पेस्तु पव्लुन तस्वा किय्वल
25
1 पेस्तु यूदया येरियतोर गवर्नर आसि, मूंद रोज्क आता पेजे, सिजरिया नगुडल येरुसलेम नगुडे सोत्तोर.
2 अस्के अगटुर डगुक कटोडलिर अनि यूदुल्क्नुर पेदोल्क तमो पव्लुन पोरो पिरदि कीता गोस्टि, वोन वेह्तेर.
3 अनि पव्लुन नड्डुम सर्दे जकना इंवल पिलंते, “पव्लुन येरुसलेम सारि कीसि, माकुन मदत कीम साब” इन्जेर पेसतुन वूर कोर्तेर.
4-5 ते पेस्तु, “पव्लु सिजरियता जेल्दगा मंतोर.
अगा वेय्ने सोंदना इन्जेर निर्नय कीतोन.
मिह्गटल मुके वालिरकुन ना पेजेय रोहट.
उंदि मोका वोन्गा बतय गल्ति मत्तेके, वोन पोरो अगने पिरदि किया वचो” इन्जेर वूरकुन वेह्तोर.
6 अनि पेस्तु, आट-दहा रोज्क येरुसलेम्नगन मन्जि, सिजरिया मल्सि सोत्तोर.
सोत्ता इमुन नेटि तस्वा किय्ले, राजा-गादितगा उच्चि, “पव्लुन केयट” इन्जेर सिपायिरकुन हुकुम सीतोर.
7 ते पव्लु वाता पेजे, येरुसलेमनल वातुर यूदुल्क्नुर पेदोल्क पव्लुन सिर्मुट निल्सि, वेले गल्तिङ वोन पोरो वाड्तेर.
बति अवेनगटल उंदि गिर निरुपन किया पर्मकि.
8 अस्के पव्लु, “यूदुल्क्ना कानुंतुने आयि, मंदिर्तुने आयि, सीजर महा राजने आयि उल्टा आसि, बतय गल्ति किय्मकि” इन्जेर जवब सीतोर.
9 बति वोर पेस्तु, यूदुल्क्ना केय्दे चोकोट्ना पोरोल कमय कियना इन्जि, “येरुसलेम्नगा, ना मुने नीवा गोस्टिता तस्वा किय्ले वोपंति कि?”
इन्जेर पव्लुन पूसि कीतोर.
10 ते वोर, “रोमा राज्नगा मंवल उंदि कचुरित मुने निल्सि मंतोन.
नाकुन तस्वा किय्वल जागा इदे आंद.
नना यूदुलकुन बतय वायुट किय्मकि इंवल नीकुन कुला कुला टावये.
11 उंदि मोका नाकुन मरंता सिक्सा वाटनल वायुट कीसि मंद्कते, नना सायन साटि गिरे पेजे वायोन.
बति वीर यूदुल्क इंके वेरि, ना पोरो कीतङ पिरदिङ सम्दो लबडे मत्तेके, वीरा केय्दे नाकुन हव्लि किय्वल अदिकार बोने सेले.
रोमा राज्नोर सीजर महा राजने, इद गोस्टिता तस्वा कीम इन्जि, कोरंतोन” इन्जेर पव्लु वेह्तोर.
12 ते पेस्तु तंवुर वेह्वल-तोह्वलिरकुन पूसि कीसि, “निमे सीजर महा राजने तस्वा किय्ले कोरंतोन इत्ता काड्कि, नीकुन वोन्गने रोहंतोन” इन्जेर पव्लुन वेह्तोर.
पव्लु अग्रिपन अनि बेर्निकेन मुने निल्वल
13 कहि रोज्क आता पेजे अग्रिपा राजल, वोना सेलड बेर्निकेन* सङा पेसतुन बेटे माय्ले सिजरिया वातोर.
14 वूर अगन वेले रोज्क मत्तेर.
अस्के पेस्तु, पव्लुन बारेता गोस्टितुन अग्रिपा राजन सङा, “पेलिक्सु, वोरोर माय्नन जेल्दगन इर्सि सोत्तोर.
