पव्लु तना बे-कसुर वालेना इन्जेर वेह्वल
26
1 अस्के अग्रिपा राजल, “नी बारेते बतल वेह्का इंतियो, अद वेहा” इन्जेर पव्लुन इत्तोर.
ते पव्लु तंवा केय चह्चि,
2-3 “अग्रिपा राजा!
यूदुल्क्नगा मंवलिक रीति-रिवज्क अनि जट-पट लाग्वलिक गोस्टिन बारेते नीकुन कुला कुला टावये.
इद दिवोसुन नेटि मी मुने निल्सि ना पोरो यूदुल्क कीतङ पिरदिङ लबड इन्जेर निरुपन किय्ले मोका पुट्ता.
इदेन हिंदल, नाकुन वेले आनंद लाग्सेर मंता.
अदेन साटि नना वेह्वलिक निमे दिहंते केन्ज्कि इन्जेर कोर्सेर मंतोन.
4 “चुडुर-पांदल तार्सिस्नगा अनि येरुसलेम्नगा गिर ना पर्जत रोपो नना बहन पिस्तोन इंवल सम्दिर यूदुलकुन टावये.
5 मोदोडल नाकुन वूर सूड्सि मत्ता काड्कि, उंदि मोका ना बारेते गवा वेह्कोम इंदनिर्ते, मावा दर्मतगा सम्दिरकुन अदिक नेकिङ पिय्सि ताक्वलिर परिसयुल्कुन दात पिस्तोन इन्जि वेहा परंतेर.
6 अनि इंके बगवंतल मा तोत्तुरकुन वाग्दन सीतङ सम्दोन पूरि कींतोर इंवल आसतुन पिय्सि, गल्ति कीतोन दात कचुरित मुने निल्सि मंतोन.
7 इद वाग्दन बर्पुर आयना इन्जेर मा बारा (12) कांदनुर यूदुल्क नर्का-पियल बगवंतना सेवा कीसेर आसते सूड्सेर मंतेर.
अग्रिपा राजा!
यूदुल्क इद आसतुन हिंदले, ना पोरो पिरदि कीतेर.
8 बगवंतल सातुरकुन नेंडुसंतोर इंवल गोस्टितुन नंमवायो इन्जि, मिरट सम्दिर बारि इंतिट?
9 “उंदि गट्कते नना गिर नजरेत्नोर येसुना पोरोडुन मूरि किय्वले नावा काम इत्तपिनय सूड्सेर मंदुन.
10 नना येरुसलेम्नगा अह्ने कीतोन.
अगा मंवलिर डगुक कटोडलिर सीता अदिकार्दे वेलेटिर पवित्रा बक्तलिरकुन जेल्क्नगा वाट्सि, वूरकुन जकन साटि गिरे नना वोप्तोन.
11 सम्दो सुनगोक्नगा सोन्जि, वूर सङा येसु पर्बुना हिजत तेंडुस्ले, वूरकुन तक्लिब्क-दुक्सङ सींदुन.
वूर पोरो बेय सोङुन वासेर, दुस्रोक देस्क्नङ नगुक वेरि गिर सोन्जि, वूरकुन बेय सिक्सङ सीतोन.
12 “इद कामुन साटिने डगुक कटोडलिर्गटल अदिकार अनि हुकुम येच्चि दमस्कु नगुडे सोंले पेसितोन.
13 राजा!
लग-बग बार दुपरिता येलते सोन्जेर मनेके, ना सिर्मुट अनि ना सङा मंवलिर सिर्मुट पोडदुन तेर अदिक जगर्ने मंवल हाबडल वेड्चि अचनक गेर-पाता.
14 ते ममोट सम्दिर बूड अर्तोम.
अस्के, ‘सव्लु!
सव्लु!
नाकुन बारि दुक्सा सीसेर मंति?
तुतरि बेड्डेतुन लाता पाय्वल नीके नुक्सन’ इंवल हेब्रि बासते लेङ नाकुन केन्जा वाता.
15 “ते नना, ‘पर्बु!
निमे बोनि आंदि?’
इन्जेर पूसि कीतोन.
अस्के, ‘निमे दुक्सा सीसेर मंति, वोर येसुना आंदुन’ इन्जि,
16 ‘निमे तेच्चि निला.
नना नीकुन दिस्वल कारन बतल इत्तेके, निमे सूड्तङ गट्नन बारेते अनि नना उंडे मुने तोह्वलिक गट्नन बारेते, गवा वेह्ले ना सेव्कन दात नीकुन नेमि कीसेर मंतोन.
17 नना नी पर्जतल अनि यूदुल्क आयुर वूर्गटल नीकुन बचि कींतोन.
