रोमा 2

बेद-बाव सूड्वक्ने बगवंतल तस्वा कींतोर

1 अहन ताकंतेर ते, निमे बोनि आतेके गिर दादा, दुस्रुरा तस्वा कीकिते, अदेन्गटल निमे तपुसिया पर्वक्ने मंति इन्जेर करि कियना.

बारितेके, बवेन हिंदल दुस्रुरा तस्वा कीसेर मंतियो, अव तपकुन निमे गिर कीसेर मंति.

तान हिंदल, नीवा निमेय सिक्सा वाड्सेर मंति.

2 आतङ काम्क किय्वलिरकुन बगवंतल सतेम्ने तस्वा कींतोर इंवल माकुन टावा.

3-4 ये दादा!

आतुरकुन बगवंतल तस्वा कींतोर.

बति निमे, “आतङे काम्क किय्वल नाकुन करलेन तस्वा कियोर” इन्जेर सोन्च कींति.

अनि, “बगवंतल बेय चोकोट्नोर अनि दया वाले आंदुर.

वोन्गा वेले वोर्च्वल गुन मंता.

नाकुन इंके तस्वा कीसि, सप्ने सिक्सा कियोर” इन्जेर वोर बगवंतन कमि-पांदे सूड्मा.

बति नीवङ पापकुन निमे चुक चुके माकि इन्जेरेन, बगवंतल नीकुन चोकोट सूड्सेर मंतोर इन्जेर नीकुन टावा सेले कि?

5-6 हर वोरोर किय्वलिक कामकुन पिय्सि,⁺ बगवंतल बोन बचोर सियनयो अचोर पंडि बरोबर सींतोर.

बति निमे मूजोर्ति आंदि.

अनि पापकुन सुटि कीसेर सेल्वि.

इव पापकुन पिय्सि, नी पोरो वाट्वल सिक्सतुन वेले कमय कीसेर मंति.

तस्वा किय्वल दिवोसुन नेटि बगवंतल सोङुन वाय्वल बरोबर आंद.

अंटित्क वोना नियत्ना तस्वतुन सम्दिर सूडंतेर.

7 बति कहितुर लोकुर बगवंतल तमकुन मेचना, मय्मा अनि बस्केट मंवल जीवा सियना इन्जेर चोकोट्नङ काम्क कीसेर मंदंतेर.

वोर बगवंतल करलेन अद जीवा वूरकुन सींतोर.

8 बति उंडे कहितुर सिरिप तम्वा साटि पिस्वल कीनेके, वूर सतेमुन वोप्वक्ने, जग्डङ पुटुसेर, करब काम्क कीसेर मंदंतेर.

बगवंतल वूर पोरो तंवा सोङुन तोह्‍चि, डगुर सिक्सा वाटंतोर.

9 करब्नङ काम्क कीसेर, मंवलिर सम्दिरकुन तक्लिब्क अनि दुक्सङ करलेन वांतङ इन्जेर करि कियना.

अव मोदोल यूदुलकुन वांतङ.

वूर पेजेय यूदुल्क आयुर वूरकुन गिर वांतङ.

10 बति बगवंतल चोकोट्नङ काम्क कीसेर मंवलिर सम्दिरकुन मय्मा, मान अनि सांति सींतोर.

अव मोदोल यूदुलकुन पुटंतङ.

वूर पेजेय यूदुल्क आयुर वूरकुन गिर पुटंतङ.

11 बारितेके, बगवंतल बोने बेद-बाव्ते सूडोर.

12-15 यूदुल्क तम्गा दर्मता कानुन मन्जि गिर पाप कीनिर्ते, नासेडम आंतेर.

अद कानुंतुन पिय्सि, वूरकुन सिक्सा पुटंता.

वूर अद कानुन सिरिप केन्ज्तेके, बगवंतना नदुडे नियत्नुर आयुर.

बति अद कानुन पिय्सि ताक्वलिरे, नियत्नुरा लेकते वांतेर.

अह्‍ने यूदुल्क आयुर वूर, तम्गा दर्मता कानुन सेल्वेके गिर, पाप कीनिर्ते नासेडम आंतेर.

बारितेके, वूर अद कानुंतुन केन्चि मंवेके गिर, सादरन ताकनिर्ते, अद कानुन तमकुन टावा अनि तम्वङ दिल्क्नगा मंता इन्जेर तोहंतेर.

चोकोट कीतेके चोकोट, वायुट कीतेके वायुट इन्जेर वूरा मन-दिल गिर वेह्‍चेर मंदंता.

16 इव सम्दोन पिय्सि, बगवंतल येसु किरिस्तुना केय्दे तस्वा किय्वल दिवोसुन नेटि, सम्दिरङ मक्डिते मंवलिक सोन्च-विचरकुन तस्वा कींतोर.