15 वेर माय्नन पोरो नना येरुसलेम्नगा मनेके, डगुक कटोडलिर अनि यूदुल्क्नुर पेदोल्क पिरदिङ कीसि, ‘वोन मरंता सिक्सा वाटा’ इन्जेर कोर्तेर.
16 ते वूरकुन नना, ‘बोन पोरो पिरदि कीतिटो, वोर तंवा बारेते मुकबिलि वड्कबीगर, रोमतोर अदिकारिना आसि, वोन मरंता सिक्सा वाटा वायो’ इन्जि, वेह्तोन.
17 वूर इगे वासि मीरे माता पेजे, नना कोरुम किय्वक्ने इमुन नेटि राजा-गादितगा उच्चि, ‘पव्लुन केयट’ इन्जेर हुकुम सीतोन.
18 वोर वाता पेजे, पिरदि किय्वलिर निल्सि वड्क्तेर.
बति नना सोन्च कीसि मत्तोन अव करब्नङ गल्तिनल, उंदि गल्ति गिर पव्लुन पोरो वाटा पर्मकि.
19 इदेन बद्लि, वूर तम्वा दर्मतुन बारेते अनि सातोर येसु इंवल माय्नन बारेतेन गोस्टिङ जर्ग्तङ.
बति पव्लु, ‘येसु जीवतेन मंतोर’ इन्जेर वेह्तोर.
20 आतङ गोस्टिना बहन तस्वा किय्वलो टावा सेल्वा काड्कि, ‘येरुसलेम्नगा, नीवा गोस्टिता तस्वा किय्ले वोपंति कि?’
इन्जेर पव्लुन पूसि कीतोन.
21 बति वोर, सीजर महा राजन मुने वोना तस्वा आनल वेरि, तनकुन बचि कियना इन्जि नाकुन कोर्तोर.
ते नना, ‘महा राजन मुने वोनल वेरि, वोन केप्सेर मंट’ इन्जि सिपायिरकुन हुकुम सीतोन” इन्जेर अग्रिपा राजन पेस्तु वेह्तोर.
22 अस्के अग्रिपा राजल, “वोर मायनल वेह्वल नना गिर केन्जना इंतोन” इन्जेर वेह्तोर.
ते “नाडि मिरट केन्जा वचो” इन्जेर पेस्तु इत्तोर.
अग्रिपा राजल पव्लुना तस्वा किय्वल
23 ते इमुन नेटि अग्रिपा राजल अनि वोना सेलड बेर्निके इविर डग-मग सव्रे मासि, अद राज्नुर पेर्सुर कमंडरकुन सङा अनि अद नगुडुर मुके लोकुर सङा वाजा-गाजते वासि, राजा-गादितगा उत्तेर.
अस्के पेस्तु हुकुम सीनेकेन पव्लुन अद कचुरित मुने तत्तेर.
24 ते पेस्तु, “राजा-गादितगा उच्चि मंवल अग्रिपा राजन अनि मेय्तुर सम्दिरकुन नावा दंडोस.
वेर माय्नन मिरट सूड्सेर मंतिट.
येरुसलेम्नगा अनि इगे सिजरियतगा गिर, ‘वेर पिस्ले कामि सियोर’ इन्जेर यूदुल्क किलिसेर नाकुन पिरदि कीतेर.
25 बति मरंता सिक्सा वाटनल वेर बदे गल्ति किय्मकि इन्जेर करि कीतोन.
सीजर महा राजन मुने तंवा तस्वा आयना इत्ता काड्कि, वेर माय्नन रोमा नगुडे रोह्ले निर्नय कीतोन.
26 “अनि, ‘वेन बारेते महा राजन चिटि लिहि कीसि सारि कीक’ इन्जि मत्तोन.
बति बतय कारन पुट्मकि.
अदेन साटि, इंकेतेर सवल्क पूसि कीतेके, मीकुन बतय कारन पुटर्ते चिटि लिहि किया वचो इन्जि, मी सम्दिर मुने अनि मुकेते अग्रिपा राजन मुने वेन केयुस्तोन.
27 जेल्दगा अर्तोनङ गल्तिङ वेहा बीगर रोह्वल बरोबर आयो इन्जि, नाकुन मंदे वासेर मंता” इन्जेर वेह्तोर.