रोम नगुडे पव्लु सोंवल
27
1 अद आता पेजे वूर अदिकारिर, पव्लुन अनि उंडे कहितुर जेल्दगा मंवलिरकुन इटलि देस्ना रोमा नगुडे रोहना इन्जेर निर्नय कीतेर.
अगस्टस इंवल दलम्नोर यूलि इंवल कमंडरतगा माकुन हव्लि कीतेर.
2 ते ममोट सम्दुर्ता डर्डितगा आग्सि मंवल अद्रमुतिया नगुडा रूका उच्चि पेसितोम.
अद रूका आसिया येरियता सम्दुर्ता डर्डितङ वेले जागनगा आग्सेर सोंवल मत्ता.
मासिदोनिया येरियता तेसलोनिका नगुडोर अरिस्तर्कु गिर मा सङा मत्तोर.
3 इमुन नेटि, ममोट सीदोन नगुडे येव्तोम.
अस्के वोना यात्रतुन पह्जे मत्तङ चीजकुन साटि, पव्लुनुर सोप्तलिर सङा बेटे माय्ले, कमंडर यूलि वोन पोरो दया तोह्तोर.
4 अहन अगटल पेसिनेके मुनेत्क बेय जोर्ते वडि वाता काड्कि, सय्परस लंकता तलवडा बाजनल रूकतुन ताकुस्तोम.
5 अहन किलिकिया, पंपुलिया येरियन मुनेता सम्दुरतुन वीड्सि, लुकिया येरियता मुरा इंवल नगुडे येव्तोम.
6 अगा अलेग्जांड्रिया नगुडा रूका इटलि सोंले तयर मत्ता.
ते अद रूकतगा वोर कमंडर माकुन उपुस्तोर.
7 मुनेत्क बेय जोर्ते वडि वाता काड्कि, मावा यात्रा वेले रोज्क जोक्सि ताक्ता.
वेले कस्टम्ने किनिदु चहरतुन करुम येव्तोम.
वडि वाततुन हिंदल, उंडे मुने अद बाज्नेके सोंदा पर्मकि.
ते केरेतु लंकता सिडयिङ बाजुन आसि, डर्डिते मंवल सल्मोने जागतुन करुमनल वीड्तोम.
8 अदेन वीड्सि, बेय कस्टम्ने सम्दुर्ता काटुने जोक-जोके लसया इंवल चहरतुन करुम्ना चोकोट्ना रूकङ आग्वल जागतगा येव्तोम.
9 अद तीर्दे मावा टेम वेले नुक्सन आता काड्कि, अद गट्कते* रूकते सोंवल वेले वेरिनल आता.
अदेन साटि पव्लु तेच्चि अद रूकतगा मंवलिरकुन,
10 “दादलिर्निट!
इद मुने सोंवल यात्रतगा वेले दुक्सङ वानुङ.
चीज्क अनि रूका करब आय्वले आय्वा, मावा जीवता नुक्सन गिर जर्गवचो” इन्जेर वेह्तोर.
11 तेर बति, वोर कमंडर पव्लु वेह्ता अदेन नम्वक्ने, वोर रूका ताकुस्वल अदिकारिना गोस्टितुन नम्तोर.
12 वूर मंवल अद रूकङ आग्वल जागा पीनि-गालुम कामि सियो.
अदेन साटि आयर्ते पिनिक्सु येव्सि, पीनि-गालुम वीडनल अगा मंदना इन्जेर वेलेटिर सोन्च कीततुन हिंदल, अगटल पेसितेर.
इद पिनिक्सु इंवल रूकङ आग्वल जागा केरेतु लंकता पोरयिङ बाज्ना कोड्डितगा मंता.*
वडि-दूंदड वाय्वल
13 अस्के तेल्न्गड बाजनल जोक्सि, वडि वाय्वल मोदोल आता काड्कि, वूर पिनिक्सु सोंदा परंतोम इन्जेर सम्जे मातेर.
