4
1-2 नना मीकुन उंदि नमुना वेहंतोन.
वोरोर दनेवंतन वोरोर मरि मंदंतोर.
तंवोर मरिन पलना वहि निंता पेजे, तंवा सम्दो जाय्जत वोने आंता इन्जेर बाबो लिहि कींतोर.
ते वहि निंदनल वेरि बाबो नेमि कीतोर वोर चोकोट-वायुट सूड्वल सेव्कल, वेह्ता तीर मरि ताका लागर.
अद गट्कते वोर सेव्कन अनि जाय्जतुन ईसदारल आय्वल मरिन परक मनो.
3 ते दादलिर-बायिक्निट!
मरट गिर सते बगवंतन करि किय्वक मनेके, वोर पसिबालल मरिन दाते मत्तट.
अस्के इद दुनियतङ कामि सियोङ अव नेकि-बदिङ पिय्सि दासिर मोडि ताक्तट.*
4 बति बगवंतल नेमि कीता कालम निंद्नेकेने, तंवोर मरि येसुन रोह्तोर.
दर्मता कानुन तीर ताक्वल यूदुल्क्ना जातितगा, उंदि वेय्लोना पीटे जल्मा आतोर.
5 कानुंता अदिकारदुन बूड कोंडे मासि मंवलिर माकुन सुटि किय्ले, बगवंतल तंवोर मरिन रोह्तोर.
इदेन हिंदल बगवंतल माकुन कुद तंवुर मरि-मियड इन्जेर वोटिते येता परंतोर.
6 मरट बगवंतना मरि-मियड आता काड्कि, तंवोर मरिना आत्मा मावङ दिल्क्नगा मंले सारि कीतोर.
वोना आत्मये मा रोपोडल बगवंतन, “बावा!
बाबा!”
इन्जेर केय्सेर मंदंता.
7 ते मरट उंडे गिर सेव्कलिर आय्वट बति, बगवंतनुर मरि-मियड आंदट.
वोना संतान आता काड्कि, माकुन सीता वाग्दंतगा तप्वक ईसा गिर सींतोर.
सक्ति सेलेङ अव पेन्क्नेके मल्मट
8 मोदोल मिरट बगवंतन करि किय्वक मनेके, पेंदङ करल गुन-गान सेलेङ अवेन, पेन्क इन्जेर सेवा कीसेर पिस्तिट.
9 इंके मिरट बगवंतन करि कीतिट.
बति करल सूड्तेके, बगवंतले मीकुन तंवा संतान इन्जेर वोप्तोर.
ते बततुने कामि सियोङ अनि ताकद सेलेङ अव पेन्क्ना सेवतगा कोंडे माय्ले, बारि मर्ला सोन्जेर मंतिट?
10 नमुनतुन इद दिवोस, अद दिवोस; इद महिना, अद महिना; इद सड, अद सड; इद साल, अद साल इन्जेर यूदुल्क्ना जातितुर पिय्सि ताक्वलिक नेकि-बदिङ मिरट बारि पिय्सि ताक्सेर मंतिट?
11 मीकुन चोकोट्ना कबुर वेह्ले, नना बोगे माता तक्लिब सम्दो येर्तम आंतयो बतलो इन्जेर वेरिसि तकपिका आसेर मंतोन.
12 दादलिर-बायिक्निट, हेतु कीम्ट!
मी दात आय्ले, नना मोदोल पिय्सि ताक्वलिक दर्मता कानुंतुन सुटि कीतोन.
ते इंके दया कीसि, मिरट गिर ना मोडि आम्ट अनि अद कानुंतुन पिय्सि ताक्ले, मल्सि सोन्मट.
मोदोल मिरट नाकुन बेय चोकोट सूड्तिट.
13 अद गोस्टि मिरट हेतु कीम्ट.
ना मेंदोडगा येड्कि-दुक मत्ता काड्कि, मिह्गा वातोन.
अहन मिह्गा वाता काड्कि, मीकुन चोकोट्ना कबुर वेहा पर्तोन.
14 अद गट्कते नावा येड्कि-दुकुन हिंदल, मीकुन तक्लिब सीतोन तेर बति, मिरट नाकुन चुडुर-पांदे सूड्मकि.
बति बगवंतनोर दूतल, सेलेके येसु किरिस्तु वातेके, बहंते करुम कींतिटो, अह्ने नाकुन करुम कीतिट.
15 अद गट्कते, मिरट बेय आनंद्ने मत्तिट!
नाकुन पह्जे इत्तेके, मीवङ कड्क तेंड्सि सिय्ले गिर तयर मत्तिट इन्जेर, मीवा पेर्मतुन बारेते गवा वेहा परंतोन.
बति इंके मीकुन बतल आता?
16 उंदि मोका नना मीकुन सतेमुन वेह्ता काड्कि, नाकुन मीवोर पगा-दारल इन्जेर सम्जे मांतिटो बतलो.
