स्टीपेन बोदा वेह्वल
7
1 अस्के पेर्सोर कटोडल, “इव गोस्टिङ करल आंदुङ कि?”
इन्जेर स्टीपेंतुन पूसि कीतोर.
2-3 ते वोर स्टीपेन, “ना तादुर-बाबुर्निट, केन्जट!
तोले मावा कांदांतोर बाबो अब्राहम हारंतगा वाय्वक मोदोल मेसपोटेमियतगा मत्तोर.
अस्के वोन मय्मा वाले बगवंतल दिसि, ‘नीवा देसुन नीवा चुटल-बंदुन सुटि कीसि, नना तोह्वल देस्नगा सोन’ इन्जेर अब्राहमुन वेह्तोर.
4 अस्के वोर कलिदियुल्क्ना देसनल, हारंतगा सोन्जि मत्तोर.
“अहन मनेके, अब्राहम्नोर बाबो अगा मार्तोर.
मार्ता पेजे, अब्राहमुन बगवंतल मिरट इंके मंवल, इद देस्नगा वानल कीतोर.
5 बति वोन इद देसुन रोपो कोजिमेंड बोमिता ईसा गिर सिय्मकि.
बति मरि-मियड आय्वक मनेकेने, ‘इद बोमितुन वोना संतांदुन सींतोन’ इन्जेर वाग्दन सीतोर.
6 बतल इत्तेके, ‘मोदोल नीवा संतांदुर दुस्रो देस्ने दांतेर.
अद देस्नुर वीरकुन नालुङ नुह्क (400) साल्क दुक्सा सीसेर दासि-पांदे इरंतेर.
7 अहन दासि-पांदे इर्तुरकुन आक्रित नना सिक्सा सींतोन.
अद सम्दो आता पेजे, नीवा संतांदुर इगे मल्सि वांतेर.
अस्के नना इद देसुन वूरकुन सींतोन.
इगे वूर नावा सेवा कीनिर’ इन्जेर बगवंतल अब्राहमुन वेह्तोर.
8 तनकुन अनि अब्राहम्ना कांदांतुर नड्डुम तोल कत्रि कियना* इंवल, उंदि कार्यता नियम्ना निसनि आसि मंदना इन्जेर बगवंतल इर्तोर.
अदेन साटि, अब्राहम तंवोर मरि इसक पुट्सि, आट रोज्क आता पेजे, अद कार्या कियुस्तोर.
इसक तंवोर मरि याकोबुन अनि याकोब तंवुर बारा जन्क मरकुन अद कार्या कियुस्तोर.
वूर बारा जन्क मर्के बारा कांदान्क्नुर मोदोडुर मा बाबुर आंदिर.
9 वूर याकोब्नुर मर्क तम्वोर तमुर योसेपुन पोरो कुटा कुटा आसि, दासि-पांदे मंले, ईजिप्ट्नुरकुन वोम्तेर.
बति बगवंतल वोन सात सीतोर.
10 वोन गाचर-गंडमनल बचि कीतोर.
बगवंतल योसेपुन बुदि-गियन सीसि, आसिर्वाद सीतोर.
ते परो राजल अद सूड्सि, तंवा राज्ना अनि सम्दो रोतुन ताकुसन साटि अदिकारिन दात वोन नेमि कीतोर.
11 अस्के ईजिप्ट अनि कनान देस्नगा करु अर्ता.
ते मा तोत्तुरकुन तिंले काने सेले मत्ता.
12 ईजिप्ट देस्नगा चंदिता रासि वेले मंता इंवल याकोब केन्चि, तंवुर मरकुन मोदोल जोका अगा सारि कीतोर.
13 अहन रेंडवा जोका वूर वाता पेजे, योसेप तंवुर तादल-तमुकुन तना बोर इंवल वेह्तोर.
अनि वूरकुन परो राजनगा वोसि बेटि कीतोर.
14 अस्के योसेप तंवोर बाबो याकोबुन अनि कुटुंबतुर सम्दो सत्तर सिय्विर (75) जनकुन ईजिप्ट केयुस्तोर.
