गलति
गलतियतुरकुन लिहि कीता चिटि
पव्लु दंडोस वेह्वल
1
1-2 गलतिया येरियतगा* मंवलिर येसुनुर बक्तलिर आय्वलिर मी साटि, इद चिटितुन अपोस्तुल आय्वल पव्लुना लिहि कीसेर मंतोन.
इगे ना सङा मंवलिर बक्तलिर गिर मीकुन दंडोस वेह्चेर मंतेर.
नना बूरे माय्नलिरा केय्दे, सेलेके बोरे माय्नना अदिकार्दे, अपोस्तुल्ता आय्मकि.
बति मा येसु किरिस्तुना केय्देने अनि वोन मरंतल नेंडुस्तोर वोर बगवंतना केय्देने नेमे मासि, अपोस्तुल्ता आतोन.
3 मा बाबो बगवंतल अनि मा येसु किरिस्तु पर्बु मीकुन पेर्मता-दया अनि सांति सियिर!
4 मा बाबो बगवंतना पिलन तीर इद करेबल दुनियतल अनि मावङ पाप्कनल सुटि कियुस्ले, किरिस्तु तंवा जीवा सीतोर इंवल मीकुन टावा.
5 बस्केट बगवंतने डगुर-पान वायि!
आमेन.
सिरिप उंदिय चोकोट्ना कबुर मंता
6 किरिस्तुना पेर्मता-दयतुन पिय्सि, मीकुन केय्वल बगवंतन सुटि कीसि, दुस्रो कबुडेके तिरिसेर मंतिट अले.
इद केन्चि नना दड्कि तितोन.
7 माकुन करल बचि किय्वल किरिस्तुना चोकोट्ना कबुडुन तपुसि, दुस्रो बदे सेले.
बति कहितुर मीकुन पसि कीसि, बह्कि किय्ले, अद कबुडुन बद्लि कीसेर मंतेर.
8 ते ममोट मीकुन मोदोल वेह्ता चोकोट्ना कबुर आय्वा, दुस्रो कबुडुन ममोटे आयि, सेलेके स्वर्गनल रेय्सि वाता दूतले आयि, उंडे बोरे गिर आयि वेहनुर्ते, अहन वेह्वन बगवंतल बस्केट सापेना सियिर!
9 मोदोल वेह्ता कबुडुन केन्चि मिरट वोप्तिट.
बोरे आयि अद कबुडुन आय्वा, दुस्रोतुन वेहनुर्ते बगवंतल वोन सापेना सियिर!
इन्जेर मर्ला वेह्चेर मंतोन.
10 ते माय्नलिर नाकुन मेचना इन्जि सूड्सेर मंतोन इन्जेर सोन्च किय्मट.
बगवंतले नाकुन मेचना इन्जेर सूड्सेर मंतोन.
नना माय्नलिरकुन आनंद सियना इन्जेर कोसिद किय्मड इत्तेके, किरिस्तुनोर सेव्कना असले आसि मनोन.
पव्लु वेह्वल चोकोट्ना कबुर किरिस्तुनल वाता
11 नावुर दादलिर-बायिक्निट!
नना मीकुन वेह्ता चोकोट्ना कबुर माय्नलिरा सोन्च-विचर्दल वाय्मकि इन्जेर मिरट अर्तम कियना.
12 अद कबुडुन नना नरिमन्कनगटल करिमकि अनि बूरे दर्मा गुरुर नाकुन करुस्मकि.
बति येसु किरिस्तुये तान बारेते नाकुन वेह्चि, तोह्तोर.
13-14 इदेन बारेते, नना तोले यूदुल्क्ना दर्मतुन पिय्सि ताक्नेके, बगवंतनुर बक्तलिरकुन बेय दुक्सङ-तक्लिब्क सीतोन.
अनि वूरकुन नासेडम किय्ले गिर सूड्तोन.
अद गट्कते, ना बरोबर्तुर सम्दिर्गटल अदिक नेकि-बदिङ पिय्सि ताक्ंदुन.
ना तादुर-बाबुर्गटल वातङ नेकि-बदिङ पिय्सि ताक्ले, वेले पसंद कींदुन इंवलिक गोस्टिङ मीकुन टावये.
15-17 बति बगवंतल तंवोर मरि येसुन बारेते यूदुल्क आयुर वूरकुन वेह्ले, नना पुट्वक मनेकेने, तंवा पेर्मता-दयते नाकुन आनंद्ने केय्सि आच्तोर.
बस्केते तंवोर मरिन बारेते नाकुन वोड्कि अरुस्तोरो, अस्के येंटने नना बूरे माय्नलिर्गा सोन्जि, इदेन बारेते पूसि किय्मकि.
अनि नाक्तेर मुनेतल येरुसलेम्नगा अपोस्तुल्क आसि मंवलिर्गा गिर नना सोन्मकि.
बति नना अरेबिया देस्ने सोत्तोन अनि अद आता पेजे, मल्सि दमस्कु नगुडेन वातोन.
18 अहन पर्बुनगा बरोसा इर्सि, मूंद साल्क आता पेजे, अपोस्तुल आय्वल पेतुर्तुन* बेटे मासि, वोन बारेते उंडे अदिक करि किय्ले, येरुसलेम वर्सि सोत्तोन.
अनि वोन सङा पंद्रा रोज्क मत्तोन.
19 वेन अनि येसु पर्बुनोर तमुर आय्वल याकोबुन तपुसि, दुस्रोर बोरे अपोस्तुलतुन बेटे माय्मकि.
20 दादलिर-बायिक्निट!
नना लबड लिहि कीसेर सेलोन इंवडा गवा बगवंतले मंतोर इन्जि मीकुन वेह्चेर मंतोन.
21 वूर इविरकुन बेटे मासि, सिरिया अनि किलिकिया येरियनगा सोत्तोन.
22 अद गट्का वेरि, यूदया येरियतगा मंवलिर किरिस्तुनुर बक्तलिर कुद बूरे नाकुन बेटे माय्मकि.
23 बति वूर सिरिप, “किरिस्तुनुर बक्तलिर आय्वलिर माकुन मोदोल दुक्सङ-तक्लिब्क सीसि, नासेडम किय्ले सूड्तोर.
बति इंके वोरे किरिस्तुनगा इर्वल बरोसतुन बारेते पचर कीसेर मंतोर” इन्जेर ना बारेते केन्चेर मत्तेर.
24 अनि ना बारेते बगवंतन डगुर-पान सीसेर मत्तेर.