पव्लु येरुसलेम सोंवल
21
1 वूर सम्दिरकुन दांतोम इन्जेर ममोट वेह्चि, रूकते सड्कल कोसु लंकतगा सोत्तोम.
अगटल दुस्रो नेटि, रोदु लंकतगा येव्तोम.
अगटल पेसिसि, पतरा इंवल चहर्ते सोत्तोम.
2 अगटल पोयेनिसिया सोंले तयर मत्ता अद रूकतुन सूड्सि, उच्चि पेसितोम.
3 अहन सोनेके सय्परस लंका दिस्तते, ताना तेल्न्गड बाजनल वीड्सि, सिरिया येरियते सोत्तोम.
अद येरियता तूरु नगुडगा रूकतल सामन रेह्वल मत्ता काड्कि आग्तोम.
4 अगा बक्तलिर मंतेर इंवल करि कीसि, वूर तोडो येडुङ रोज्क मत्तोम.
वूर पवित्रा आत्मता सक्तिते, “निमे येरुसलेम सोन्मा” इन्जेर पव्लुन वेह्तेर.
5 बति अगटल पेसिवल वकत वाता पेजे, मावा सरि ममोट पेसितोम.
अस्के बक्तलिर सम्दिर गिरे तम्वङ वेय्लोक अनि मरि-मियडे मीरे मासि नगुडुन बह्रि सम्दुर्ता डर्डि वेरि वातेर.
ते अगा मुर-टोङ्रङ कोट्सि ममोट सम्दिरे पार्तना कीतोम.
6 ममोट वूर सम्दिरकुन दांतोम इन्जेर वेह्चि, रूकते पेसितोम.
वूर तम्वङ रोह्क सोत्तेर.
7 ममोट तूरुतल पेसिसि, तोलेमयि नगुडे यात्रा कीसेर येव्तोम.
अगा मंवलिर बक्तलिरकुन चोकोट-वायुट पूसि कीसि, वूर्गा उंदि दिया मत्तोम.
8 इमुन नेटि ममोट, सिजरिया नगुडे चोकोट्ना कबुर पचर किय्वल पिलिप्ना रोन आग्तोम.
वेर पिलिपु येरुसलेम नगुडगा काने अनि कोतन रांडे वेय्लोकुन तूस्ले नेमि कीतुर येड्विर बक्तलिर्गटल वोरोर आंदुर.+
9 वोर पिलिपुन नालुङ जनिक कोरो पेकिङ मत्तङ.
अव नालुङ्ते जनिक पवित्रा आत्मता सक्तिते बगवंतनङ गोस्टिङ वेह्ंदुङ.
10 अगा ममोट वेलेन रोज्क मत्तोम.
अस्के अगबु इंवल पर्वक्तल यूदयतल मह्गा वातोर.
11 वोर वासि, पव्लुना नडि दोह्वल सेला येच्चि, तंवङ केय-कालकुन दोह्चि, “इद सेला बोना आंदुयो, वोर माय्नन येरुसलेम्नुर यूदुल्क इहिन दोह्चि, यूदुल्क आयुर वूरकुन हव्लि कींतेर इन्जि, पवित्रा आत्मा वेह्चेर मंता” इन्जेर इत्तोर.
12 इद केन्चि ममोट अनि अगटुर मीरे मासि, “येरुसलेम सोन्मा” इन्जेर पव्लुन जुल्मा कीतोम.
13 बति पव्लु, “मिरट दुक्सते आड्सेर, नावा दिलतुन बारि हालि कींतिट?
येसु पर्बुना पोरोडुन साटि येरुसलेम्नगा नाकुन केय-काल्क दोह्चि हव्लि किय्वले आयो बति, पर्बुन साटि परन सिय्ले गिर नना तयर मंतोन” इन्जेर जवब सीतोर.
14 पव्लु वोप्वा काड्कि, “पर्बुना इचा तीर जर्गि” इन्जेर ममोट दब मत्तोम.
15 कहि रोज्क आता पेजे, माकुन पह्जे मत्ता अद सामन पिय्सि, येरुसलेम सोत्तोम.
16 सिजरियतल वातुर कहितुर सिस्यलिर मा सङा वासि, मोदोडल बक्तल आसि मंवल मनसोंता रोन केय्सि वोतेर.
ते अगा ममोट मत्तोम.
वेर मनसोन सय्परस लंकतोर आंदुर.
येरुसलेम्नगा पव्लु पेदोलकुन बेटे माय्वल
17 ममोट येरुसलेम वाता पेजे, अगा मंवलिर बक्तलिर कुसिते माकुन करुम कीतेर.
18 इमुन नेटि पव्लु अनि ममोट याकोबुन* अनि चर्चितुर दुस्रुर पेदोलकुन गिर बेटे माय्ले सोत्तोम.
19 पव्लु वूरकुन चोकोट-वायुट पूसि कीसि, तना कीता सेवतुन हिंदल, बगवंतल यूदुल्क आयुर वूर्गा जर्गुसीतङ कामकुन पोडि कीसि वेह्तोर.
20 अद वूर केन्चि, बगवंतन डगुर-पान सीतेर.
“दादा!
हजर्क कोदि यूदुल्क बक्तलिर आय्वल सूड्सेर मंति.
वूर लह्कि वर्सि मोसेना कानुंतुन पिय्सि ताकना इंतेर.
21 बति इद येरुसलेम्नुर बक्तलिरकुन, ‘यूदुल्क आयुर वूर नड्डुम मंवलिर यूदुल्क तम्वुर मरकुन मोसेना कानुंतुन पिय्सि, तोल कत्रि किय्वा अनि तम्वङ नेकिन पिय्सि ताक्वा’ इन्जि निमे वेह्ति बेरे इन्जेर बोरेय लबड वेह्तोर अले.
