माल्ता लंकतगा मंवल
28
1 अहन मावङ जीवन बचि कीता पेजे, अद लंकता पोरोल ‘माल्त’ इन्जेर करि कीतोम.
2 अद लंकतुर माकुन बेय दयते सूड्तेर.
बहन इत्तेके, अस्के पिर वासेर मत्ता अनि पीनि गिर जास्ता मत्ता.
ते वूर तड्मि मासि, मा सम्दिरकुन करुम कीतेर.
3 अस्के पव्लु कटेङ मीरि कीसि उर्न्गिमेन तचि तड्मितगा वाट्सेर मत्तोर.
अद वकत्ने उंदि विक वाले तरस दगड्ते बह्रि वासि, पव्लुना केयदुन तुत्ता.
4 अद तरस तुत्वल लंकतुर सूड्सि, “वेर मायनल बोनय बति जीवा येच्चि वासि मंदनुर.
अद सम्दुर्तल बचे मातोर बति, नायम वेन बचे माया सिय्मकि” इन्जेर तम्वा तमा वड्क्तेर.
5 वोर अद तरसुन तड्मितगा जडि कीतोर बति, वोंते बतय आय्मकि.
6 वोना मेंदोल तोयर सेलेके, अस्केडा अस्केन बूड अर्सि सानुर इन्जेर लंकतुर सूड्सेर मत्तेर.
अहन वेले जेल सूड्ता पेजे, वोन बतय आय्मकि इंवल करि कीतेर.
अनि तम्वा मंदुन मार्युसि, “वेर वोरोर पेन आंदुर” इन्जेर इत्तेर.
7 अद लंकतगा पोप्लि इंवल अदिकारि मत्तोर.
वोन अद येरियतगा वेले बोमि मत्ता.
वोर तंवा रोन वूरकुन करुम कीसि, मूंद रोज्क वेरि, मान-पान कीतोर.
8 अद वकत्ने वोर पोप्लिनोर बाबो येड्किते अनि नेतुर मेय्दन लाग्सि कटुडगा मींड्सि मत्तोर.
ते पव्लु वोन्गा सोन्जि पार्तना कीसि, वोन पोरो केय्क इर्सि चोकोट कीतोर.
9 अहन चोकोट आय्वल सूड्सि, अद लंकतुर मेय्तुर येड्कि-दुक्ने मंवलिर गिर पव्लुनगा वासि, चोकोट आतेर.
10 अद लंकतुर मानि कीसि, माकुन वेले चोकोट सूड्तेर.
ममोट अगटल पेसिनेके माकुन पह्जे मत्ता सम्दो वस्तुना इंतजम कीतेर.
रोमा नगुडे सोंवल
11 मूंद महिनङ आता पेजे, अद लंकतगा पूरो पीनि-गालुम आग्सि मंवल अलेग्जांड्रियता रूकते सोंले पेसितोम.
अद रूकता मुनेता बाज्नगा येमलिक पेन्क्ना बोंमा रेह्चि मत्ता.
12 अहन पेसिसि ममोट सुरकुस नगुडे येव्तोम.
अगा मूंद रोज्क मत्तोम.
13 अगटल पेसिसि रेगिया नगुडे वातोम.
उंदि दिया मत्ता पेजे, तेल्न्गड बाजनल वडि वाय्वल सुरु आता.
ते अगटल इमुन नेटि पोतियोलि चहर्ते येव्तोम.
14 अगा मंवलिर कहितुर बक्तलिरकुन बेटे मातोम.
वूर माकुन तम्गा येडुङ रोज्क मंदना इन्जेर कोर्तेर.
अद आता पेजे, ममोट रोमा नगुडेके सोत्तोम.
15 ममोट वाय्वल कबुर रोमतुर बक्तलिरकुन करे माता.
ते वूर माकुन बेटे माय्ले अप्पिया हाटुम वेरि अनि मूंद लाड्जिना नार वेरि मुनेत्क वातेर.
पव्लु वूरकुन सूड्सि, बगवंतन दनेवाद वेह्तोर.
अस्के वोन वेले दर्यम वाता.
16 ममोट रोम नगुर येव्ता पेजे, पव्लुन केप्ले सिपायिन इर्सि सम्दिर्गटल अलग उंदि किरेय्ता रोतगा मंले वोन मोका पुड्ता.