18 वूर यूदुल्क आयुर वूरकुन पाप्ना सिकटितल, पुनेता वेड्चिते अनि सय्तंता अदिकार्दल, बगवंतनेके मलुसन साटि, वूरङ कड्क कोलि किय्ले नीकुन सारि कीसेर मंतोन.
वूर ना पोरो बरोसा इर्सि, वूरङ पाप्क मापि आसि, बगवंतल नेमि कीतुर पवित्रा वालिर बरोबर वूर ईसा येतना इंवले नावा इचा’ इन्जेर येसु नाकुन वेह्तोर.
19 “अदेन साटि अग्रिपा राजा!
स्वर्गनल वाता अद दर्संतुन माने मासि, वोप्सि ताक्तोन.
20 दमस्कु नगुडुरकुन, वूर आता पेजे येरुसलेम्नुर लोकुरकुन, यूदया येरियतुर सम्दिरकुन अनि यूदुल्क आयुर वूरकुन, ‘मीवा पापनल कब्ले माम्ट.
कीतङ सम्दो पापकुन वोप्सि, बगवंतनेके तिरिता गवतुन साटि, चोकोट्नङ काम्क कीसि तोहट’ इन्जेर बोदा वेह्तोन.
21 इद गोस्टितुन हिंदले, यूदुल्क नाकुन मंदिर्तगा पिय्सि, जक्ले कोसिद कीतेर.
22 तेर बति बगवंतना सात नेंड वेरि गिर ना सङा मत्ता काड्किने, चुडुर-डगुक्ना बेद-बाव सेल्वक सम्दिर्कुने गवा वेह्चेर मंतोन.
मोसे अनि दुस्रुर पर्वक्तलिर बविसत्ने बतङ बतङ जर्गनुङ इन्जेर वेह्तेरो, सिरिप अवेने वेह्चेर मंतोन.
23 अव बव इत्तेके, ‘किरिस्तु तक्लिब्क बोगे मासि, साया लागर.
बति अहन सासि-नेंड्वलिर्गटल मोदोडोर आंतोर.
अनि तंवा पर्जा यूदुलकुन अनि यूदुल्क आयुर वूरकुन गिर बगवंतना वेड्चितुन बारेते पचर कींतोर’” इन्जेर पव्लु वेह्चेर मनेकेने,
24 पेस्तु, “पव्लु!
नीवा दिमक करब आता!
निमे वेले करिता विय्दा नीकुन पिसङ कीता” इन्जेर इत्तोर.
25 अस्के पव्लु, “डगुर मान-मर्यदा वाले पेस्तु साब!
नना पिसङ आतोना आयोन.
नना चोकोट्ना दिमक वालेन दात नियत्नङ अनि सत्नङ गोस्टिङे वड्क्तोन.
26 राजन नना वेह्वलिक इव सम्दो टावा मत्ता काड्किने, वेरिवक्ने वड्क्सेर मंतोन.
इव सम्दो राजना नदुडल तपुसिया परोङ इंवल बरोसा नाकुन मंता.
बारितेके, इव सम्दो उंदि मूलतगा मक्डिते जर्ग्मकि.
27 अग्रिपा राजा!
निमे पर्वक्तलिर लिहि कीतङ अवेन बरोसा कींति कि?
हो, मिरट बरोसा कींतिट इंवल नाकुन टावा” इन्जेर पव्लु वेह्तोर.
28-29 अस्के अग्रिपा राजल, “अहा!
इचोर सप्ने नाकुन किर्चन किय्ले आंति सेलेय” इन्जेर पव्लुन इत्तोर.
ते पव्लु “सप्नेयो, कोरुम्नेयो बति मिरटे आय्वा, नेंड नावङ गोस्टिङ केन्ज्वलिर सम्दिर, इव हात्कडिङ तपुसि, दुस्रोक सम्दोनगा ना दाते आयना इन्जेर बगवंतन पार्तना कीसेर मंतोन” इन्जेर वेह्तोर.
30 अहन वेह्ता पेजे, अग्रिपा राजल अनि वोना सेलड बेर्निके, वूर बरोबर गवर्नर पेस्तु अनि मेय्तुर उद्तुर गिरे तेच्चि निल्तेर.
31 अगटल बह्रि पेसिसेर, “मरंता सिक्सा वाटनल, जेल्दगा इरनल वेर मायनल बतय गल्ति किय्मकि” इन्जेर तम्वा तमा वड्क्तेर.
32 अनि अग्रिपा राजल, “सीजर महा राजन मुने वेर तंवा तस्वा आयना इंवक इत्तेके, वेन नना सुटि कियुसींदुन” इन्जेर पेसतुन सङा इत्तोर.