22
1 “तादुर-बाबुर्निट!
नना वेह्वल जवबुन केन्जट” इन्जेर पव्लु कोर्तोर.
2 वोर हिब्रु बासते वड्क्वल केन्चि, उंडे इचुर चुप-चाप आतेर.
3 अस्के पव्लु, “नना यूदुल्क्ना जातितोना आंदुन.
किलिकिया येरियता तार्सिस नगुडे नावा जल्मा आता.
बति इद येरुसलेम नगुडेन बेर्स्तोन.
यूदुल्क्ना कानुंता गियंतुन बरोबर करिले, गमलियेल गुरुनगा सिक्सान येत्तोन.
नेंड मिरट सम्दिर बहन बगवंतन पोरो बाव-बक्तिते मंतिटो, अह्ने नना गिर बक्तिते मंदुन.
4 येसुना सरि पिय्सि ताक्वलिरा जीवा सोनल वेरि दुक्सा सीसेर, वेय्लो-माय्नलिरकुन पिय्सि जेल्क्नगा वाट्सेर मंदुन.
5 इदेन बारेते, पेर्सोर कटोडल, संहेद्रिंतुर पेदोल्क सम्दिरे गवा मंतेर.
अनि वूरे दमस्कु नगुडे मंवलिर दादलिरकुन चिटिङ लिहि कीसि, नह्गा सीतेर.
ते नना अगा मंवलिर येसुनुर बक्तलिरकुन दोह्चि, येरुसलेम तरना अनि सिक्सा वाटना इन्जेर सोन्च कीसि, वूरकुन तर्ले दमस्कु पेसितोन.
पव्लु तना मारिता गोस्टि वेह्वल
6 “अहन वूरकुन तर्ले, नना दमस्कु नगुडुन करुम येव्नेकेते, बार दुपरि आता.
अस्के अचनक हाबडल बेय जगर्ने वेड्चि ना सिर्मुट गेर-पाता.+
7 ते नना बूड अर्तोन.
अस्के, ‘सव्लु, सव्लु नाकुन बारि दुक्सा सीसेर मंति?’
इंवल उंदि लेङ नाकुन केन्जा वाता.
8 ते नना, ‘पर्बु!
निमे बोनि आंदि?’
इन्जेर पूसि कीतोन.
अस्के, ‘निमे दुक्सा सीसेर मंति, वोर नजरेत्नोर येसुना’ इन्जेर लेङ केन्जा वाता.
9 ना सङा मंवलिर अद वेड्चितुन सूड्तेर, बति ना सङा वड्क्ता लेङ वूरकुन अर्तम आय्मकि.
10 अस्के, ‘पर्बु!
नना बतल कियना इंति?’
इन्जेर पूसि कीतोन.
ते पर्बु, ‘निमे तेच्चि दमस्कु नगुडे सोन.
अगा सोत्ता पेजे, बतल कियना इंवल सम्दो नीकुन वेह्वल जर्गंता’ इन्जेर नाकुन वेह्तोर.
11 अद मय्मता वेड्चित सूड्सि, नावा नदुर बंद आता.
ते ना सङा मंवलिर नावा केय पिय्सि दमस्कु वोतेर.
12 “अद दमस्कु नगुडे अननिया इंवल मायनल मत्तोर.
वोर दर्मता कानुंतुन पिय्सि, बाव-बक्तिते ताक्सेर, अगटुर सम्दिर यूदुल्क्ना केय्दे चोकोट्ना पोरोल कमय कीतोर.
13 वोर नह्गा वातोर अनि करुम निल्सि, ‘सव्लु दादा!
नीकुन नदुर वायि’ इत्तोर.
अस्के येंटने नावङ कडकुन नदुर वाता.
ते वोन सूडा पर्तोन.
14 अस्के वोर, ‘मा तोत्तुरोर बगवंतल, तंवा इचतुन करि कियन साटि, तंवोर नियत्नोर सेव्कल येसुन सूडन साटि अनि वोनङ गोस्टिङ केन्जन साटि, नीकुन बगवंतल नेमि कीतोर.
15 निमे सूड्तङ अवेन अनि केन्ज्तङ अवेन सम्दिरकुन वेह्ले गवदारनि आंति.
16 ते इंके बारि कोरुम कींति?
तेच्चि, पर्बुना पोरोडे पार्तना कीसि, बाप्तिस्मा येता.
