गलति 3

बरोसतुन हिंदल नियत्नुर आंतट

1 ये गलतियतुर पिसलिर्निट! मोद्नगा येसु किरिसतुन बारि टाङि कीसि, जीवा येत्तेर इंवडुन तात्कर सूड्तपिनय मीकुन पोडि कीसि, वेह्‍तोम. बति अदेन्गटल मीवा मंदुन तकपिका कीसि, मीकुन बूर बह्‍कि कीतेर? 2 इदेन बारेते मीकुन उंदि सवल पूसि कियना इंतोन. अद बतल इत्तेके, मिरट बगवंतना आत्मतुन बहन येता पर्तिट? दर्मता कानुन पिय्सि ताक्ततुन हिंदल अदेन असले येत्मकि. बति सिरिप किरिस्तुना चोकोट्ना कबुर केन्चि, तान्गा बरोसा इर्वडुन हिंदले अद आत्मतुन येता पर्तिट. 3 मी रोपो बगवंतल तंवा आत्मते मोदोल कीता अदेने आय्वा, मीवा मिरट कुद बर्पुर आयना इन्जेर बारि कोसिद कीसेर मंतिट? मीकुन बता पिसङ पिय्तङ कि? 4 मिरट पर्बुनगा बरोसा इर्ता पेजे, वेले दुक्सङ बोगे मातिट. इव सम्दो वटि आगयेन बोगे मातिट कि? वटि आगय्ते असले बोगे माय्मकि! 5 बगवंतल तंवा पवित्रा आत्मा मीकुन बर्पुर सीसि, मय्मतङ काम्क मी नड्डुम कियुस्तोर. अव सम्दो मिरट दर्मता कानुंतुन पिय्सि ताक्ता काड्कि, कीतोर इंतिट कि? अवेन पिय्सि असले किय्मकि! बति मिरट चोकोट्ना कबुडुन केन्चि, येसु किरिस्तुनगा बरोसा इर्वडुन हिंदले अव सम्दो जर्गुसीतोर.

6 इदेन बारेते अब्राहम्ना गोस्टि दर्मा-ग्रंत्नगा, “अब्राहम बगवंतन पोरो बरोसा इर्तोर. अदेन हिंदले वोन नियत्नोर इन्जि बगवंतल वोप्तोर” इन्जेर लिहि कीसि मंता. 7 अदेन साटि, बूर्ते बगवंतनगा बरोसा इरंतेरो, वूरे अब्राहम्ना करल संतान आंतेर इन्जेर करि कीम्ट. 8 यूदुल्क आयुर वूर गिर तन्गा इर्वल बरोसतुन पिय्सि नियत्नुर आंतेर इन्जेर तोलेने बगवंतल निर्नय कीसि, लिहि कियुस्तोर. अद चोकोट्ना कबुडुन बारेते मोदोले अब्राहमुन सङा, “नी हिंदल दुनियतङ सम्दो जातिङ आसिर्वाद येतनुङ” इन्जेर बगवंतल वेह्‍तोर. 9 अदेन साटि अब्राहमुन दात बूर्ते बगवंतनगा बरोसा इरंतेरो, वूरे बगवंतल सिय्वलिक आसिर्वाद्क येतंतेर.

10 बति, “दर्मता कानुंतगा लिहि कीतङ सम्दो कार्यन, हर गट्का कियोर वोन पोरो, बगवंतना सापेना वांता” इन्जेर दर्मता कानुंतगा लिहि कीसि मंता. ते अदेन पिय्सि नियत्नुर आय्ले, कोसिद किय्वलिर सम्दिर पोरो सापेना वासि मंता. बारितेके, अद कानुंतुन बर्पुर बोरे पिय्सि ताका परुर. 11 दर्मा-ग्रंत्नगा, “बरोसतुन हिंदल नियत्नोर इन्जि बगवंतल बोंते वोपंतोरो, वोर पिसंतोर” इन्जेर लिहि कीसि मंता. अदेन साटिने, इंके अद कानुंतुन पिय्सि ताक्वडुन हिंदल, बगवंतना नदुडे नियत्नोर आया परोर इन्जेर माकुन तात्कर दिसंता.

12 अद कानुन पिय्सि ताक्वल अनि बगवंतनगा बरोसा इर्सि ताक्वल उंदि आयो. बारितेके दर्मा-ग्रंत्नगा, “अद कानुंतुन पिय्सि ताक्वल अदेनेन पिसंतोर” इन्जेर लिहि कीसि मंता. 13-14 ते बगवंतल अब्राहमुन वाग्दन कीता आसिर्वाद, यूदुल्क आयुर वूरकुन गिर पुटना इन्जेरेन, येसु किरिस्तु तंवा मरंतुन हिंदल, माकुन बचि कीतोर. वाग्दन कीता अद पवित्रा आत्मा तन्गा बरोसा इर्वडुन हिंदल, माकुन पुट्लेने इद जर्ग्ता. अद कानुंतुन हिंदल, मा पोरो वाता सापेनतल किरिस्तु माकुन मोक्डो सुटि कीतोर. बहन इत्तेके, मा बद्लि वोरे, “मोद्नगा टाङे मासि, सापेना येत्तोर” इन्जेर दर्मा-ग्रंत्नगा लिहि कीसि मंता.