15 ते याकोब अनि वोना कुटुंबतुर ईजिप्ट देस्ने सोत्तेर.
अगा वोर अनि मावुर तोत्तुर तादुर-बाबुर गिर सम्दिर मार्तेर.
16 अहन वेले साल्क आता पेजे, वूरा कांदांतुर वूरङ बोकन सेकेम तत्तेर.
अनि अब्राहम हामोर्ता संतांदल येत्ता, वीच्ना बुयरितगा इर्तेर.
17 “इदेन मुने, बस्केते बगवंतल अब्राहमुन सीता वाग्दंतुन पूरि किय्वल वकत करुम वातयो, अस्के ईजिप्ट्नगा मा इज्रयेल पर्जता जनोबा वेले बडे माता.
18 बति अस्के योसेपुन बारेते वोड्कि सेलोर वोर, ईजिप्ट देस्नोर राजल आतोर.
19 वोर राजल मा तोत्तुरकुन पसि कीसि, दाबि कीतोर.
बहन इत्तेके, मोड्डे-मोड्डलिर पुड्तेके, वूरकुन बह्रि इरुसि जकुसींदुर.
20 अदे वकत्ने बगवंतनङ कडकुन बेय सोबते दिस्वल मोसेना जल्मा आता.
मूंद महिनङ वोर मोड्डल अवल-बाबोना रोन बेर्स्तोर.
21 अद आता पेजे, मोसेन बह्रि सुटि कीतेर.
अस्के परो राजना मियड वोन वोटिते येच्चि, तंवा पीटे जल्मा आतोर वोर मरिन मोडि पोसि कीता.
22 मोसे ईजिप्ट देस्नङ सम्दो विय्दङ करितोर.
वड्क्वडगा अनि काम किय्वडगा वेले जेटि आतोर.
23 “मोसेन चालिस (40) साल्क मनेके, तंवा इज्रयेल पर्जतुन सूडना इंवल बुदि पुट्ता.
ते वूरकुन सूड्ले अगा सोत्तोर.
24 अस्के मोसे, इज्रयेल्तोन वोरोर ईजिप्ट्नोर जह्वल सूड्सि, वोर इज्रयेल्तोन बचि कीतोर.
अनि ईजिप्ट्नोन जक्सि, इज्रयेल्तोना पगा येत्तोर.
25 तंवा हिंदल, वूर लोकुरकुन बगवंतल सुटि कियुसंतोर इन्जेर सम्जे मानिर इत्तोर.
बति वूर सम्जे माय्मकि.
26 दुस्रो नेटि इविर इज्रयेल लोकुर जग्डा कीसेर मत्तेर.
मोसे वूरकुन सूड्सि, ‘दादलिर्निट!
मीवा मिरट बारि नोमुर कींतिट?
सांतिते मंट’ इन्जेर मीरि कियन साटि सूड्तोर.
27 बति वूर्गटल तंवोर सोप्तन नोमुर किय्वल मोसेन बग्ला डग्लि कीसि, ‘मा पोरो अदिकारिन दात तस्वा किय्ले, बोर नीकुन नेमि कीतोर?’
इन्जेर पूसि कीतोर.
28 अनि ‘निने ईजिप्ट्नोन जक्ति.
अहन नाकुन गिर जकका इंति कि बतल?’
इन्जेर इत्तोर.
29 ते इद गोस्टि केन्चि, मोसे ईजिप्टनल मिद्यान देस्ने परर आसि सोत्तोर.
अनि अगा मर्मिङ आसि, इविर मरकुन जल्मा सीसि, पर-देसिन मोडि पिसेर मत्तोर.
30 “वोर मोसे चालिस (40) साल्क आता पेजे, उंदि दिया गोरेङ मेह्चेर सीनयि गुटत पोरो सोत्तोर.
अगा उंदि पोदेला पोच्चेर मत्ता.
अव जार्क्नगा बगवंतनोर वोरोर दूतल दिस्तोर.
31-32 अद सूड्सि मोसे गुल आसि, नेह्ना सूड्का इन्जेर करुम सोत्तोर.