अस्के पर्बु नीवङ पापकुन नोर्सि वाटंतोर’ इन्जेर वेह्तोर.
पव्लु यूदुल्क आयुर वूरकुन बोदा वेह्वल
17 “अद आता पेजे, नना तिरिसि येरुसलेम वासि, मंदिर्तगा पार्तना कीसेर मनेके, नाकुन दर्संते पर्बु दिस्तोर.
18 अहन दिसि, ‘निमे वेय्ने तेच्चि येरुसलेम सुटि कीसि सोन.
ना बारेते निम वेह्वल गवतुन वीर वोपुर’ इन्जेर पर्बु नाकुन वेह्तोर.
19 अस्के, ‘पर्बु!
नना हर सुनगोग्नगा सोन्जि, बक्तलिरकुन पिय्सि, जेल्क्नगा वाटुसि, पायुस्तोन इंवल गोस्टि सम्दिरकुन टावा.
20 अचोरे आय्वा, नीवोर गवदारल स्टीपेंता नेतुर तुह्नेके, वोना मरंतुन वोप्तोन.
वोना परन येत्वलिरङ सालुवङ केप्सेर, अगने मत्तोना आंदुन’ इन्जेर वेह्तोन.
21 तेर बति पर्बु, ‘सोन!
नना लङ मंवलिर यूदुल्क आयुर वूर्गा नीकुन रोहंतोन’ इन्जि नाकुन वेह्तोर” इन्जेर पव्लु वूरकुन वेह्तोर.
22 अस्के वेरि, चोकोटे केन्ज्वलिर, इव गोस्टिङ बस्केते केन्ज्तेरो, अस्के, “इङे वेर पिसि गिर पाय्दा सेले.
वेर दर्तुरित पोरो मंवक्ने जक्सि वाटट” इन्जेर किलितेर.
23 वूर तम्वा सोङुन तोह्ले किलिसेर तम्वङ सालुवङ तेंड्सि हालि कीसेर, दुबा पोरो तडिसेर मनेके,
24 वोर कमंडर गुब्डतुर बारि किलिसेर मंतेर इंवल करि किय्ले, पव्लुन चाटल्क्ने पायुसि, कारन पूसि कियना इन्जि, “वेन किलतगा रोपो वोम्ट” इन्जेर सिपायिरकुन हुकुम सीतोर.
25 अस्के वूर सिपायिर चाटल्क्ने पाय्ले वोन दोह्चेर मनेके, चुडुर अदिकारिन सङा, “तप कीता अद निरुपन आय्वक मुनेने, रोमतोर माय्नन चाटल्क्ने पायुस्वल नायम आंद कि बतल?”
इन्जेर पव्लु पूसि कीतोर.
26 अद केन्चि वोर चुडुर अदिकारि, कमंडरतगा सोन्जि, “वोन निमे बतल कियुस्लेन आंति?
वोर रोमतोर मायनल आंदुर बेरे” इन्जेर वेह्तोर.
27 अस्के वोर कमंडर सोन्जि, “निमे रोमतोर माय्ननि आंदिय?”
इन्जेर पूसि कीतोर.
ते पव्लु, “हो” इन्जेर जवब सीतोर.
28 ते वोर कमंडर, “नना रोमतोर माय्नना आय्ले, वेले कोतङ सीतोन” इन्जेर इत्तोर.
बति पव्लु, “नना पुट-गड्मितले रोमतोर माय्नना आंदुन” इन्जेर वेह्तोर.
29 अस्के येंटने वोन सवल्क पूसि किय्ले, आय्वलिर पेजे जर्ग्तेर.
अनि रोमतोर मायनल इन्जि करि कीता पेजे, वोन हात्कडि वाट्ता काड्कि, वोर कमंडर गिर वेरितोर.
संहेद्रिंतुर पेदोलकुन मुने पव्लु निल्वल
30 इमुन नेटि कमंडर, पव्लुन पोरो यूदुल्क बारि कसुर वाड्सेर मंतेर इंवल करि कीका इन्जि, वोनङ हात्कडिङ सुटि कियुस्तोर.
पेर्सोर कटोडलिरकुन अनि संहेद्रिंतुर पेदोलकुन मीरे मायना इन्जेर हुकुम सीतोर.
अहन मीरे माता पेजे पव्लुन वूर मुने तचि निपुस्तोर.