23
1 पव्लु पन्च्नुरकुन नेह्ना सूड्सि, “तादल-तमुर्निट!
बगवंतना नदुडे, मन-दिलतगा डाग सेल्वक्ने नेंड वेरि नना पिस्तोन” इन्जेर वेह्तोर.
2 अद केन्चि पेर्सोर कटोडल अननियल, “वोना तोड्दगा पाम्ट” इन्जेर पव्लुन बग्ला मंवल सिपायिन हुकुम सीतोर.
3 अस्के पव्लु, “रोपो उंदि इर्सि बह्रि उंदि वड्कंतिय.
* नीकुन बगवंतल पांतोर.
मोसेना कानुंतुन पिय्सि, नावा तस्वा किय्ले उच्चि, अद कानुंतुन उल्टा आसि, नाकुन पाय्ले हुकुम सीसेर मंतिय” इन्जेर इत्तोर.
पव्लु पन्च अनि अदिकारिर मुने निल्वल
4 करुम निल्सि मंवलिर, “नीकुन बचोर दर्यम बगवंतनोर पेर्सोर कटोडनय हिजत वोंतिय?”
इन्जेर पव्लुन इत्तेर.
5 ते अद केन्चि पव्लु, “दादलिर्निट!
पेर्सोर कटोडल इन्जि नाकुन टावा सेले.
दर्मा-ग्रंत्नगा, ‘पर्जतेर अदिकारिर बारेते करब वड्क्वा’+ इन्जि लिहि कीसि मंता” इन्जेर वेह्तोर.
6 वूर उच्चि मंवलिर संहेद्रिंतुर कहि जन्क सदुकयुल्क अनि कहि जन्क परिसयुल्क मंतेर इन्जेर, पव्लुन वोड्कि आता पेजे, “तादल-तमुर्निट!
नना परिसयुल्क्ना बाज्नोना आंदुन.
ना तोत्तुर गिरे परिसयुल्के आंदिर.
नना सिरिप सातुर वूर नेंडंतेर इंवल आसतुन हिंदले, मी मुने गल्ति कीतोन दात निल्सि मंतोन” इन्जेर वेह्तोर.
7 अद गोस्टि वेह्ता पेजे, संहेद्रिंतुर सदुकयुलकुन अनि परिसयुलकुन नड्डुम जग्डा लाग्सि, रंड पाल्टिङ आतेर.
8 बारितेके, माय्नलिर सासि-नेंड्वल, दूतलिर अनि आत्मङ इंवलिक मंतङ इन्जेर परिसयुल्क इंतेर.
बति इव सम्दो सेलेङ इन्जेर सदुकयुल्क इंतेर.
9 इदेन हिंदल, संहेद्रिंतगा जग्डा मोदोल आता.
अस्के येंटने परिसयुल्क्ना बाज्नुर सास्तिरिर सोङ्ने तेच्चि, “वेर माय्ननगा माकुन बदे कसुर दिसेर सेले.
मोका दूतल सेलेके आत्मा वोन सङा वड्कुस्ता.
वोर वड्क्ता करलेन मंदर” इन्जेर जोर्ते वेह्तेर.
10 ते अद जग्डा उंडे अदिक बडे माता.
वूर पव्लुन हिके-हके ऊम्सि चिंदा चिंदा कीनिर इन्जेर वोर कमंडर वेरिसि, “सोन्जि वूर्गटल पव्लुन किलतगा पिय्सि वरट” इन्जेर सिपायिरकुन हुकुम सीतोर.
11 अद नेटि रातुन पर्बु पव्लुनगा वासि, “पव्लु, निमे गटि-दीर्यते मन.
इगे येरुसलेम्नगा ना बारेते बहन गवा वेह्तियो, अह्ने रोम्नगा गिर गवा वेहा लागर” इन्जेर वेह्तोर.
पव्लुन जकन साटि कुट्रा किय्वल
12 इमुन नेटि सक्रे कहितुर यूदुल्क, “वोर पव्लुन जकनल वेरि तिंवक-उंवक्ने मंदंतोम” इन्जेर वोट वाट्सि कुट्रते मत्तेर.
13 इहिन कुट्रा किय्वलिर चालिस (40) जनकुन तेर अदिक मत्तेर.
14 वूर लोकुर, डगुक कटोडलिर्गा अनि यूदुल्क्नुर अदिकारिर्गा सोन्जि, “ममोट वोर पव्लुन जकनल वेरि, तिंवक-उंवक्ने मंदंतोम इन्जि वोट वाड्तोम.
15 अदेन साटि मिरट, वीर संहेद्रिंतुर हिंदल आसि, वेर पव्लुन बारेते उंडे इचुर वेले करि कीकोम इंतोम इन्जि, वोर कमंडरतुन वेह्चि, पव्लुन सारि कीनल पूसि कीम्ट.
अहन वोर संहेद्रिंतुर्गा येवन मुनेने, वोन जक्ले तयर मंदंतोम” इन्जेर वेह्तेर.
16 बति पव्लुनोर सडेमरि इद कुट्रतुन बारेते करि कीसि, सोन्जि पव्लुन वेह्तोर.
