5
1 मरट दासि-पांदगा कोंडे मासि मंवक्ने, किरिस्तु माकुन मोक्डो सुटि कीतोर.
अदेन साटि इदेनगा गट निलट अनि दासि-पांदे इर्वल दर्मा-ग्रंत्नङ नेकि-बदिनगा मर्ला कोंडे माय्मट.
तोल कत्रि कियुस्वल कार्या
2 दिहंते केन्जट!
बगवंतना नदुडे नियत्नुर आय्ले, मिरट तोल कत्रि कियुस्ले वोप्किट्ते, किरिस्तुनल मीकुन बतय पाय्दा पुटो इन्जेर नना वेह्चेर मंतोन.
3 तोल कत्रि कियुस्ले वोप्वल हर वोरोर, पूरो दर्मता कानुंतुन पिय्सि, ताका लागर इन्जेर मर्ला वेह्चेर मंतोन.
4 मिह्गटल बूर्ते दर्मता कानुंतुन पिय्सि, बगवंतना नदुडे नियत्नुर आकोम इंतेरो, किरिस्तुनल वूर पाके मातेर.
इदेन हिंदल, तम्वा पोरो मंवल बगवंतना पेर्मता-दयतुन गिर वूर सोडुस्तेर.
5 नना इद बारि वेहंतोन इत्तेके, मरट किरिस्तुनगा इर्ता बरोसतुन हिंदल, नियत्नुर आतट.
नियत्नुर लासि, बगवंतल इर्ता आसिर्वादुन साटि आसते पिसेर मंतट.
इद आसा बगवंतना आत्मतुन हिंदल मा रोपो पुट्सेर मंता.
6 येसु किरिस्तुनगा बरोसा इर्तुरकुन तोल कत्रि कियुस्वल सेलेके कियुस्वक मंवडुन हिंदल बतय पाय्दा सेले.
बति मीवा बरोसतुन पेर्मता रूप्ने आजु-बाजुतोन तोह्वडुन हिंदल पाय्दा मंता.
7-8 मोदोल मिरट चोकोट्ना कबुडुन पिय्सि चोकोट ताक्तिट.
ते अद सते बोदतुन पिय्सि ताक्वल बारि सुटि कीतिट?
मीवा सरदुन बूर अड्डम आतेर?
वूर अड्डम आय्वलिरङ कपट्नङ बोदङ, मीकुन केय्तोर वोर बगवंतनल असले वाय्मकि.
9 वूरङ बोदन बारेते दिहंते मंट!
बारितेके, इचुसि सोवुस्वल चीज वाड्तेके गिर, नह्ता अद पूरो पिंडितुन सोवुसंता.
10 वूरङ बोदन मिरट वोप्वक्ने, नना वेह्ततुन वोपंतिट इंवल बरोसा पर्बु नाकुन सीतोर.
अनि मीकुन तम्वङ बोदने परेसन किय्वलिर बातुर मत्तेके गिर, हर वोरोन बगवंतल तप्वक सिक्सा सींतोर.
11 नावुर दादलिर-बायिक्निट!
तोल कत्रि कियना इन्जेर पर्जतुन नना गिर वेह्चेर मंतोन इन्जि कहितुर इंतेर.
मोका नना अहन वेह्मड इत्तेके, मा यूदुल्क्ना केय्दे, इव दुक्सङ बारि बोगे मांदुन?
बति करल सूड्तेके, सिरिप मोद्नगा येसु किरिस्तुना आता अद मरंतुन हिंदले, नियत्नुर आंतेर इन्जेर वेह्ता काड्किने, नाकुन वूर उल्टा आतेर.
12 मीकुन लबड बोदने परेसन किय्ले सूड्वलिर, हिज्डलिर मोडि तम्वा तमा संसारतुन कोय्सि वाट्तेके, चोकोट मंदंता.
बगवंतना आत्मा वेह्ता तीर पेर्मते ताक्वल
13 दादलिर-बायिक्निट!
बगवंतल मीकुन दासि-पांदल मोक्डो सुटि कियना इन्जेरेन केय्तोर.
मीवङ मेंदोडङ आसन पूरि किय्ले, इहिन मोक्डो सुटि कीततुन वाप्रि किय्मट.
इदेन बद्लि वोरोन वोरोर पेर्मा किय्ले, अनि मदत किय्ले, तान वाप्रि कीम्ट.
14 बारितेके, “नीवा निमे पेर्मते सूड्तपे, नी आजु-बाजुतुरकुन पेर्मते सूडना”+ इंवल आगेतुन पिय्सि ताककिट्ते, दर्मता कानुंतगा मंवलिक सम्दो आगेन पिय्सि ताक्तुरा लेकते वांतिट.
15 बति नेय्क उंदितुन उंदि कस्क्सेर, चीरिसेर बहन मंदंतङो, अह्ने मिरट गिर मंद्किट्ते वोरोन हिंदल वोरोर पूरो नासेडम आंतिट.
इदेन बारेते दिहंते मंट!
16 नना वेह्वल बतल इत्तेके, मी रोपो मंवल पवित्रा आत्मा वेह्ता तीर ताकट.
अस्के करेबलिक आसन पूरि किय्वक मंदा परंतिट.
17 बारितेके, करेबलिक आसङ बगवंतना आत्मा कोर्वलिकुन उल्टा मंदंतङ.
इहिन मेंदोल अनि बगवंतना आत्मा कोर्वलिक उल्टा मत्ता काड्कि, बवेंते बस्केट चोकोट कीकोम इंतिटो, अवेन किया पर्विट.
18 बति मिरट, पवित्रा आत्मा वेह्ता तीर ताककिट्ते, दर्मता कानुंता अदिकारदुन बूड मंविट.
19 बस्केते मिरट, करब आसा तीर ताकंतिटो, अस्के मीवङ काम्क तात्कर दिसंतङ.
अव बव इत्तेके: पीर किय्वल, बे-सुदुड काम्क किय्वल, मेंदोडङ आसन पूरि किय्वल,
20 मूर्तिना पूजा किय्वल, सोदेङ किय्वल, दुस्रुरकुन बिकट्ने सूड्वल, दुस्मंते ताक्वल, कुटा कुटा आय्वल, जग्डङ किय्वल, सिरिप तंवा बारेते सोन्च किय्वल, बेद-बाव्ते सूड्वल, पाल्टिङ किय्वल,
21 कड्क वेय्वल, कल-पिदेडल आय्वल, निसते किय्वलिक काम्क अनि उंडे वेले ईतङ काम्क दिसंतङ.
इव ईतङ काम्क किय्मट इन्जेर मोदोल वेह्चि मत्तोन अनि इंके गिर वेह्चेर मंतोन.
बारितेके ईतङ काम्क किय्वलिर बगवंतना राज्नगा ईसा येता परुर.
22-24 बति बूर्ते येसु किरिस्तुनगा बरोसा इर्तेरो, वूर तम्वा पाप्ना जिन्गनितुन तम्वङ करेबलिक आसन बरोबर, मोद्नगा टाङि कीतेर.
अनि बूर्ते अहन टाङि कीतेरो, वूर बगवंतना आत्मा वेह्ता तीर ताकंतेर.
वूर्गा पेर्मा, आनंद, सांति, वोर्च्वल, दया, चोकोट-पान, बरोसा, सादु-पान अनि करब आसतुन आपुस्वल इंवलिक गुन्क पय्दोस आंतङ.
इव गुनकुन पिय्सि ताक्मट इन्जेर वेह्वल बदे कानुन सेले.
वोरोना वोरोर सेवा कीकट