पव्लु मासिदोनिया अनि अकया सोंवल
20
1 अद नगुडगा लोलि सिम-सम आता पेजे, पव्लु बक्तलिरकुन केयुस्तोर.
अनि चोकोटे बाव-बक्तिते मुने ताकना इन्जेर वेह्चि, वूरकुन कलिसि, मासिदोनिया सोत्तोर.
2 अद येरिया पूरो तिरिसेर अगा मंवलिर बक्तलिरकुन वेले गोस्टिङ वेह्चि, गटि-दीर्या सीसेर, अकया येरियते* येव्तोर.
3 अगा मूंद महिनङ मत्तोर.
अगटल सिरिया देस्ने रूकते मल्सि दाका इनेके, यूदुल्क तनकुन जक्ले सूड्सेर मंतेर इंवल करे माता.
ते उंडे उंदि जोका मासिदोनियतल सोंदना इन्जेर निर्नय कीतोर.
4 अस्के पव्लुन सङा, पुरुनोर मरि बेरया नगुडोर सोपत्रु, तेसलोनिकतल अरिस्तर्कु अनि सेकुंदु, देर्बे चहर्दल गयियु, आसिया येरियतल तुकिकु अनि तोर्पिम, लुस्त्रा नगुडल तिमोति इंवलिर मत्तेर.
5 वीर माक्तेर* मुने त्रोयकु नगुडे सोन्जि, मा साटि सूड्सेर मत्तेर.
6 ममोट पिलिपि नगुर वेरि काल सरिय सोत्तोम.
तातो पिंडिते सारिङ सुर्सि तिंवल सड तुङ्सि, अगटल रूकते पेसितोम.
अहन सियुङ रोज्क आता पेजे, त्रोयकु नगुडे येव्तोम.
अगा माकुन तेर मुने सोन्जि, मंवलिरकुन बेटे मासि, येडुङ रोज्क अगने मत्तोम.
त्रोयकु नगुडुरकुन पव्लु आक्रि जोका सूड्वल
7 आय्त्वर्तुन* नेटि सारि उरुसि तिंवल काय्दतुन साटि, मीरे मातोम.
इमुन नेटि पव्लु सोंवल मत्ता काड्कि, अंटित अर्दो नर्का वेरि, बोदा वेह्चेरेन मत्तोर.
8 ममोट मीरे माय्वल रोता मूडवा अंतर्ता कम्रतगा वेलेन डिवेङ मत्तङ.
9 अद अंतर्ता कम्रतगा तेरिसि मंवल किडिकितगा डियोर कांडि अय्तुकु उच्चि मत्तोर.
पव्लु उंदि तीर बोदा वेह्चेर मत्तोर.
अस्के वोर कांडि बेय जोप्ने कूर्क्सि, मूंद अंतर्क्ना किड्कितल बूड अर्तोर.
ते कहितुर बूड सोन्जि, वोन तह्तेर बति, अदेन मुनेने वोना परन सोत्ता.
10 अस्के पव्लु बूड सोन्जि, सातोर वोन कोरते येच्चि, “परेसन आय्मट!
वेर जीवतेन मंतोर” इन्जेर वेह्तोर.
11 अहन वेह्ता पेजे पव्लु, मल्सि अद कम्रतगा सोन्जि, सम्दिर सङा सारि उरुसि तिंवल काय्दतुन मह्तोर.
अनि बय बय आनल वेरि वड्क्सि पेसितोर.
12 परन सोत्तोर वोर डियोन मल्सि जीवते रोन वोता काड्कि, वूरा मंदुन वेले गटि-दीर्या वाता.
त्रोयकु नगुडल मिलेतु चहर्दे सोंवल
13 “नना सरिय वासि, असोस्नगा मी सम्दिरकुन बेटे मांतोन” इन्जेर पव्लु मुनेने माकुन वेह्चि मत्तोर.
अदेन साटि ममोट रूकते असोस सोत्तोम.
14 अद तीर्दे पव्लु असोस्नगा माकुन बेटे मातोर.
अस्के ममोट वोन रूकतगा उपुसि, मितुलेने चहर्ते सोत्तोम.
15 मितुलेनेतल दुस्रो नेटि रूकते यात्रा कीसेर कियोसु लंकतुन मुनेतल पेसिसि, इमुन नेटि समोसु लंकतगा येव्तोम.
अगटल दुस्रो नेटि मिलेतु चहरतगा येव्तोम.
एपेस्नुर पेदोलकुन केयुसि आक्रिता बोदा वेह्वल
16 आयर्ते पेंतेकोस्तु सडदुन साप्डि किय्ले, येरुसलेम वेय्ने सोंदना इन्जेर पव्लु मत्तोर.
अदेन साटि आसिया येरियता एपेस नगुडे आग्वक्ने वीड्सि, सोंदना इन्जेर निर्नय कीतोर.
