रोमा
रोमतुरकुन लिहि कीता चिटि
पव्लुनङ दंडोस्क
1
1 येसु किरिस्तुनोर दासिना आय्वल पव्लुना इद चिटि लिहि कीसेर मंतोन.
बगवंतल नाकुन तंवा सेवा किय्वल अपोस्तुल* आसि मंले, नेमि कीतोर अनि तंवा बारेता चोकोट्ना कबुर पचर किय्ले, नाकुन सारि कीतोर.
2 तोले इद चोकोट्ना कबुडुन बगवंतल वाग्दन सीतोर.
इदेन बारेते पवित्रा दर्मा-ग्रंत्नगा तंवुर पर्वक्तलिरा* केय्दे लिहि कियुस्तोर.
3-4 इद चोकोट्ना कबुर तंवोर मरि मा येसु किरिस्तु पर्बुन बारेता आंद.
वोर येसु, दाविदु+ राजना कांदांतगा माय्नना रूप्ने जल्मा आतोर.
बति वोर सासि, पवित्रा आत्मता सक्तिते नेंड्वडुन हिंदल, बगवंतनोर मरि आंदुर इन्जि निरुपन आता.
5 वोर किरिसतुन हिंदल अनि वोना पोरोडुन साटि बगवंतल ना पोरो पेर्मता-दया तोह्ततुन हिंदल, वोनोर अपोस्तुल्ता आया पर्तोन.
इहिन सम्दो जातिनुर नना वेह्वल चोकोट्ना कबुडगा बरोसा इर्सि, तान पिय्सि ताकना इंवले वोना उदेस मंता.
6 रोमा नगुडे मंवलिर बक्तलिर्निट!
मिरट गिर बरोसा इर्वल पर्जतगा वांतिट.
मिरट सम्दिर येसु किरिस्तुनुर आयन साटि, बगवंतल नेमि कीतोर.
इव सम्दो गोस्टिन बारेते मीकुन टावा.
7 मी सम्दिर साटि इद चिटि लिहि कीसेर मंतोन.
बगवंतल मीकुन वेले लाड कीसेर मंतोर अनि तंवुर बक्तलिर* इन्जेर मीकुन आच्तोर.
वोर बाबो बगवंतल अनि मावोर येसु किरिस्तु पर्बु मीकुन पेर्मता-दया अनि सांति सियिर!
दनेवाद वेह्चेर पार्तना किय्वल
8 मीवा बरोसतुन बारेते दुनियतुर वेलेटिर करि कीता काड्कि, मी सम्दिर साटि येसु किरिसतुन हिंदल, मोदोल मा बगवंतन दनेवाद वेह्चेर मंतोन.
9-10 बगवंतनोर मरिना चोकोट्ना कबुर पचर कीसेर, नावा बर्पुर दिल्दे बगवंतना सेवा कीसेर मंतोन.
नना पार्तना तुङ्वल हर गट्का, मी बारेते हेतु कींतोन इंवडुन बगवंतले गवा मंतोर.
बहन तेर बति, मिह्गा वाय्ले, बगवंतल नाकुन मोका सियना इन्जेर पार्तना कीसेर मंतोन.
11 मी पोरो नाकुन बेय जीवा आता.
बारितेके, नना कीता सेवतुन हिंदल, मिरट गिर बक्तितगा बडे माय्ले, बगवंतनल वरम मीकुन पुटंता.
12 बहन इत्तेके, नावा बरोसतुन सूड्सि, मीवा दिलतगा आनंद बडे मांता अनि मीवा बरोसतुन सूड्सि, नावा आनंद गिर बडे मांता.
13 दादलिर-बायिक्निट!
यूदुल्क आयुर वूर्गटल नाकुन बक्तिता पंडि पुड्ता.
अदे तीर्दे, मिह्गटल गिर अद पंडि येतना इन्जि, मिह्गा वायना इन्जेर वेले जोकङ पिलन वाट्सि, मत्तोन.
बति इंके वेरि, नाकुन तक्लिब्क रोकि कीतङ.
इद गोस्टि मीकुन करे माय्वक मंवल नाकुन पसंद सेले.
14 गियंते पिस्वलिर्कुन* अनि केडा माय्नलिरकुन, करितुरकुन अनि अन्पड वालिरकुन, वीर सम्दिरकुन बेद-बाव सूड्वक्ने, किरिसतुन बारेता चोकोट्ना कबुर वेह्वल जिमा, ना पोरो मंता.
15 अदेन साटिने, रोमा नगुडे मंवलिर मीकुन गिर चोकोट्ना कबुर पचर कियना इन्जेर, पर्पेडे मासेर मंतोन.
16-17 इद चोकोट्ना कबुर सिरिप तन्गा बरोसा इर्वल हर वोरोन, बगवंतल नियत्नोर इन्जेर बहन वोपंतोर इंवडुन बारेते, वेह्चि तोहंता.
इदेन बारेते दर्मता कानुंतगा, “बरोसतुन हिंदल, नियत्नोर इन्जि नना बोंते वोपंतोरो, वोर पिसंतोर”+ इन्जेर लिहि कीसि मंता.
तंवा सक्तिते बगवंतल तन्गा बरोसा इर्वलिर सम्दिरकुन, इत्तेके यूदुल्क्नगटल मोदोल कीसि, यूदुल्क आयुर वूरकुन गिर, बचि कींतोर.