बगवंतना वाग्दंतुन पेजेटल वाता नियम पासि वाटो

15 येसुनगा बरोसा इर्तुर दादलिर-बायिक्निट! मीकुन उंदि सादरन नमुना वेहंतोन. बूरे इविर माय्नलिर इर्तेर इत्तेके, अद नियमुन दुस्रुर बूरे पासि वाटा परुर अनि तान्गा बतय जोडि गिर किया परुर. 16 ते बगवंतल, “नीवा संतांतोन्गटल सम्दिरकुन आसिर्वाद पुटंता” इन्जेर तोले अब्राहमुन वाग्दन सीतोर. बति संतांतुर्गटल इन्जेर वेह्‍मकि. अद संतान वोर किरिस्तुये आंदुर. 17 नना वेह्‍वल बतल इत्तेके, बगवंतल मोदोले अब्राहमुन सङा कीता नियमुन, नालुङ नुह्‍क तीसा (430) साल्क पेजेटल वाता मोसेना कानुन पासि वाटो अनि येर्तम गिर कियो.

18 दर्मता कानुन पिय्सि ताक्वडुन हिंदल आसिर्वाद पुट्मड इत्तेके, अद आसिर्वाद बगवंतल सीता वाग्दंतुन हिंदल पुट्ता आयो. अब्राहम्ना गोस्टित सूड्तेके, बगवंतल मोदोल वोन वाग्दन सीसि मत्ता काड्किने, अद आसिर्वाद पुट्ता. बति कानुंतुन पिय्सि पुट्मकि.

19 ते दर्मता कानुन बततुन साटि मंता? अद सिरिप मावा पापुन वेह्‍चि तोह्‍लेने मंता. बगवंतल वाग्दन सीतोर वोर, अब्राहम्ना संतांदल वानल वेरिने, अद कानुन कामि सींता. बगवंतल कानुंतुन दूतलिरा केय्दे मोसेन सियुस्तोर. अदेन वोर मोसे सुर्वेर्तन मोडि पर्जतुन वेह्‍तोर. 20 बति वाग्दंता गोस्टि सूड्तेके, तान बगवंतले कुद अब्राहमुन सीतोर. अदेन साटि बोरे सुर्वेर्तना जुरत सेले.

21 ते दर्मता कानुन बगवंतना वाग्दंतुन उल्टा आतप कि? असले आय्मकि! मोका अद कानुन माकुन पूना जिन्गनि सिया पर्ंदु इत्तेके, मरट कानुंतुन पिय्सि, बगवंतना नदुडे नियत्नुर आंदट. बति बगवंतल बदे कानुंतुन अहन किय्वल सक्ति सिय्मकि. 22 दर्मा-ग्रंत, दुनियतुर सम्दिर पाप्नगा कोंडे मासि मंतेर इन्जेर तोहंता. अदेन साटि मरट, बगवंतना अद वाग्दंतुन सिरिप येसु किरिस्तुनगा बरोसा इर्वडुन हिंदले येता परंतट.

बरोसतुन हिंदल बगवंतनुर मरि-मियड आंतट

23 बति मरट येसुनगा बरोसा इर्वक मनेके, जेल बोगे माय्वलिर मोडि, दर्मता कानुन इंवल सकलिते दोह्‍चि, कोंडे मासि मत्तट. 24 इद कानुन अहन कोंडे मासि मंवलिर मरट नियत्नुर आयन साटि, माकुन किरिस्तुनगा वोसि, वोन्गा बरोसा इरनल किय्वले ताना काम आंद. किरिस्तु वानल वेरि, इद कानुन माकुन मर्किङ किय्वन मोडि काबाड्सेर मत्ता. 25 बति इंके मरट किरिस्तुनगा बरोसा इर्ता काड्कि, उंडे गिर मर्किङ किय्वन मोडि मंवल अद कानुन जुरत सेले.

26-27 मिरट सम्दिर किरिस्तुनगा येत्तिट अनि किरिस्तुना गुन-गांतुन पिय्सि, ताक्सेर मंतिट. अदेन साटि, मिरट सम्दिर गिर येसु किरिस्तुनगा बरोसा इर्ततुन हिंदल बगवंतनुर मरि-मियड आतिट. 28 ते इंके मिह्‍गा यूदुल्क्ना जातितोना सेलेके दुस्रो जातितोना इंवल सेले. दासिना सेलेके माल्कना इंवल सेले. माय्नना सेलेके वेय्लोना इंवल सेले. बति मिरट येसु किरिस्तुनगा बरोसा इर्ता काड्कि, बगवंतल मी सम्दिरकुन उंदि तीर सूडंतोर. 29 अनि मिरट किरिस्तुनुर आसि मंद्किट्ते, अब्राहम्ना संतान आंतिट अनि बगवंतल सीता वाग्दंता आसिर्वाद्नगा ईसदार्क आंतिट.

उंडे करि कीका इंदकिते, www.koyang.in सूडा.