नना वेह्‍ता चोकोट्ना कबुडुन पिय्सि, इद तस्वा जर्ग्वल मंता.

यूदुल्क अनि दर्मता कानुन

17 बति यूदुल्क्निट!

“नना यूदुल्क्ना जातितोना आंदुन” इन्जेर मिह्‍गटल वोरोर इंदा वचो.

अनि मिरट, “बगवंतल माकुन बचि कींतोर.

बारितेके, वोर माकुन आच्तोर अनि ममोट वोना कानुंतुन पिय्सि ताक्सेर मंतोम” इन्जेर पोके मासेर मंतिट.

18 मिरट दर्मता कानुंतुन वाचि किय्वडुन हिंदल, सतेम बतल इंवल अनि बगवंतल वोपनल बहन ताकना इंवडुन करि कीतिट.

19-20 अदे तीर्दे, “दर्मता कानुन अनि सतेम सिरिप मा यूदुल्कुने बर्पुर टावा” इन्जेर अनमिना आय्वक्ने वेहंतिट.

अदेन साटि, “बगवंतना सरदुन बारेते, वोड्कि सेलुर वूर गुड्डिरकुन सरि तोह्‍वलिर आंदुम.

अनि सिकटितगा बूले मातुरकुन वेड्चि तोह्‍वलिर आंदुम.

अह्‍ने दर्मता कानुन अर्तम आयो वूरकुन बोदा वेह्‍वलिर अनि, चुडुकुन दात मंवलिरकुन करुस्वलिर ममोटे आंदुम” इन्जेर मिरट इंतिट.

21 मिरट दुस्रुरकुन करुसंतिट बति, मीवा मिरट करिविट.

दुस्रुरकुन कल्मट इन्जेर बोदा वेहंतिट बति, मिरटे कले काम कींतिट.

22 मिरट पीर किय्वा इन्जेर दुस्रुरकुन वेहंतिट बति, मिरटे पीर कींतिट.

पेन्क्नङ मूर्तिङ इस्टम सेले इन्जेर वेहंतिट बति, मिरटे अवेनङ गुडिन लूटि कींतिट.

23 दर्मता कानुंता गियन माकुने मंता इन्जेर पोके मांतिट बति, मिरटे तान्गटा कानुंतुन पिय्सि ताक्विट.

इहिन सम्दि कीसेर, मिरट बगवंतना हिजत वोसेर मंतिट.

24 इद गोस्टितुन बारेते, “यूदुल्क आयुर वूर नड्डुम मी हिंदले, बगवंतना हिजत सोन्जेर मंता”⁺ इन्जेर दर्मा-ग्रंत्नगा लिहि कीसि मंता.

25 मिरट दर्मता कानुंतुन पिय्सि ताक्तेके, तोल कत्रि कियुस्तता^* विलुवा मंदंता.

बति अद कानुंतुन पिय्सि ताक्वेके, अद तोल कत्रि कीततुन विलुवा मनो.

इदेन हिंदल, मिरट यूदुल्क आसि गिर, बगवंतल मीकुन तोल कत्रि कियुस्मकि वूर यूदुल्क आयुर वूरा लेकतेन येतंतोर.

26 अद तीर्दे, तोल कत्रि किय्वल कार्या कियुस्मकि वूर दर्मता कानुंतुन पिय्सि ताक्तेके, बगवंतल वूरकुन तोल कत्रि कियुस्तुरा लेकतेन येतंतोर.

27 बति मी यूदुल्क्नगा दर्मता कानुन मंता अनि तोल कत्रि कीसि गिर मंतिट.

तेर बति, मिरट अद कानुंतुन तोड-मोड कीसेर मंतिट.

ते यूदुल्क आयुर वूर तम्वा मेंदोडगा तोल कत्रि कियुस्वक मन्जि गिर, दर्मता कानुंतुन पिय्सि ताक्सेर मंतेर.

इद तीर्दे, मिरट तप कीसेर मंतिट इन्जेर वूर यूदुल्क आयुर वूर तस्वा कीसेर मंतेर.

28-29 ते करल यूदुल्क बूर आंदिर?

अनि असल तोल कत्रि किय्वल कार्या इत्तेके बतल?

नना वेहंतोन: करल यूदुल्क बूर इत्तेके, सिरिप यूदुल्क्ना जातितगा जल्मा आतुर वूर आयुर.

अनि असल तोल कत्रि किय्वल इत्तेके, सिरिप कानुंतुन पिय्सि, मेंदोडगा कियुस्वल कार्या आयो बति, बगवंतना आत्मते माय्नन रोपो मंवल दिलतुन मार्युस्वल कार्या आंद.

आतुरकुन माय्नलिर मेच्वल आयो बति, बगवंतले मेचंतोर.