-पालये तिंदना इंतोर.

3 सम्दो तिंवल मायनल तिनोर वोन तेर चोकोट्नोना इन्जि, वोन चुडुर-पांदे सूड्वा.

अनि सम्दो तिनोर वोर मायनल तिंवन तेर, चोकोट्नोना इन्जि वोन चुडुर-पांदे सूड्वा.

बारितेके, वूर इविर्कुंते बगवंतले वोप्तोर.

4 ते पर्बुनोर सेव्कल आय्वल नी बरोबर्तोर बक्तन चुडुर-पांदे सूड्ले, निमे बोनि आंदि?

वूर तम्वा लेका तम्वोर माल्कल आय्वल, पर्बुने वेहा लागर.

अदेन साटि, वूरा तप-वोपुन बारेते, वूरोर माल्कले वूरकुन सुद्रि किया सीम.

वोर पर्बुये वूरकुन बरोबर निपुस्वल आंदुर.

5 अदे तीर्दे, वोरोर हर दिवोस चोकोट्नय इंतोर.

अनि उंडे वोरोर उंदि दिवोसुन तेर, उंडे उंदि दिवोस चोकोट्ना इंतोर.

बगवंतन बद तरिकते आनंद सीका इंवल हर वोरोन तप्वक करे मासि मंदना.

6 कहितुर उंदि दिवोसुन तेर, उंडे उंदि दिवोस चोकोट्ना इंतेर.

उंडे कहितुर सम्दो तीर्क्ना काने तिंतेर.

अनि उंडे कहितुर सम्दो तीर्क्ना तिंवक मंदंतेर.

बति वीर सम्दिर गिर अहन ताक्वडुन हिंदल, बगवंतन दनेवाद वेहंतेर अनि पर्बुन डगुर-पान सींतेर.

7-8 मरट सम्दिर गिर पर्बुनुर सेव्कलिर आता काड्कि, मा साटि मरट पिस्वट अनि मा साटि मरट साय्वट.

बति मरट पिस्तेके गिर, सातेके गिर सिरिप पर्बुने डगुर-पान वायना इन्जेर सूडंतट.

बारितेके मरट पर्बुनुर आंदट.

9 अदेन साटिने इहिन पिसि मंवलिर अनि सातुर पोरो गिर माल्कल आय्ले, किरिस्तु परन सीसि-नेंड्तोर.

10 ते बरोसतुन पिय्सि, तादल-तमुर आय्वलिर मरट, वोरोन पोरो वोरोर पिरदि किय्वक अनि चुडुर-पांदे सूड्वक पिस्कट.

बारितेके, पर्बु बगवंतल तस्वा कियन नेटि, मरट सम्दिर वोना राजा-गादित मुने निल्वलिर मंतट.

11 इदेन बारेते दर्मा-ग्रंत्नगा,

“ना मुने हर वोरोर मुर-टोङ्रङ कोटंतेर.

अनि ‘निमेय मावोर बगवंतनि आंदि’ इन्जि तोड्दे वोपंतेर”⁺

इन्जेर वोट वाट्सि बगवंतल लिहि कियुस्तोर.

12 ते मावा ताक्वडुन बारेता हर उंदि लेका, बोना वोर बगवंतन वेहा लागर.

दुस्रुरकुन बरोसतल बह्‍कि किय्वलिक काम्क किय्वा

13 बगवंतले तस्वा किय्वल आता काड्कि, मरट वोरोन वोरोर तस्वा किय्वक मंद्कट.

अचोरे आय्वा, बरोसते ताक्वलिरा मंदुन कोदा पासि अरुस्वलिक सेलेके, वूरकुन वूरा बरोसतल बह्‍कि किय्वलिक, काम्क कियोम इन्जेर निर्नय येत्कट.

14 बे-सुदुड वाले इनल बदे काने सेले इन्जेर येसु पर्बुन हिंदल, नाकुन टावा आता.

बति बदेंते वोरोर बे-सुदुड वाले इन्जेर, सम्जे मांतोरो, अद काने वोन साटि चोकोट मनो.

15 निमे तिंवल कानेते, नी बरोबर्तोर बक्तना मन नोता इत्तेके, निमे पेर्मते ताक्सेर सेल्वि.

आतोन साटि गिर, किरिस्तु तंवा जीवा सीतोर.

ते नीवा तिंवडुन हिंदल, वोर बक्तना बरोसतुन नासेडम किय्मा.

16 अस्के नीवा सोन्चुन पिय्सि चोकोट इंवल कीकिते, दुस्रुर नीकुन चुडुर-पांदे सूडुर.

17 बारितेके, बगवंतना राज तिंवल-उंवडुन बारेता आयो.

बति बगवंतल वोप्वलिक नियत्नङ काम्क, पवित्रा आत्मा सिय्वल आनंद अनि सांतित बारेता अद राज आंद.

18 इद तरिकते किरिस्तुना सेवा किय्वन बगवंतल मेचंतोर अनि दुस्रुर गिर मानि कींतेर.

19 अदेन साटि माकुन सांति सिय्वलिक अनि मा सम्दिरा बरोसतुन बडि किय्वलिक काम्के मरट कीकट.

20 कानेतुन साटि बगवंतना कामुन करब किय्मट.

मरट सम्दो तीर्क्ना काने तिंदा वचो बति, मा सङा मंवल बक्तन वोना बरोसतल बूड अरुस्वल काने तिंवल गल्ति आंता.

21 ते नी बरोबर्तोर बक्तन बरोसतल बूड अरुस्वलिक सविङ तिंवल अनि कल उंवल, ईतङ उंडे बवे गिर आयि काम्क किय्वक मंवल चोकोट आंद.

22 इवेन बारेते, निह्‍गा मंवल बरोसा नीकुन अनि बगवंतन नड्डुम मंवल गोस्टि आंद.

तना बरोसा किय्वलिकुन बारेते, तप्तोन-चुक्तोन इंवक मंवल आसिर्वाद येत्वल आंतोर.

23 बति बगवंतल, अनमिना आसेर तिंवन गल्ति कीतोना लेकतेन येतंतोर.

बारितेके, वोर तना तिंवडुन बर्पुर बरोसते तिन्जेर सेलोर.

बरोसा सेल्वक किय्वल, हर उंदि काम पाप्ना लेकतेन वांता.