17 ते पव्लु, एपेस नगुडे आग्वडुन बद्लि, अगटा चर्चितुर पेदोलकुन कबुर सारि कीसि, मिलेतु चहर्दगा केयुस्तोर.
18 वूर वाता पेजे पव्लु, “नना आसियतगा कोजि वाड्तोन अगटल्ते इंके वेरि बहन पिस्तोन इंवल मीकुन टावये.
19 यूदुल्क्नङ कुट्रन हिंदल+ नाकुन कूब वेले तक्लिब्क वातङ.
तेर बति काडेर तुह्चेर चुडुर-पांदे मन्जि, पर्बुना सेवा कीतोन इंवल मीकुन टावये.
20 बाव-बक्तितगा बडे माय्ले, मदत किय्वलिक उंदि गोस्टि गिर मकुस्वक्ने, मी सम्दिर मुने अनि हरियेक रोन सोन्जि वेह्तोन.
21 मीवङ पाप्कनल कब्ले मासि, बगवंतनेके मलना अनि येसु किरिस्तु पर्बुनगा बरोसा इरना इन्जेर, यूदुलकुन अनि ग्रीकु देस्नुरकुन दम्कि सीसेर वातोन.
अद सम्दो मीकुन टावय.
22 इचुला!
नना इंके, पवित्रा आत्मा हुकुम सीता तीर येरुसलेम सोन्जेर मंतोन.
अगा नाकुन बतल बतल जर्गंतयो टावा सेले.
23 बति तक्लिब्क अनि जेल्क ना साटि, सूड्सेर मंतङ इंवल पवित्रा आत्मा नाकुन हर चहरतगा गवा तोह्चेर वातोर.
24 इव बवे नाकुन हालि किया परोङ.
नावा जीवतुन नना लेका कियोन.
येसु पर्बु नाकुन हव्लि कीता सेवता कार्यतुन इत्तेके बगवंतना पेर्मता-दयतुन बारेता चोकोट्ना कबुडुन ना सङा आता अचोर आनंद्ने पचर कियना इंवले नावा इचा मंता.
25 “इचुला!
मिह्गटल बोरे गिर इङेडल ना मोकोम सूड्विट इन्जेर नाकुन टावा.
बगवंतना राजुन बारेते, मी नड्डुम नना वेलिसेर पचर कीसेर मत्तोन.
26 इदेन पोरो बरोसा इर्वक्ने बोरे मिह्गटल तप्सि दानुर्ते, ननते जिमेदारना आयोन इन्जि, मीकुन गवा इर्सेर मंतोन.
27 बारितेके बगवंतल मा साटि पिलन कीसि इर्ता सम्दोतुन मकुस्वक्ने वेह्तोन.
28 बगवंतल तंवोर मरिना नेतुडा अर्पना सीसि, कमय कीता चर्चितुरकुन गाय्किर दात मंदना इन्जेर पवित्रा आत्मा मीकुन पेदोलकुन दात नेमि कीता.
अदेन साटि मीवा मिरट अनि मंदतुन दात मंवलिर चर्चितुर बारेते दिहंते मंट.
29 नना सोत्ता पेजे, वेरिनल मंवलिक लांडिगलिकुन दात्नुर मी नड्डुम नेङंतेर इंवल नाकुन टावा.
मंदतुन (चर्चितुरकुन) वूर नासेडम कींतेर.
30 अचोरे आय्वा मी बक्तलिरकुन गिरे तम्वा पेजेय ऊम्सेर वोयना इन्जेर लबड वड्क्वलिर मिह्गटले तयर आंतेर.
31 अदेन साटि नना मूंद साल्क मी सङा मनेके, काडेर तुह्चेर नर्का-पियल मिह्गटल हर वोरोन बुदि वेह्वल मरुङ्मकि.
इदेन हेतु कीसि दिहंते मंट.
32 “इंके मीकुन बगवंतना केय्दे अनि वोना पेर्मता-दया वाले वचंता केय्दे हव्लि कीसेर मंतोन.
मीकुन बाव-बक्तितगा बडि कीसि, सम्दिर पवित्रा बक्तलिर बरोबर मीकुन बगवंतल सीता वाग्दंतगा ईसदार्क कीनल अद वचंतगा सक्ति मंता.
33 नना बोनय सोनेतुने आयि, कूरतुने आयि, कप्डिने आयि आसा किय्मकि.
34 नावङ जुरत्क अनि ना सङा मत्तुरङ जुरत्क पूरि किय्ले, इव नावङ केय्क काया-कस्टम कीतङ इंवल मीकुन टावये.
35 इहिन कस्टम कीसि, दिक सेलुर वूरकुन मदत कियना इन्जेर मीकुन नना ताक्वल सम्दोतगा नमुनतुन दात तोह्तोन.
‘येत्वडुन तेर दुस्रुरकुन सिय्वले आसिर्वाद आंद’ इन्जि येसु पर्बु वेह्तङ गोस्टिङ हेतु इरट” इन्जेर वेह्तोर.