अपोस्तुल्क पव्लुन वोप्वल
2
1 अहन चोव्दा साल्क आता पेजे, उंडे उंदि जोका येरुसलेम सोत्तोन.
ना सङा सेवा किय्वलिर बर्नबन अनि तीतुन गिर वोतोन.
2 बगवंतल नाकुन वेह्चि तोह्ता तीरे अगा सोत्तोन.
अहन सोत्ता पेजे, अगटा चर्चितुर पेदोलकुन बग्ला केय्तोन.
अनि वूर सङा, यूदुल्क आयुर वूरकुन चोकोट्ना कबुर वेह्नेके बतल बहन वेह्तोन इंवडुन बारेते पोडि कीसि, वेह्तोन.
बारितेके इदेन मुने कीता अनि इंके कीसेर मंवल सेवा येर्तम आय्वा इन्जि, नना किय्वल सेवतुन वोपना इन्जेर सिरिप वूर्कुने वेह्तोन.
3-5 बति अगा कहितुर लबड बक्तलिर मत्तेर.
येसु किरिस्तु माकुन मोक्डो सुटि कीता अदेन बहन पिय्सि, ताक्सेर मंतेर इन्जेर करि किय्ले, वूर कुसये मह्गा नेङ्तेर.
यूदुल्क्नङ नेकि-बदिङ पिय्सि, कोंडे मासि मंदना इन्जेरेन वूर वातेर.
बति मिरट चोकोट्ना कबुडा सतेमनल बह्के माय्वक मंदना इन्जेर गट्कमेट साटि गिर वूर लबड बक्तलिरङ गोस्टिन ममोट वोप्मकि.
ना सङा मंवल तीतुन तोल कत्रि* कियय लागर इन्जेर कहितुर इत्तेर.
बति आक्रित वूर चर्चितुर पेदोल्क, वोर तीतु यूदुल्क्ना जातितोर आयोर इन्जि करि कीसि, तोल कत्रि किया लागर इन्जेर बोरे जुल्मा किय्मकि.
6 ते वूर येरुसलेम्नगा मंवलिर चर्चितुर पेदोल्क नावा बोदा केन्ज्नेके, अदेनगा बतय गिर मीरि किय्मकि.
वूर बचोर डगुक लोकुर मत्तेके गिर नना लेका किय्मकि.
बारितेके बगवंतल सम्दिरकुन उंदि तीर सूडंतोर.
7 ते वूर्गटल मुके वालिर आय्वलिर याकोबु, पेतुरु अनि योहन बतल करि कीतेर?
इत्तेके यूदुल्क्ना येरियतगा चोकोट्ना कबुर वेह्ले, पेतुरतुन नेमि कीतपे, यूदुल्क आयुर वूर मंवलिक येरियनगा अद कबुर वेह्ले, बगवंतल नाकुन नेमि कीतोर इंवल करि कीतेर.
8 बहन इत्तेके, यूदुलकुन नड्डुम सेवा किय्ले, अपोस्तुल आय्वल पेतुरतुन बगवंतल बहन सक्ति सीसि ताकुस्तोरो, अह्ने यूदुल्क आयुर वूर नड्डुम सेवा किय्ले, अपोस्तुल आय्वल नाकुन सक्ति सीतोर.
9 वूर मुविर, बगवंतना पेर्मता-दया, ना पोरो गिर मंवल सूड्सि, नाकुन अनि बर्नबन आनंद्ने वोप्तेर.
अनि तमा यूदुलकुन नड्डुम सेवा किय्वलिर आतपे, मा इविरकुन यूदुल्क आयुर वूर नड्डुम सेवा कियना इन्जेर निर्नय कीतेर.
10 बति वूर सिरिप, “यूदया येरियतुर गरिबुन मदत किय्वल मरुङ्मा” इन्जेर कोर्तेर.
इहिन किय्वल नाकुन गिर पसंद मत्ता.
पेतुरु कीता गल्तितुन पव्लु सुद्रि किय्वल
11 उंदि जोका पेतुरु अंतियोकया नगुडे वातोर.
अगा मनेके, वोर कीता गल्ति तात्कर दिस्ता.