अदेन साटि किरिस्तुना चोकोट्ना कबुडुन बारेते पचर किय्ले, नना लजे मायोन.
चोकोट्ना कबुडगा बरोसा इर्वल बारि जुरत मंता?
18 बारितेके, पर्जा तम्वङ सम्दो बेय करेबलिक कामकुन हिंदल, बगवंतना सतेमुन दाबि कियना इन्जेर सूड्सेर मंतेर.
बगवंतन पटि किय्वक्ने इस्टम वाता तीर पिस्वलिरकुन, बगवंतल स्वर्गनल तस्वा कीसि, सिक्सा कीसेर मंतोर.
19 बगवंतल अहन बारि कींतोर इत्तेके, तना बहन मंतोर इंवल सतेमुन नरिमन्कन अर्तम आनल तात्कर मुनेने तोह्तोर.
अनि इदेन बारेते, वूरकुन टावा गिर मंता.
20 बहन इत्तेके, बगवंतल कलितगा गडि कीतङ अव सम्दोन तात्कर सूडा वचो.
बगवंतल गडि कीतोर अस्केडल, वोनङ दिसोङ अव गुनकुन बारेते इत्तेके, वोर बहन मंदंतोर अनि वोना बस्केट मंवल सक्ति इंवलिकुन, अव गडि कीतनल करि किया वचो.
अदेन साटि, “माकुन बगवंतल टावा सेलोर” इन्जेर वूर वेहा परुर.
21 तेर बति, बगवंतल वूरकुन टावा मन्जि गिर, बगवंतन सिय्वल डगुर-पान वूर सिय्मकि अनि दनेवाद गिर वेह्मकि.
अदेन साटि, वूरङ तेलिवि सेलेङ अव दिल्क सिकटिते निन्चि सोत्तङ.
अनि वूरङ सोन्च्क बततुने कामि सिय्मकि.
22 वूर तम्वा तमा बेय गियन वालिर इन्जेर वेह्चेर, अकल सेलुर वूर आतेर.
23 बस्केट जीवते मंवल मय्मा वाले बगवंतना सेवा किय्वडुन बद्लि, मरन आय्वल माय्नलिरङ, पिटे-पुरडङ, नालुङ काल्क्ना जंवर्तङ अनि पुर्ग-बुसितङ मूर्तिङ कीसि, पेन्क इन्जेर पूजा किय्वल सुरु कीतेर.
24 अदेन साटि, बगवंतल वूरङ दिल्क्नगा मंवलिक करब आसन पिय्सि, तम्वा तमा मेंदोलकुन बे-सुदुड किय्वलिक पाप्क्नङ काम्क किय्ले, वूरकुन सुटि कीतोर.
25 वूर बगवंतना सतेमुन सुटि कीसि, लबडुने नम्तेर.
अनि कलि गडि किय्वना सेवा किय्वडुन बद्लि, कलितगा मंवलिकुने पूजा कीतेर.
बति करल सूड्तेके, वोर कलि गडि किय्वने बस्केट डगुर-पान वायना.
आमेन!
26 इद कारंतुन हिंदले, बगवंतल वूरकुन बेय करेबलिक, पाप्नङ आसनगा हव्लि कीतोर.
वेय्लोक माड्सत सङा मींडन बद्लि, दुस्रोक वेय्लोकुन सङा मींड्वल सुरु कीतङ.
27 अह्ने माय्नलिर गिर वेय्लोकुन सङा मींडन बद्लि, करब आसतगा कोंडे मासि, दुस्रुर माय्नलिर सङा मींड्वल सुरु कीतेर.
ईतङ हिजत वोय्वलिक कामकुन हिंदल, बगवंतल वूरकुन बरोबर सिक्सा सीसेर मंतोर.
28 अचोरे आय्वा, तंवा सते गियंतुन वूर सुटि कीततुन हिंदल, बगड-नियत्नङ काम्क किय्ले, बगवंतल वूरकुन करब मंदा केय्दे, हव्लि कीतोर.
29-31 वूर रोपो सम्दो तीर्दा करब-पान, करेबल गुन, बद सूडा पह्जे इंवल आसा, वायुट्ना बुदि, नासेडम किय्वल, पगा, दुस्रोनगा मत्ता अदेन कोर्वल, माय्नलिरकुन जक्वल, करब वड्क्वल, पसि किय्वल, चह्डिङ वेह्वल, हिजत तेंड्वल, बगवंतन पसंद किय्वक मंवल, तमा बेय चोकोट्नुर इंवल, मर्ला बड्वल, डगुक डगुक गोस्टिङ वेह्वल, करबुन पुटुस्वल, बेये-बाबन मानि किय्वक मंवल, आड-मुट मंवल, गोस्टि तप्वल, लाड सेल्वक्ने मंवल अनि दया सेल्वक मंवल.
ईतङ सम्दो गुन्क्ने वूरङ दिल्क निन्चि मंतङ.
32 ईतङ काम्क कीतेके, बगवंतना कानुंतुन पिय्सि, मरन आया लागर इन्जेर वूरकुन टावा.
बति वूर इव काम्क कीसेर मंवले आय्वा, ईतङ काम्क किय्वलिरकुन मेच्चेर मंदंतेर.