पव्लु तंवुर सोप्तलिरकुन दंडोस्क वेह्वल
16
1 केंकेरिया नगुडे मंवल चर्चितुर्गा पीबल इंवल बायि बेय चोकोट सेवा कीसेर मंता.
2 पर्बुनुर दुस्रुर बक्तलिरकुन मिरट मान-पान कीतपे, तान गिर चोकोट मान-पान कीम्ट.
अद किय्वल येसुना सेवतगा बव बव गोस्टिनगा मदत जुरत मंतयो, अव गोस्टिनगा मदत कीम्ट.
बारितेके नाकुने आय्वा, दुस्रुर वेलेटिर बक्तलिरकुन अद बायि मदत कीता.
3 ना बरोबर येसु किरिस्तुना सेवा किय्वल पिरिस्किला बायिन अनि तानोर माड्सो अकुलन गिर नावा दंडोस वेहट.
4 वूर ना साटि, तम्वा परन सिय्ले गिर तेग्तेर.
ननय आय्वा, यूदुल्क आयुर वूर चर्चिनुर सम्दिर गिर वूरकुन दनेवाद वेह्चेर मंतेर.
5 वूरा रोतगा मीरे माय्वलिर बक्तलिर सम्दिरकुन नावा दंडोस वेहट.
आसिया येरियतगा किरिस्तुनगा बरोसा इर्तुर्गटल मोदोडोर एपेनेटु दादल आंदुर.
वोर लाड्नोर सोप्तन नावा दंडोस वेहट.
6 मी साटि वेले काया-कस्टम कीता अद मरिया बायिन गिर नावा दंडोस वेहट.
7 ना बरोबर जेल बोगे माय्वलिर आंद्रोनिकल अनि यूनियल इंवलिर नावुर आंदिर.
वूरकुन नावा दंडोस वेहट.
दुस्रुर अपोस्तुल्क वूरकुन वेले मानि कींतेर.
अचोरे आय्वा, वूर नाक्तेर मुनेने, येसु किरिस्तुनगा बरोसा इर्तुर आंदिर.
8 अंपिलियल पर्बुनगा बरोसा इर्वडुन हिंदल, नना अनि वोर लाड्नुर सोप्तलिर आतोम.
वोन नावा दंडोस वेहट.
9 मा बरोबर येसु किरिस्तुना सेवा किय्वल ऊर्बन अनि लाड्नोर सोप्तल आय्वल इस्टाकुकुन नावा दंडोस वेहट.
10 अपेलेकुन किरिसतुन पोरो करल बाव-बक्ति मंता इन्जेर निरुपन आता.
वोन अनि अरिस्टोबुल्ता कुटुंबतुरकुन नावा दंडोस वेहट.
11 ना दात यूदुल्क्ना जातितोर आय्वल हेरोदियोन गिर नावा दंडोस वेहट.
अनि पर्बुनगा बरोसा इर्वल नार्किस्ना कुटुंबतुरकुन पूसि कीतप वेहट.
12 पर्बुन साटि काया-कस्टम किय्वलिक तुरुपेना अनि तुरुपोसा इंवलिक बायिकुन नावा दंडोस वेहट.
लाड्ना उंडे उंदि पेर्सिस इंवल बायि बेय काम कीता.
अद बायिन गिर नावा दंडोस वेहट.
13 तंवोर सेव्कल इन्जेर पर्बु नेमि कीतोर वोर रूपसुन नावा दंडोस वेहट.
वोना अवल नाकुन गिर अवन मोडि मंता.
तान नावा दंडोस वेहट.
14 असुंक्रित, पेलेगोन, हेर्मेन, पत्रोबन, हेर्मन अनि वूर सङा मंवलिर दुस्रुर दादलिर-बायिकुन गिर नावा दंडोस वेहट.