ते ‘नना अब्राहम, इसक अनि याकोब इंवलिर नीवुर तोत्तुरोर बगवंतना आंदुन’ इंवल लेङ केन्जा वाता.
अदेन साटि, वोर दड्कि तिन्जि, नेह्ना सूड्ले गटि-दीर्या किय्मकि.
33 अस्के बगवंतल, ‘नीवङ चेपुल्क तेंडा.
निमे निल्सि मंवल पवित्रा जागा आंद.
34 ईजिप्ट्नगा ना पर्जा बोगे माय्वल करब्ना दुक्सतुन सूड्तोन.
वूरा आड्वडुन केन्ज्तोन.
वूरकुन अद दुक्सतल सुटि कियुस्ले, बूड रेय्सि वातोन.
मल्सि नीकुन ईजिप्ट सारि कींतोन.
इंके सोन’ इन्जेर इत्तोर.
35 ‘मा पोरो अदिकारिन दात तस्वा किय्ले, बोर नीकुन नेमि कीतोर?’
इन्जेर इज्रयेल लोकुर मोदोल वेर मोसेन उल्टा तिरितेर.
बति बगवंतले, पोदेलतगा दूतना केय्दे वेहुसि, अदिकारिन दात अनि सुटि कियुस्वन दात मोसेन सारि कीतोर.
36 वोर मोसे वूरकुन ईजिप्टनल तर्नेके, ईजिप्ट्नगा, रगल सम्दुरतगा अनि बोडि गुटनगा चालिस (40) साल्क वेले चमत्कार्क अनि मय्मतङ काम्क कीतोर.
37 ‘बगवंतल नाकुन मिह्गटल बहंते नेमि कीतोरो, अह्ने वोरोर पर्वक्तन मी कांदांतुर्गटल सारि कींतोर’ इन्जेर इज्रयेल लोकुरकुन वेह्वल वेर मोसेय आंदुर.
38 बोडि गुटनगा मीरे माय्वल तोत्तुरा सङम्नगा मन्जि, सीनयि गुटतगा बगवंतनोर दूतन सङा वड्क्सि, मा साटि जीवा वाले वचन तर्वल वेर मोसेय आंदुर.
39 “बति मा तोत्तुर, वोर वेह्तप केन्ज्वक्ने वोन उल्टा तिरितेर.
मल्सि ईजिप्ट सोंदना इंवल वूरङ दिल्क्नगा मत्ता.
40 ते वूर, ‘ईजिप्ट देसनल माकुन तर्वल मोसेन बतल आतयो टावा सेले.
माकुन मुने ताकुस्ले, पेन्क्नङ मूर्तिङ निव्डि कीम’ इन्जेर अहरोंतुन पूसि कीतेर.
41 अद गट्कते वूर उंदि पड्डता मूर्ति निव्डि कीसि, तान्गा बलिदान सीतेर.
तम्वङ केय्क्ने निव्डि कीतत हिंदल बेय आनंद्ने मत्तेर.
42 अस्के बगवंतल हाबडगा मंवलिक्ना पूजा-पतेरा किय्ले वूरकुन सुटि कीतोर.
इद गोस्टि पर्वक्तलिर लिहि कीतङ ग्रंत्क्नगा,
‘इज्रयेल लोकुर्निट!
मिरट बोडि गुटनगा
चालिस (40) साल्क बलिदान्क अनि अर्पनङ
ना साटि सीतिट कि बतल?
सिय्मकि!
43 मिरट निव्डि कीसि पूजा किय्ले मोलेक पेंदा डेरा
अनि रोंपा इंवल सुकुम पेंदा मूर्तितुन तोच्चि वोतिट.
अदेन साटि मीकुन अद बबुलोन
देस्ना हंदा बाज सारि कींतोन’+
इन्जेर मंता.
44 “बगवंतल तम्वा सङा मत्तोर इंवडुन तोह्ले, मा तोत्तुर अद डेरतुन बोडि गुटनगा तम्वा पेजेय तर्ंदिर.