17 ते पव्लु अदिकारिर्गटल वोरोन तन्गा केय्सि, “कमंडरतुन उंदि गोस्टि वेहंतोर बेरे.
वेर डियोन कमंडरतगा वोम” इन्जेर वेह्तोर.
18 अस्के वोर अदिकारि डियोन कमंडरतगा वोसि, “वेर डियोर नीकुन उंदि गोस्टि वेहंतोर बेरे.
निह्गा वोम इन्जि, जेल्ते मंवल पव्लु नाकुन पूसि कीतोर” इन्जेर वोन वेह्तोर.
19 ते कमंडर वोर डियोना केय पिय्सि, बग्ला वोसि, “नाकुन बतल वेह्ले वाति?”
इन्जेर पूसि कीतोर.
20 ते वोर डियोर, “कहितुर यूदुल्क पव्लुन बारेते वटि आगय उंडे अदिक करि कीकोम इन्जेर मंतेर.
वूर पव्लुन संहेद्रिंतुर्गा सारि कीम इन्जि, नीकुन पूसि किय्ले, नाडि वाय्वलिर मंतेर.
21 दया कीसि, वूरा विनंतितुन वोप्मा.
बारितेके चालिस (40) जनकुन तेर अदिक मांदि पव्लुन पिय्ले सर्दगा तयर मंतेर.
वोन जकनल वेरि तिंवक-उंवक्ने मंदंतोम इन्जि, वोट वाट्तेर.
सिरिप नीवा जवबुन साटि इंके सूड्सेर मंतेर” इन्जेर वेह्तोर.
22 ते वोर कमंडर, “नाकुन इद गोस्टि वेह्तप दुस्रोन बोने वेह्मा” इन्जेर हुकुम सीसि, अगटल वोर डियोन सारि कीतोर.
पव्लुन सिजरिया नगुडे रोह्वल
23-24 अद आता पेजे, वोर कमंडर तंवा बूड्नुर इविर अदिकारिरकुन केय्सि, “नेंड नर्का नोव (9) नेक्नेके, रंड नुह्क (200) जन्क सिपायिर, सत्तर (70) जन्क कोडङ ताकुस्वलिर सिपायिर, रंड नुह्क (200) जन्क गोर्कङ मंवलिर सिपायिरकुन पिय्सि पव्लुन गिर उंदि कोडतगा उपुसि, सिजरिया वोम्ट.
गवर्नर पेलिक्सुनगा चोकोटे वेन हव्लि कीसि वरट” इन्जेर हुकुम जारि कीतोर.
25 अनि वोर कमंडर इहिन इन्जेर उंदि चिटि लिहि कीतोर.
26 “मान-मर्यदा वाले मा गवर्नर पेलिक्सु साबुन, दहा बोटना मुजेरा दोसि, नना कमंडर कलव्दिया लूसियना लिहि कीसेर मंतोन.
27 नना रोह्वल वेर माय्नन यूदुल्क पिय्सि जक्लेन सूड्तेर.
ते नना रोमतोर मायनल इन्जेर करि कीसि, सिपायिरकुन पिय्सि सोन्जि, बचि कीतोन.
28 वोन बारि जक्ले आंतेरो करि कीका इन्जेर संहेद्रिंतुर अदिकारिर्गा वोतोन.
29 अस्के वूर तम्वा दर्मता कानुंतुन पिय्सि, बद्दो कसुर कीतोर इत्तेर.
बति मरंता सिक्सा वाटनल सेलेके जेल्दगा इरनल वेन्गा बदे कसुर सेले.
30 अद आता पेजे, वूर यूदुल्क वेन जक्ले कुट्रते पिलन वाट्सि मंतेर इंवल गिर करे माता.
अदेन साटि येंटने वेन मिह्गा सारि कीतोन.
वेन पोरो पिरदि किय्वलिरकुन नी मुने इद नाय्दा तस्वा किया वचो इन्जेर हुकुम सीतोन.
इचोरे गोस्टि, दनेवाद.”
31 वोर कमंडर हुकुम सीता तीर वूर सिपायिर अद नेटि रातुन पव्लुन अंतिपत्रि नगुर वेरि वोतेर.
32 इमुन नेटि पव्लुन सङा सोंले, कोडन ताकुस्वलिर सत्तर (70) जन्क सिपायिर रेहे मातेर अनि मेय्तुर सिपायिर सम्दिर मल्सि किलतगा वातेर.
33 वूर सिजरिया नगुडे येव्सि कमंडर लिहि कीसि सीता चिटितुन अनि पव्लुन गवर्नरतगा हव्लि कीतेर.
34 वोर गवर्नर अद चिटितुन वाचि कीसि, “निमे बद येरियतोनि आंदि?”
इन्जेर पव्लुन पूसि कीतोर.
ते वोर, “नना किलिकिया येरियतोना आंदुन” इन्जेर जवब सीतोर.
35 अस्के, “नी पोरो पिरदि कीतुर वाता पेजे, नीवा तस्वा कींतोन” इन्जेर पव्लुन वेह्तोर.
अनि, “पव्लुन हेरोद दोह्पुसीता किलतगा इर्सि, केप्सेर मंट” इन्जेर सिपायिरकुन हुकुम सीतोर.