6
1 दादलिर-बायिक्निट!
मिह्गटल बोरे उंदि पाप्नगा कोंडे मातेके, मी रोपो बक्तिते पिस्वलिर, सादु-पांदे वोन मलुसि, चोकोट्ना सरि ताकुसना.
बति आतल पाप्नगा कोंडे माय्वक्ने दिहंते मंट.
2 आपतिनगा, दुक्सनगा वोरोन वोरोर मदत कीसेर पिसट.
अस्के किरिस्तुना आगेतुन+ पिय्सि ताक्तुर आंतिट.
3 बोरे आयि सादरन मायनल आसि गिर, ‘दुस्रुर्गटल डगुन’ इन्जेर सम्जे मानुर्ते, वोर आतोर तंवा तना पसि किय्वल आंतोर.
4 हर वोरोर तंवा ताक्वडुन बारेते तनये परिक्सा कियना.
तंवा ताक्वल चोकोट मंदर्ते, आनंद येता वचो बति, उंडे वोरोना ताक्वडुन तेडते सूड्वा.
5 बारितेके, हर वोरोर तंवा ताक्वडुन बारेते जिमेदारि आया लागर.
6 बगवंतना वचन वेह्वन, अद वचन केन्ज्वलिर तम्गा मंवलिक चोकोट्नङ सम्दो वस्तुनल* ईसा सियना.
7 ‘बगवंतन पसि किया परंतोम्’ इन्जेर सोन्च कीसेर पिसलिर आय्मट!
वोर पसे माय्वल आयोर.
मायनल बद्ते विजा वीतंतोरो, अदे पंटा कोया लागर.
8 बारितेके मायनल तंवङ करेबलिक आसन पिय्सि ताकनुर्ते, नासेडम इंवल पंटा कोयंतोर.
बति बगवंतना पवित्रा आत्मा वेह्ता तीर ताकनुर्ते, बस्केट मंवल जीवा इंवल पंटा कोयंतोर.
9 ते मरट चोकोट्नङ काम्क अविवक्ने कीसेर मंद्कट.
बगवंतल बरोबर वकत्ने अवेना पंडि सींतोर.
10 अदेन साटि सम्दिरा, मुकेते येसुनगा बरोसा इर्तुर वूरा चोकोट जर्ग्ले, बस्के मोका पुड्तेके अस्के, चोकोट्नङ काम्क कीसेरेन मंद्कट.
इद तरिकते बगवंतना आत्मा वेह्ता तीर ताककट.
पव्लु आक्रिता सूचना सिय्वल
11 इव डगुक अक्सेरकुन सूडट!
कुद नावङे केय्क्ने लिहि कीसेर मंतोन.
12-13 बस्केते मरट, सिरिप मोद्नगा सीता किरिस्तुना जीवतुन हिंदल बचे माया वचो इन्जेर इंतटो, अस्के यूदुल्कनल दुक्सङ वांतङ.
इवेनल तपुस्ले, लबड बोदा गुरुर तोल कत्रि कियना इन्जेर पर्जतुन जुल्मा कींतेर.
वूर तोल कत्रि कियुस्तुर आसि गिर, पूरो दर्मता कानुन पिय्सि ताक्सेर सेलुर.
बति वूर वेह्ता तीर मिरट ताकंतिट इन्जेर तोह्ले, मीकुन तोल कत्रि कियुसि, वूर दुस्रुर यूदुलकुन मुने गर्वते मंले, अहन कींतेर.
14 नाकुन मा येसु किरिस्तु पर्बुना मरन आय्वल मोद्ना दुक्सतुन तपुसि, दुस्रो बदेनगने गर्वा वाय्वक मनि.
बारितेके, वोना मरंतुन हिंदल नना गिर इद दुनियतङ रीति-रिवजकुन पिय्सि सातपिनय आतोन.
अनि ना साटि अव रीति-रिवज्क गिर सातपिनय आतङ.
15 तोल कत्रि कियुस्वल सेलेके कियुस्वक मंवडुन हिंदल बतय विलुवा सेले.
बति येसुना केय्दे मावा मन-दिल मारिसि, पूना तरिकते पिस्वले मुकेम.
16 इद तरिकते पिस्वलिर सम्दिरकुन मुकेते इज्रयेल लोकुरकुन बगवंतल सांति सीसि, दया तोहिर!
17 येसुन साटि ना मेंदोडगा लाग्तङ दन्कनङ बरङ मंतङ.
अवेन सूड्सि, मिह्गटल बोरे नाकुन उंडे अदिक तक्लिब सिय्वक मनिर.
18 दादलिर-बायिक्निट!
मा येसु किरिस्तु पर्बुना पेर्मता-दया, मीवङ आत्मन सात मनि!
आमेन!