रोमा 15

दुस्रुरकुन आनंद सीनल पिसना

1 अदेन साटि, बरोसतगा गट मंवलिर मरट, बरोसतगा डीला मंवलिरङ कम्जोरकुन सोसि कियना.

अनि सिरिप मावा आनंदुन साटिने सूड्वा.

2 बति मा सङा मंवलिरा बक्ति बर्पुर बडे माय्ले, बव्ते चोकोट्नङ काम्क कियनयो, अव काम्क कीसेर मंद्कट.

3 बारितेके, किरिस्तु सिरिप तंवा आनंदुन साटि सूड्मकि.

इदेन बद्लि, वोर दुक्सा बोगे मातोर.

इदेन बारेते इहिन, “ये बगवंता!

नीकुन रेह्‍चि वड्क्तुरङ गोस्टिङ नाकुन गिर दुक्सा लागुसेर मंतङ”⁺ इन्जेर दर्मा-ग्रंत्नगा लिहि कीसि मंता.

4 इव सम्दो मरट करियन साटिने लिहि कीसि मंतङ.

दर्मा-ग्रंत्नगा मंवलिक इव वचन्क, माकुन वोर्च्वल गुंतुन बारेते वेहंतङ अनि दिलतगा दर्यम सींतङ.

इवेन हिंदल, बचे मांतट इंवल आसा, मा रोपो पुटंता.

5 माकुन वोर्च्वल अनि दर्यम्नङ गुन्क सिय्वल बगवंतल, मिरट येसु किरिस्तुना सरि ताक्नेके, मीवा नड्डुम वोर बगवंतल येकि पुटुसिर!

6 अस्के मरट मन-दिलतगा उंदि आसि, मा येसु किरिस्तु पर्बुनोर बाबो आय्वल बगवंतन डगुर-पान अनि मय्मा सिया परंतट.

यूदुल्क आयुर वूर साटि चोकोट्ना कबुर

7 अदेन साटि, किरिस्तु मीकुन करुम कीतपे, बगवंतन डगुर-पान वानल मिरट गिर वोरोन वोरोर तप्वक करुम कियना.

8 नना मीकुन वेह्‍वल बतल इत्तेके, तोत्तुर बाबुरकुन बगवंतल सीता वाग्दन तपोर इन्जेर तोह्‍ले, किरिस्तु यूदुल्क्नोर सेव्कल आय्ले वातोर.

9 अचोरे आय्वा, यूदुल्क आयुर वूर गिर तम्वा पोरो बगवंतल तोह्‍ता दयतुन हिंदल, डगुर-पान सियना इन्जेरेन किरिस्तु वातोर.

इदेन बारेते दर्मा-ग्रंत्नगा,

“अदेन साटिने, यूदुल्क आयुर वूर नड्डुम नीकुन डगुर-पान सींतोन.

अनि नी पोरोडे कीर्तन्क वारंतोन”⁺

इन्जेर लिहि कीसि मंता.

10-11 उंडे गिर दर्मा-ग्रंत्नगा,

“यूदुल्क आयुर वूर्निट!

मिरट गिर बगवंतना पर्जत बरोबर आनंद येतट”⁺

अनि, “पर्बु बगवंतन दुनियतुर सम्दिर हेतु कीसेर,

डगुर-पान सीम्ट अनि कीर्तन्क वारट”⁺

इन्जेर लिहि कीसि मंता.

12 उंडे उंदि जागा,

“येसयिना वेलि⁺ साङ्सि, कोड्संता.

तान्गटल सम्दो जातिनुर पोरो राज ताकुस्ले,

राजल पुटंतोर.

वूर वोन पोरो आसा इरंतेर”⁺

इन्जेर येसया पर्वक्तल लिहि कीतोर.

13 ते इंके मीवा बरोसतुन पिय्सि, मिरट पवित्रा आत्मता सक्तिते निन्चि, मिह्‍गा मंवल आसतुन उंडे अदिक बडि कीसि, मीकुन बर्पुर सांति अनि आनंद सियना इन्जेर, वोर बगवंतन कोरंतोन!

पव्लु तेग्सि लिहि किय्ले कारन वेह्‍वल

14 नावुर दादलिर-बायिक्निट!

मिरट चोकोट्नुर आंदिट अनि बर्पुर गियन वालिर आसि, वोरोन वोरोर बुदि वेहा परंतिट इन्जेर मी पोरो नाकुन वेले बरोसा मंता.

15 तेर बति, बगवंतल सीता वरमुन हिंदल, मीकुन कहितङ गोस्टिङ हेतु कियना इन्जेर, नना तेग्सि लिहि कीसेर मंतोन.

16 अद वरम बद इत्तेके, यूदुल्क आयुर वूरकुन येसु किरिस्तुना चोकोट्ना कबुर वेह्‍ले, सेव्कल इन्जि नाकुन नेमि कीतोर.