रोमा नगुडे बोदा वेह्वल
17 मूंद रोज्क आता पेजे, पव्लु यूदुल्क्नुर पेदोलकुन केयुस्तोर.
वूर सम्दिर वाता पेजे, “ना तादल-तमुर्निट!
मा पर्जतुन आयि, मा तोत्तुरङ नेकिन आयि, उल्टा आसि नना ताक्मकि.
तेर बति, येरुसलेमनल रोमतुरा केय्दे नाकुन हात्कडि वाट्सि, हव्लि कीतेर.
18 वूर नाकुन वेले सवल्क पूसि कीसि, तस्वा कीतेर.
बति नाकुन मरंता सिक्सा वाटनल वूरकुन बदे गल्ति पुट्मकि.
ते नाकुन सुटि कियना इन्जेर सोन्च कीतेर.
19 बति यूदुल्क्ना जातितुर वोप्मकि.
ते नना सीजर महा राजने नावा गोस्टि वेहंतोन इंवल जुरत अर्ता.
अचोरे बति, यूदुलकुन पोरो पिरदिङ किय्ले, नना इगे वाय्मकि.
20 इद कारंतुन वेहना इन्जेरेन मीकुन केयुस्तोन.
इज्रयेल लोकुर बचि किय्वल वानुर इन्जि, आसते सूड्सेर मंतेर.
वोर वातोर इन्जेर नम्ततुन हिंदले, नाकुन इंके बेडिङ अर्सि मंतङ” इन्जेर वेह्तोर.
21 अद केन्चि वूर यूदुल्क, “नी बारेते यूदयतल बवे चिटिङ मह्गा वाय्मकि अनि अगटल वातुर बक्तलिर गिर करब समचार बतय वेह्मकि.
22 बति इद दर्मतुन बारेते सम्दो येरियनगा उल्टा वड्क्सेर मंतेर इंवले टावा.
ते इदेन बारेते, नीवा सोन्च-विचर केन्जना इंवल माकुन मंता” इन्जेर पव्लुन इत्तेर.
23 अनि तान साटि उंदि दिनम टरि कीतेर.
अद दिनमुन नेटि मोदोल वातुरकुन तेर अदिक मांदि, पव्लु मंवल किरेय्ता रोतगा मीरे मातेर.
सकेडल्ते पोद्रेक वेरि पव्लु, बगवंतना राजुन बारेते वेह्तोर.
अनि येसुन बारेते, मोसेना कानुंतल अनि पर्वक्तलिर लिहि कीतनल, गवङ तोह्चेर पोडि कीसि, वूर वोपनल वेह्तोर.
24 वोर वेह्ता केन्चि, कहितुर वोप्तेर अनि उंडे कहितुर वोप्मकि.
25 वूर नड्डुम बेद-बाव पुड्ता काड्कि, अगटल तेच्चि सोंले आनेके, “येसया पर्वक्तल पवित्रा आत्मते, मी तोत्तुर सङा वेह्ता गोस्टि बरोबरे आंद:
26-27 ‘“मिरट बस्केट केन्चेरेन मंदंतिट.
बति बस्केन अर्तम किय्विट.
बस्केट सूड्सेर मंदंतिट.
बति बस्केन वोड्के माय्विट.
बारितेके वीर पर्जतङ दिल्क बंडत दात गट आतङ.
वूर केव्क्ने बतय केन्जुर.
वूरङ कडकुन बतय दिसो.
वूर कड्क्ने सूड्सि, केव्क्ने केन्चि,
दिल्क्ने अर्तम कीसि,
ना बाजुन तिरितेके,
नना वूरकुन चोकोट कींदुन.
बति वूर अहन तिरिमकि”,
इन्जि पर्जतगा सोन्जि वेहा’+
इन्जेर पवित्रा आत्मा पर्वक्तन वेह्ता.
28 “अदेन साटिने बगवंतल तंवा बचि किय्वल कबुडुन यूदुल्क आयुर वूर्गा रोह्तोर.
अनि वूर अदेन केन्चि, वोपंतेर इन्जि मिरट करि कियना” इन्जेर पव्लु वेह्तोर.
29 *[अव गोस्टिङ केन्चि, वूर तम्वा तमा तगपर लाग्सेर सोत्तेर.]