17 वूर लबड बोदा किय्वलिर, मीकुन चोकोट सूड्वडगा इचा बतल इत्तेके, मिरट सिरिप वूर वेह्ता तीरे ताकना अनि मीकुन मह्गटल अलग कियना.
अचोरे बति मिरट चोकोट आयना इंवल काड्जिते, मीकुन वूर चोकोट सूड्सेर सेलुर.
18 मीकुन बोदा करुसना इंवल उदेस वूर्गा मंवल चोकोट्ना गोस्टि.
बति नना मिह्गटल लङ मनेके गिर बस्केट मीवा चोकोट आयना इंवल काड्जिते वूर सूडना.
19 ना मरि-मियड्निट!
मीवा बरोसा किरिस्तुनगा गट बडे मानल वेरि, नावा दिलतगा दुक्सते तकपिका आसेरेन मंदंतोन.*
20 मिह्गटल लङ मंवल कीनेके, मी बारेते नाकुन वेले परेसन लाग्सेर मंता.
नना इंके मी सङा मन्मड इत्तेके, मीकुन दुस्रो तरिकते वेह्ंदुन.
किरिस्तुनगा बरोसा इर्वलिर कानुंता अदिकारदुन बूड सेलुर
21 दर्मता कानुन तीर पिस्कोम इंवलिर्निट!
नना वेह्वल केन्जट!
अद कानुंतगा बतल मंतयो वेहंतोन.
22 दर्मा-ग्रंत्नगा, अब्राहमुन इविर मर्क मत्तेर इन्जेर लिहि कीसि मंता.
वूर्गटल वोरोर दासि हागर्तोर+ अनि उंडे वोरोर ताना माल्के सारनोर+ इन्जेर मंता.
23 दासिन पुट्वल इस्मयेल माय्नना पिलंतुन पिय्सि, सादरन जल्मा आतोर.
बति वोना मर्मिना वेय्लो सारन पुट्वल, इसक सिरिप बगवंतना वाग्दंतुन हिंदले जल्मा आतोर.
24 इव गोस्टिङ नमुनना रूप्ने लिहि कीसि मंतङ.
इव रंड वेय्लोक रंड नियम्कुन मोडि मंतङ.
सिनायि गुटत पोरो बगवंतल दर्मता कानुंतुन मोसेना केय्दे सीतोर.
बति इद पडना नियम दासि हागरतुन मोडि दासि-पांदगा मंलेने, मरि-मियडुन जल्मा सींता.
25 अद हागर दर्मता कानुन सीता अरेबिया देस्ना सिनायि गुटत मोडि मंता.
अनि कानुन तीर ताकना इन्जेर बोदा किय्वलिर मंवल, दर्तुरित पोरोडा येरुसलेम नगुडुन मोडि गिर मंता.
अद कानुंतगा बरोसा इर्वलिर सम्दिर यूदुल्क दासि-पांदगन मंतेर.
26 बति स्वर्ग्नगा मंवल येरुसलेम अब्राहम्ना वेय्लो सारन मोडि मंता.
तेनुर मरि-मियड दासि-पांदे मंवलिर आयुर.
पूना नियमुन हिंदल पर्बुनगा बरोसा इर्वलिर मा सम्दिरा अवल इदे आंद.
27 स्वर्ग्नगा मंवल येरुसलेमुन बारेते दर्मा-ग्रंत्नगा,
“मरि-मियड आय्वक्ने सडसाट मंवल बायि!
निमे आनंद येता.
बालेंता नोपिङ वाय्वक मंवल बायि!
कुसिते किलिया!
बारितेके माड्सो मंवडुन तेर,
माड्सो सेले अदेनुर मरि-मियड वेलेटिर मंतेर”+
इन्जेर लिहि कीसि मंता.
28 अदेन साटि दादलिर-बायिक्निट!
अब्राहम मिय्तोर मरि इसकुन मोडि, मरट गिर बगवंतना वाग्दंतुन हिंदले वोनुर मरि-मियड आतट.
29 अब्राहम्ना गट्कते, माय्नना पिलंतुन पिय्सि, जल्मा आय्वल इस्मयेल, बगवंतना आत्मता सक्तितुन हिंदल, जल्मा आय्वल इसकुन दुक्सा सीतोर.
अह्ने इंके दर्मता कानुन पिय्सि ताक्वलिर लोकुर, पर्बुनुर बक्तलिर आय्वलिर मीकुन दुक्सा सीसेर मंतेर.
30 बति इदेन बारेते, दर्मा-ग्रंत्नगा बतल इन्जेर मंता?
अदेनगा, “इद दासिन अनि तानोर कांडिन तेंड्सि पूडा.
तानोर कांडि, मर्मिना वेय्लोनोर मरि इसकुन बरोबर जाय्जतुन पोरो ईसदारल आयोर”+ इन्जेर लिहि कीसि मंता.
31 ते दादलिर-बायिक्निट!
मरट दासि वेय्लोनुर मरि-मियड आय्वट.
बति माल्केनुर* मरि-मियड आंदट.