इद तीर्दे, यूदुल्क आयुर वूर पवित्रा आत्मते सुदुड आसि, निवोद दोस्तपिनय बगवंतल वोपनल वोना केय्दे वूरकुन नना हव्लि कीसेर मंतोन.

17 अदेन साटि, येसु किरिसतुन हिंदल, बगवंतना सेवा किय्वल नाकुन बेय चोकोट लाग्सेर मंता इन्जेर गर्वते वेहंतोन.

18-19 बति सिरिप, किरिस्तु ना केय्दे कियुसीतङ, अवेन बारेतेन वेहंतोन.

बारितेके किरिस्तु, नावा बोदतुन पवित्रा आत्मता सक्तिते, चमत्कार्क अनि मय्मतङ काम्कुने, यूदुल्क आयुर वूर बगवंतनगा बरोसा इरनल अनि वचन पिय्सि ताकनल कीतोर.

ते अहन नना येरुसलेम नगुडल सुरु कीसि, इल्लूरिकु इंवल येरिया वेरि येसु किरिस्तुना चोकोट्ना कबुर वेहा पर्तोन.

20 इद तीर्दे किरिसतुन बारेते, करि किय्मकि अव जागनगा सोन्जि, चोकोट्ना कबुर वेहना इंवल आसा मोदोडले नह्‍गा मंता.

उंडे वोरोर दोह्‍ता बुनदित पोरो रोन दोह्‍वल⁺ नाकुन पसंद सेले.

21 इदेन बारेते दर्मा-ग्रंत्नगा,

“इदेन मुने वेह्‍चि मन्मकि वूर पर्जा,

वोन सूडंतेर.

अनि इदेन मुने केन्चि मन्मकि वूर पर्जा,

वोना कबुडुन केन्चि, अर्तम कींतेर”⁺

इन्जेर लिहि कीसि मत्ता तीरे नना कीतोन.

22 इंके वेरि, मिह्‍गा वाय्वक्ने, नाकुन आपुस्वल कारन इद सेवय आंद.

23-24 बति इंके, इव येरियनगा, नना सेवा किय्वल मह्‍तोन.

ते नना स्पेयिन देस्ने सोनेके, कहि महिनङ मिह्‍गा आग्सि, कुसिते मी सङा मंदना इन्जेर निर्नय कीतोन.

बारितेके, मीकुन सूडना इन्जेर वेले साल्कनल पर्पेडे मासेर मंतोन.

मिह्‍गटल पेसिनेके, नाकुन मदत कीकिट इन्जेर आसा कींतोन.

25-26 बति मोदोल नना येरुसलेम नगुडे दांतोन.

बारितेके, अद नगुडे मंवलिर येसुनुर गरिब बक्तलिरकुन कोतना मदत कियना इन्जेर, मासिदोनिया अनि अकया येरियनुर यूदुल्क आयुर वूर बक्तलिरा मंदे वाता.

ते वूर मीरि कीता चंदतुन येरुसलेम्नगा वोंतोन.

27 बारितेके अव येरियनुर बक्तलिर बगवंतना चोकोट्ना कबुर वूर यूदुल्क्ना जातितुर्गटल केन्ज्तेर.

अदेन साटि तम्वा अद बाकितुन कंडि कियन साटि, अनि वूर यूदुलकुन पिस्ले जुरत मंवलिक चीजकुन साटि, बेय आनंद्ने चंदा मीरि कीसि मदत कीतेर.

28 ते इद चंदतुन, येरुसलेम्नुर बक्तलिरकुन अंदुसि, स्पेयिन देस दांतोन.

अहन सोनेके मिह्‍गा गिर आगंतोन.

29 अनि नना मिह्‍गा वानेके, किरिस्तुना बर्पुर आसिर्वाद्ने निन्चि वांतोन इन्जेर नाकुन टावा.

30-32 नावुर दादलिर-बायिक्निट!

मिह्‍गा वायन मुने, यूदया येरियतगा मंवलिर बक्तलिर आयुर वूरा केय्दल नाकुन तपुसियना.

अनि येरुसलेम्नुर बक्तलिर गिर इद चंदतुन अनि नाकुन वोपना.

अद आता पेजे, बगवंतना इचा तीर आनंद्ने मिह्‍गा वासि, मी बरोबर आरम येतना.

इव सम्दो चोकोट जर्ग्ले, मा साटि येसु किरिस्तु पर्बु कीततुन पिय्सि अनि मा नड्डुम पवित्रा आत्मा सिय्वल पेर्मतुन पिय्सि, बगवंतन मिरट बेय पार्तना कियना इन्जेर कोर्सेर मंतोन.

33 माकुन सांति सिय्वल बगवंतल मीकुन सात मनिर!

आमेन.