22 मरट बहन कीकट?
निमे वाता अद गोस्टि वूरकुन तप्वक करे मांता.
23 अदेन साटि ममोट वेह्तप कीम.
वोप्तङ मोक कंडि किय्लेक मह्गा नाल्विर जन्क मंतेर.
24 वूरकुन नी पेजेय वोसि, वूर बरोबर सुदुड आय्वल कार्यतगा ईसा येता.
वूर नाल्विरङ केल्क तेंड्ले आय्वल कर्चा निमे निहा.
अस्के निमे मोसेना कानुंतुन पिय्सि ताक्सेर मंति.
इदेन पिय्सि, वूर यूदुल्क केन्ज्तङ गोस्टिङ लबड आंदुङ इन्जेर करि कींतेर.
25 यूदुल्क आयुर वूर बक्तलिरकुन, ‘मूर्तिनगा निवोद कीततुन तिन्मट; पीर किय्मट; गोटितुन मुर्गुडि कीसि जक्ततुन तिन्मट; नेतुर तिन्मट इंवलिक इव गोस्टिना जोलित सोंवक मंदना’ इन्जि निर्नय कीतोम.
अनि अदेन चिटि लिहि कीसि सारि कीतोम” इन्जेर वूर डगुक वेह्तेर.
26 इमुन नेटि पव्लु मोक कंडि किय्ले मंवलिर नाल्विरकुन वोसि, वूर बरोबर सुदुड आतोर.
अद आता पेजे येरुसलेम्ना मंदिर्तगा सोन्जि, तंवा तना पूरो सुदुड-पान आय्ले अनि वूर नाल्विरङ्ते मोक कंडि किय्ले, बचोङ रोज्क मंदना इंवल सम्दिरकुन वेह्तोर.
पव्लुन हात्कडि वाट्वल
27 अव मोक कंडि किय्वलिक येडुङ रोज्क निंद्ले करुम वातङ.
अस्के आसिया येरियतल वातुर कहितुर यूदुल्क, पव्लुन अद मंदिरतगा सूड्तेर.
अगा मंवल पर्जता गुब्डतुन चडि कीसि, वोन पिय्तेर.
28 अनि पर्जतुन सङा, “इज्रयेल लोकुर्निट!
माकुन मदत कीम्ट.
वेर सम्दो येरियङ तिरिसि, इज्रयेल लोकुर बारेते, मोसेना कानुंतुन अनि इद मंदिरतुन बारेते, उल्टा बोदा वेह्तोर.
अचोरे आय्वा, यूदुल्क आयुर वूर कहितुर जनकुन मंदिरतुन रोपो तचि, पवित्रा मंदिरतुन बाटि कीतोर*” इन्जेर जोर्ते वेह्तेर.
29 बारितेके, अदेन मुने अगटुर पर्जा ग्रीकु देस्ना एपेस नगुडोर तोर्पिमु पव्लुन सङा येरुसलेम नगुडे तिरिवल सूड्तेर.
अदेन साटि पव्लु वोन मंदिरतगा वोसि मंदनुर इन्जेर सम्जे मातेर.
30 इद गड-बड अद नगुर पूरो पग्रे माता.
इद केन्चि पर्जा सम्दिर विच्चेर वातेर.
अनि पव्लुन पिय्सि मंदिर्तल बह्रि येरिसेर तचि, येंटने तानङ कावक केह्तेर.
31 वूर पव्लुन जक्ले सूड्सेर मनेके, येरुसलेम पूरो गड-बड्ते निंता इंवल कबुर अगा मंवल रोम दलम्नोर कमंडरतुन करे माता.
32 ते येंटने वोर कहि जन्क अदिकारिरकुन अनि सिपायिरकुन तंवा सङा पिय्सि, अगा सोत्तोर.
ते पर्जता गुब्डा वूरकुन सूड्सि, पव्लुन जह्वल बंद कीतेर.
33 अस्के वोर कमंडर करुम सोन्जि, “वोन पिय्सि हात्कडि वाटट” इन्जेर सिपायिरकुन हुकुम जारि कीतोर.
अनि “वेर बोर आंदुर?
बतङ कीतोर?”
इन्जेर पूसि कीतोर.
34 ते गुब्डतल कहितुर इहिन इन्जेर, उंडे कहितुर अहन इन्जेर किलिसेर मत्तेर.
अद लोल्लिते करल बतल इंवल करि किया पर्वा सोन्जि, वोर अदिकारि, “पव्लुन किलतगा वोम्ट” इन्जेर हुकुम जारि कीतोर.
35-36 बस्केते पव्लु तंतेल्क्नगा येव्तोरो, अस्के वूर मांदि, “वोन जकट!
वोन जकट!”
इन्जेर किलिसेर पेजेय विच्चेर वासेर मत्तेर.
अदेन साटि सिपायिर पव्लुन किलत रोपो तह्चि, वोसेर मत्तेर.
पव्लु पर्जत सङा वड्क्वल
37 अहन सिपायिर किलत रोपो नेङ्ले आनेकेन, “नी सङा उंदि गोस्टि वेहा वचो कि?”
इन्जेर कमंडरतुन पव्लु पूसि कीतोर.
ते वोर कमंडर, “नीकुन ग्रीकु बासा गिर वांतय?
38 इदेन मुने सर्कारतुन उल्टा तेच्चि, नालुङ हजर्क हेंड्वलिरकुन बोडि गुटनेके केय्सि वोय्वल ईजिप्ट्नोनि निमेय आंदि सेलेय?”
इन्जेर पव्लुन पूसि कीतोर.