पव्लुन पोरो पिरदि किय्वल
24
1 सियुङ रोज्क आता पेजे पेर्सोर कटोडल अननियल, कहितुर पेदोल्क अनि तेर्तुलल इंवल वकिलतुन तम्वा सङा वोसि, गवर्नरतगा पव्लुन पोरो पिरदि कीतेर.
2-3 पव्लुन रोपो केयुस्ता पेजे, वोर तेर्तुलल, “पर्जा सम्दिर मानि कीसि, वनि किय्वल पेलिक्सु साब!
नी हिंदल ममोट वेले सांत्ने मंतोम.
निमे कीतङ चोकोट्नङ कामकुन मरुङ्वक्ने, मा पर्जा सम्दिर मीकुन तन-मंदल दनेवाद वेह्चेर मंतेर.
4 नी टेमुन करब किय्वक्ने, नना इव गोस्टिन पोडि कीसि वेहोन.
अदेन साटि, मा पोरो दया इर्सि, बस्केट केन्ज्तपे, दिहंते केन्ज्कि इन्जि कोर्सेर मंतोन.
5 वेर मायनल वेलुम पेत्तेन दात्नोर.
दुनियतुर यूदुलकुन नड्डुम जग्डङ पुटुस्वल आंदुर.
नजरेत्ना बक्तिता सरदुन मुने ताकुस्वल आंदुर.
6 अचोरे आय्वा, वेर मावा मंदिर्तगा वासि, बाटि किय्ले कोसिद कीतोर.
ते ममोट वेन पिय्तोम.
7 *[मावा दर्मा-ग्रंतुन पिय्सि तस्वा किय्ले सूड्तोम.
बति कमंडर कलव्दिया लूसियल तंवुर सिपायिर सङा वासि, वेन मह्गटल जुल्मते पिय्सि वोतोर.
अनि वेन पोरो पिरदि किय्वलिरकुन मिह्गा वायना इन्जेर हुकुम सीतोर.]
8 निमे वेन सवल्क पूसि कीतेके, ममोट पिरदि किय्वलिक करल कि लबड इंवल नीकुने करे मांतङ” इन्जेर वेह्तोर.
9 अगा वातुर सम्दिर यूदुल्क, “इव सम्दो करलेन” इन्जेर वेह्तेर.
पेलिक्सुन पव्लु तंवा गोस्टि वेह्वल
10 अस्के वोर गवर्नर इङे निमे वड्का इन्जेर पव्लुन केय हालि कीतोर.
ते पव्लु, “निमे वीर पर्जतुन नड्डुम वेले साल्कनल नाय्दा तस्वा कीसेर मंति इंवल नाकुन टावये.
अदेन साटि नना उंडे अदिक आनंद्ने नावा गोस्टि वेहंतोन.
11 येरुसलेम्नगा नना पार्तना-विंति किय्ले सोन्जि, बारा रोज्क गिर आयोये इन्जेर, वीर्गटल बोन पूसि कीसि गिर करि किया वचो.
12 मंदिर्तगन आयि, सुनगोक्नगन आयि, नगुडा उंडे बदे जागतेन आयि, नना बोन सङन जट-पट लाग्वल अनि पर्जतुन हक्लि कीसि लोलिङ किय्वलिक वीर सूड्मकि.
13 इंके वेरि पिरदि कीतनल उंदि गिर नना कीतप, नी मुने वीर निरुपन किया परुर.
14 “तेर बति नना यूदुल्क लबड इंवल नजरेत्ना बक्तिता सरदुन बारेता गोस्टितुन वोपंतोन.
अनि मावुर तोत्तुरोर बगवंतना सेवा कीसेरेन, मोसेना कानुंतगा अनि दुस्रुर पर्वक्तलिर लिहि कीतनगा मंवल सम्दोतुन नमंतोन.
15 नियत्ने अनि बगड-नियत्ने ताक्वलिर बोरे गिर आयि, सासि-नेंडंतेर इंवल आसा वीरकुन मत्तपे, बगवंतन हिंदल नाकुन गिर मंता.
16 अदेन साटि, नना बगवंतन मुने अनि माय्नन मुने गिर मन-दिल्ते डाग सेल्वक बस्केट मंदना इन्जेर कोसिद कीसेर मंतोन.
17 “नना येरुसलेम सुटि कीसि सोन्जि, कहि साल्क आता पेजे, नावुर गरिब पर्जतुन दर्मा किय्ले अनि मंदिरतगा अर्पनङ सिय्ले येरुसलेम्नगा मल्सि वातोन.
18-19 अद वकत्ने मंदिर्ता आव्रतगा सुदुड-पांदा कार्या कीनेके, आसियतल वातुर कहितुर यूदुल्क नाकुन सूड्तेर.
अस्के गुब्डा सेले अनि लोलि गिर सेले.
वूरकुन नह्गा बतय तप मत्तपिनय दिस्तेके, वूर वासि नी मुने पिरदि किया वचो.
20 सेलेके नना संहेद्रिंतुर मुने निल्सि मनेके तेर, बतय गल्ति पुट्सि मंदर्ते, वीर वातुरकुन पूसि कीम्ट.
21 वूर सम्दिर मुने, ‘माय्नलिर सासि-नेंडंतेर’ इन्जेर जोर्ते इत्तोन.
सिरिप इद कारंतुन हिंदले, मी मुने गल्ति कीतोन दात निल्सि मंतोन” इन्जेर पव्लु वेह्तोर.
22 अस्के पेलिक्सु नजरेत्ना बक्तिता सरदुन बारेते चोकोट करि कीसि मत्ता काड्कि, “वोर कमंडर लूसियल वाता पेजे, इद गोस्टिता निर्नय येतंतोन” इन्जेर अद तस्वतुन वाय्दा वाड्तोर.
23 अनि सिपायिरोर अदिकारिन, “पव्लुन केप्सेर मंट बति, वोन जरसि मोक्डो सुटि कीम्ट.
बोरे वोनुर लोकुर वोनङ जुरत्क पूरि किय्ले वातेके, वूरकुन तक्लिब सिय्मट” इन्जेर पेलिक्सु हुकुम सीतोर.
पेलिक्सुन अनि दुरुसिल्लन मुने पव्लु निल्वल
24 कहि रोज्क आता पेजे, पेलिक्सु, यूदुल्क्ना जातिता तंवा बाय्को दुरुसिल्लन सङा वातोर.
पव्लुन वोर केयुस्तोर.
ते पव्लु, येसु किरिसतुन पोरो बरोसा इर्वडुन बारेते वूरकुन वेह्तोर.
25 बति अहन पव्लु, नियत्ने अनि जरब्ने पिस्वडुन बारेते अनि वाय्वल तस्वता दिवोसुन बारेते वेह्चेर मनेके, पेलिक्सु वेरिसि, “इंकेट्क आयर!
निमे सोन.
नाकुन वकत मनेके, नीकुन केयुसंतोन” इन्जेर वेह्तोर.
26 अद आता पेजे, पव्लु तनकुन बतय लन्चेम सिय्मड मंदर इंवल आसते, वोन गडि गडि तन्गा केयुसि, वोर पेलिक्सु वड्क्सेर मंदुर.
27 अहन रंड साल्क गुज्रे माता पेजे, पेलिक्सुन बद्लि, पूनोर गवर्नर पोर्कियो पेस्तु वातोर.
अस्के यूदुल्क्ना केय्दे चोकोट्ना पोरोल कमय किय्ले, पेलिक्सु, पव्लुन अह्ने जेल्दगन इर्सि सोत्तोर.