ते वोना गल्तितुन सम्दिर मुने सुद्रि कीतोन.
12 बारितेके, मोदोल पेतुरु यूदुल्क आयुर वूर बक्तलिर सङा मीरे मासि, तिंदुर-उंडुर.
बति बस्केते याकोब्नगटल कहितुर यूदुल्क अंतियोकयतगा वातेरो, अस्के तोल कत्रि कियुसना इन्जेर जुल्मा किय्वलिर यूदुलकुन वेरिसि, यूदुल्क आयुर वूर्गटल वोर अलग आतोर.
13 अगा मा चर्चितुर नड्डुम मंवलिर मेय्तुर यूदुल्क गिर अद कपट्नगा कोंडे मातेर.
अद कपट्ना ऊसते बर्नबल गिर पासि सोडितोर.
14 वूर अहन चोकोट्ना कबुडुन उल्टा ताक्वल सूड्सि, सम्दिर मुने पेतुरतुन सङा, “निमे यूदुल्क्ना जातितोनि आसि, मा यूदुल्क्नङ नेकि-बदिङ पिय्सि ताक्मकि.
बति यूदुल्क आयुर वूर दात ताक्ति.
अहन ताक्सि, इंके यूदुल्क आयुर वूर बक्तलिरकुन बहन यूदुल्क्नङ नेकि-बदिङ पिय्सि, ताकना इन्जेर जुल्मा कींति?”
इन्जेर पूसि कीतोन.
15 अहन पूसि कीसि, पेतुरतुन अनि मेय्तुर यूदुलकुन सङा, “मरट जल्मतले यूदुल्क आंदट.
बति पापेस्तलिर आय्वलिर दुस्रोक जातिनुर आय्वट.
16 तेर बति, इंके अद कानुंतुन पिय्सि ताक्वल बोरे आयि, बगवंतना नदुडे नियत्नोर आयोर बति, सिरिप येसु किरिस्तुनगा बरोसा इर्वडुन हिंदले नियत्नोर आंतोर इन्जेर माकुन टावा.
यूदुल्क आय्वलिर मरट गिर अव काम्क किय्वडुन हिंदल नियत्नुर आया पर्वट.
अदेन साटिने मरट नियत्नुर आय्ले, येसु किरिस्तुनगा बरोसा इर्तट.
17 अनि मरट इंके किरिस्तुनगा बरोसा इर्वडुन हिंदल बगवंतना नदुडे नियत्नुर आय्ले कोसिद कीसेर मंतट.
बति कहितुर माकुन सूड्सि, ‘मिरट पाप कींतिट’ इंतेर.
ते इदेना अर्तम किरिस्तु मा सङा पाप कियुसंतोर कि?
असले कियुसोर.
18 बारितेके, दर्मता कानुन इंवल नावा रोतुन नना उल्टि कीतोन.
उंडे ताने तिरिसि दोह्कते, करलेन पापेस्तना आंतोन.
19 बारितेके, तोले अद कानुन तीर पिस्ले, कोसिद कीसेर मत्तोन.
बति नना पापेस्तना आता काड्कि, नावा मरन आयय लागर इन्जेर अद कानुन तोह्ता.
ते इंके, बगवंतन साटि पिस्ले, अव सम्दो नेकि-बदिन सुटि कीतोन.
बहंते सातोर वोर बदे कानुन पिय्सि ताकोरो, अह्ने नना सातपिनय आतोन.
20 किरिसतुन बरोबर मोद्नगा नना सातपिनय आसि मंतोन.
इंके जीवते मंवना नना आयोन बति, किरिस्तुये नह्गा पिसेर मंतोर.
बगवंतनोर मरिनगा इर्ता बरोसतुन हिंदले, इद मेंदोडे पिसेर मंतोन.
बारितेके वोर नाकुन लाड कीसि, ना साटि जीवा सीतोर.
21 बगवंतना पेर्मता-दयतुन नना येर्तम कियोन.
बारितेके मोका दर्मता कानुंतुन पिय्सि, बगवंतना चर्नते मरट नियत्नुर आया पर्तेके, किरिस्तु मा साटि मरन आय्वल जुरत सेले” इन्जेर वेह्तोन.