अदेन साटि, लङर वाड्ता अदेन तेंड्सि, केरेतु लंकता डर्डिये रूकतुन सोंदुसीतेर.
14 बति जुलुक आता पेजे, अद लंकतुन पोरोडल सिडयिङ-तलवडा बाजनल तुपांतुन दात बेय जोर्ते वडि पेसिता.
15 अद वडिद नड्डुम कोंडे मासि मावा रूका मुने सोंदा पर्मकि.
ते वडि बेके पांता हके रूका सोंनि इन्जेर सुटि कीतोम.
16 अहन सोनेके, कवुदु इंवल चुडुरे लंका वाता.
ते तान बग्लये वीड्सेर मनेके, मावा रूकतगा पेजे दोह्चि मंवल चुडुर रूकतुन बचि किय्ले, वेले कस्टम्ने वरुसियपर्तोम.
17 तान डगुर रूकतगा वरुसीता पेजे नोडेने सबुड दोह्तेर.
ते मावा रूका सुर्तिसा जागता उस्के कुप्पनगा अर्मड मंदर इन्जेर वेरिसि, रूकत पोरो मंवलिक पड्दङ रेह्तेर अनि वडि पाय्वल बाजुन रूका सोंनि इन्जेर सुटि कीतेर.
18 इमुन नेटि अद वडि-दूंदड अदिक आता काड्कि, रूकतगा मंवल सामन वाडि सीसि, रूकतुन हल्को कीतेर.
19 मूडवा दिया कुद तम्वङ केय्क्ने रूकता वीसोरा गिर वाडि सीतेर.
20 अद वडि-दूंदड बेय अदिक मत्ता काड्कि, वेलेन रोज्क माकुन पोड्द आयि, सुकुक आयि दिस्मकि.
ते ममोट बचे माकोम इंवल आसा पूरोय सुटि कीतोम.
21 वेले दिवोस्कनल वूर सम्दिर गिरे काने तिंवके मत्तेर.
ते पव्लु वूर नड्डुम निल्सि रूका ताकुस्वलिरकुन, “दादलिर्निट!
नावा गोस्टि केन्चि केरेतु लंकतल पेसिवक मन्मड इत्तेके, मा सम्दिरकुन इद गंडम अनि नुक्सन वासि मनो.
22-25 इंद्केट आतेके गिर दर्यम्ने मंट!
नना बोना सेवा कींतोनो, वोनोर दूतल निनेता रात्ने नह्गा वासि, ‘पव्लु निमे वेरिमा.
निमे सीजर महा राजन मुने तप्वक निलंति.
नी पोरो तोह्वल दयते नी सङा मंवलिर सम्दिरङ जीवन गिर बचि कींतोर’ इन्जि नाकुन वेह्तोर.
ना सङा दूतल वेह्ता तीर जर्गंता इन्जेर बगवंतन नम्सेर मंतोन इत्तोन.
अदेन साटि दादलिर्निट!
दर्यम्ने मंट.
बोनय परन सोनो, बति सिरिप रूकये नुक्सन आंता.
26 अनि तप्वक मरट बद तेर उंदि लंकता डर्डिते अरंतट” इन्जेर वेह्तोर.
रूका ताकुस्वलिर तपुस्ले सूड्वल
27 चोव्दा दिवोस्क्ना रातुन ममोट उंडे गिरे अद्रिया सम्दुर्ता येतगा हके-हिके वडिदे सोन्जेरेन मत्तोम.
नड्डुम नर्का बोमि करुम वातपिनय मंदगा लाग्ता.
28 ते वूर उंदि लोकोंड्ना गुंडु* वाट्सि, लग-बग चालिस (40) मीटर्क कोल मंता इन्जेर करि कीतेर.
उंडे जरसि लक सोत्ता पेजे, उंदुंदि जोका अद गुंडु सम्दुरतगा वाट्तेर.