15 पिलोलोगुन, यूलिया बायिन, नेरियन अनि वोना सेलडुन, ओलंपासुन अनि वूर सङा मीरे माय्वलिर बक्तलिर सम्दिरकुन नावा दंडोस वेहट.
16 मिरट मीरे मानेके, वोरोन वोरोर दंडोस दोसि, किरिस्तुना पेर्मते कलियट.
किरिस्तुनङ सम्दो चर्चिनुर, मीकुन दंडोस्क वेह्चेर मंतेर.
आक्रितङ सूचनङ
17 दादलिर-बायिक्निट!
मीकुन कोर्वल बतल इत्तेके, मी नड्डुम बेद-बाव्क पुटुस्वलिरकुन, मी सरदुन अड्डम आय्वलिरकुन अनि मिरट करि कीता बोदतुन उल्टा आसि, वेह्वलिर बारेते दिहंते मंट.
अनि वूर्गटल मिरट लङ मंदना.
18 वूर आतुर येसु किरिस्तु पर्बुना सेवा कियुर.
इदेन बद्लि, वूर तम्वङ पेटिङ निह्ले, सूडंतेर.
गोड गोड गोस्टिङ वेह्चेर, पोरो पोरो बेय चोकोट वड्क्सेर, अनडिरकुन पसि कींतेर.
19 बति मिरट बगवंतना इचा तीर बरोसते ताकंतिट इन्जेर, सम्दिरकुन करे माता.
इद गोस्टितुन हिंदल, नाकुन बेय आनंद लाग्ता.
मिरट चोकोट्नन बारेते, गियन वालिर आसि मंदना.
अनि करेबलिकुन बारेते, बोललिर आसि, मंदना इंवले नावा इचा.
20 माकुन सांति सिय्वल, बगवंतल मीवङ कालकुन बूड सय्तंदुन दाबि कीसि इरंतोर.
मावोर येसु किरिस्तु पर्बुना पेर्मता-दया मीकुन सात मनि!
21 ना सङा सेवा किय्वल तिमोति मीकुन दंडोस वेह्चेर मंतोर.
लूकियल, यासोन, सोसिपत्रु इंवलिर ना लोकुर गिर मीकुन दंडोस्क वेह्चेर मंतेर.
22 पव्लु वेह्नेके, इद चिटितुन तेर्तियु इंवना लिहि कीसेर मंतोन.
नना गिर पर्बुनगा बरोसा इर्तोना आंदुन.
मीकुन नावा दंडोस.
23 नावा मान-पान किय्वल गायियु मीकुन दंडोस वेह्चेर मंतोर.
वोनय रोन पर्बुनुर बक्तलिर सम्दिर मीरे मांतेर.
इद चहर्तङ कोतन बारेते सूड्वल अदिकारि एरस्तु अनि मा दात बरोसा वाले कवर्तु गिर मीकुन दंडोस वेहट इत्तेर.
24 *[मावोर येसु किरिस्तु पर्बुना पेर्मता-दया मीकुन सात मनि!
आमेन.]
25 नना पचर किय्वल चोकोट्ना कबुडुन पिय्सि, येसु किरिस्तुना बोदतुन पिय्सि, बगवंतल मीकुन उंडे अदिक बरोसतगा बडि किया परंतोर.
नना इंके, मीकुन वेह्वल येसु किरिस्तुना चोकोट्ना कबुडा सतेम, बह्रि अर्वक्ने पिडिनङ-पिडिङ मकुसि मत्ता.
26 बति इंके, पर्वक्तलिर लिहि कीतङ वचनकुन हिंदल अनि बस्केट मंवल बगवंतल सीतङ आगेन हिंदल, सम्दो जातिनुर पर्बुनगा बरोसा इर्सि, बाव-बक्तिते ताकना इन्जेर, इद सतेम उजगिरि अर्ता.
27 येसु किरिस्तु कीता कार्यतुन हिंदल, मावोर वोरोरे मंवल गियन वाले बगवंतन बस्केट डगुर-पान वायि!
आमेन.