ते लग-बग तीसा (30) मीटर्क कोल मंता इन्जेर करि कीतेर.
29 अस्के डर्डितङ बंडनगा अर्कोम इन्जेर वेरिसि, वूर रूका ताकुस्वलिर पेजेटा बाजनल नालुङ लङर्क* वाट्सि रूकतुन आपुसीतेर.
अनि बस्के पोड्द पेसियर इन्जेर पार्तना कीसेर सूड्सेर मत्तेर.
30 रूका ताकुस्वलिर अगटल तपुस्ले, रूकता मुनेता बाज्ना कोड्डितल लङर्क वाड्तपिनय आसेर, चुडुर रूकतुन रेह्तेर.
31 अस्केन पव्लु, वोर कमंडर अनि सिपायिर सङा, “वीर रूकतगा मत्तेकेन तपा मिरट बचे माया पर्विट” इन्जेर वेह्तोर.
32 ते येंटने सिपायिर नोडेन कोय्सि चुडुर रूकतुन येतगा सुटि कीतेर.
33 बय बय आनेके पव्लु सम्दिरकुन सूड्सि, “चोव्दा दिवोस्कनल मिरट सम्दिर गिरे उपसे सूड्सेर मंतिट.
34 अदेन साटि, मिरट काने तिंदना इन्जेर कोर्सेर मंतोन.
मिरट जीवते मंदना इत्तेके तिंदा लागर.
मीवङ तलनल उंदि केल गिरे कुस्वक्ने मंदंता” इन्जेर वेह्तोर.
35 अहन वेह्चि सम्दिर मुने सारि पिय्सि बगवंतन दनेवाद वेह्तोर.
अनि उरुसि तिंवल सुरु कीतोर.
36 अस्के, वूर सम्दिर गिरे दर्यम कीसि काने तित्तेर.
37 अद रूकतगा ममोट सम्दिर रंड नुह्क सत्तर सार्विर (276) जन्क मत्तोम.
38 वूर सम्दिर तिंदनच्चोर तिता पेजे, रूकतगा मत्ता गोह्क्ना रासितुन सम्दुरतगा वाडि सीसि, रूकतुन हल्को कीतेर.
रूका काच-कूच आय्वल
39 उज्डे माता पेजे, बद लंकत करुम येव्तेर इंवल वूर वोड्के माय्मकि.
बति उस्के डर्डितगा उंदि मोडि दिस्तते, आयर्ते रूकतुन अगा ताकुस्कट इन्जेर सोन्च कीतेर.
रूका काच-कूच आता पेजे सम्दिरे नडिसेर डर्डिते सोंवल
40 अनि लङर्क्नङ नोडेङ कोय्सि, अवेन सम्दुरतगा सुटि कीतेर.
मलुस्वलिक चेकनङ नोडेङ रेह्तेर अनि मुनेता पड्दा निपुस्तेर.
ते अद वडि बरोबर रूकतुन डर्डितेके पासेर वोता.
41 बति डर्डिते येवन मुनेने रूकता कोड्डि उस्केतगा गाडे माता.
ते रूकता पेजेटा बाज जोर्ते वाय्वलिक सम्दुर्तङ हेल्वने टुक्डेङ आसेर मत्ता.
42 जेल बोगे माय्वलिर बोरे गिर नडिसि तपुसि सोंवा इन्जि, वूरकुन जकना इन्जेर सिपायिर सोन्च कीतेर.
43 बति वूरा केय्दल पव्लुन बचि कियना इन्जि कमंडर, “नडियपर्वलिर मोदोल येतगा डेय्सि डर्डिते सोंट.
44 अनि मेय्तुर चेकङ अनि अद रूकतङ उरुङ्तङ टुक्डेङ पिय्सि, चोकोटे डर्डिते सोंट” इन्जेर वोर वेह्तोर.
अहन सम्दिरे तपुसि डर्डितगा वासि बचे मातेर.