इद डेरा बगवंतल मोसेन तोह्ता नमुना तीर मत्ता.
45 अद आता पेजे, येहोसुवल पर्जतुन ताकुस्तोर अनि बगवंतल मा तोत्तुरा केय्दे दुस्रुरकुन पूडुस्तोर.
अद गट्कते अद डेरतुन तम्वा पेजेय पिय्सि वातेर.
दाविद राजना कालम वेरि अद डेरा मत्ता.
46 इज्रयेल लोकुर आरदना किय्ले, ‘नी साटि उंदि मंदिर दोहा सीम’ इन्जेर याकोब्ना कांदांतोर बगवंतन दाविद कोर्तोर.
बगवंतना दया दाविदुन पोरो मत्ता.
47 बति अद मंदिरतुन बगवंतन साटि दोह्पुसीतोर मात्रम सोलोमोन राजले.
48 तेर बति सर्वा सक्ति वाले बगवंतल माय्नलिर दोह्तङ मंदिर्क्नगा मनोर.
49-50 इदेन बारेते पर्वक्तलिर इहिन इत्तेर:
‘हाबर नावा राजा-गादि आंद.
दर्तुरि नावा कादुन बूड्ना कुतुल आंद.
ना साटि बातल मंदिर दोह्पुसींतिट?
नाकुन आरम येत्ले जागा बगा मंता?
इव सम्दो नावय केय्दे निव्डे मातङ’+
इन्जेर बगवंतल इत्तोर.
51 “मूजोर्क्निट!
बगवंतना वचंतुन मीवङ दिल्क्ने वोप्सेर सेल्विट अनि केव्क्ने केन्चेर सेल्विट.
मी तोत्तुर दाते मिरट गिर पवित्रा आत्मतुन बस्केट मर्ला बड्सेर मंतिट.
52 मी तोत्तुर बोर पर्वक्तन दुक्सा सिय्वक मत्तेर?
वोर नीतिवंतना वाय्वडुन बारेते, वेह्वलिरकुन जक्तेर.
अनि मिरट इंके, वोर नियत्नोर किरिसतुन हव्लि कीसि जक्तिट.
53 बगवंतल तंवुर दूतलिरा केय्दे+ मीकुन दर्मता कानुंतुन सियुस्तोर.
बति मिरट तान पिय्सि ताक्सेर सेल्विट” इन्जेर स्टीपेन संहेद्रिंतुर सम्दिरकुन वेह्तोर.
स्टीपेंतुन बंडने पासि जक्वल
54 अव गोस्टिङ केन्चि, वोन सूड्सि बेय सोङ्ने पल्क कोर्क्तेर.
55 बति स्टीपेन पवित्रा आत्मता सक्तिते निन्चि, पोरो हाबडेके सूड्तोर.
अस्के वोर, बगवंतना मय्मता वेड्चितुन अनि बगवंतना तिना बग्ला येसु निल्सि मंवल सूड्तोर.
56 ते स्टीपेन, “अचुला सूडट!
हाबर* कोले मासि, स्वर्ग्नोर माय्नल बगवंतना तिना बग्ला निल्सि मंवल सूड्सेर मंतोन” इन्जेर वेह्तोर.
57 अव गोस्टिङ केन्चि, केव्क मुह्तेर.
अनि येंटने बेय जोर्ते किलिसेर, वोन पोरो सम्दिर मुच्लि अर्तेर.
स्टीपेंता जीवा सोनल वेरि बंडने पाय्वल
58 अनि वूर अद नगुडल वोन बह्रि येरिसेर वोसि, वूर गवदार्क तम्वङ सालुवङ सव्लु इंवल डियोनगा इर्तेर.
59 वोन पोरो बंडङ बिर्किडि किय्वल सुरु कीतेर.
अस्के स्टीपेन, “येसु पर्बु!
ना आत्मतुन येता” इन्जेर पार्तना कीतोर.
60 अनि मुर-टोङ्रङ कोट्सि, “पर्बु!
इद पापुन वूर पोरो वाट्मा” इन्जेर बेय जोर्ते किलितोर अनि तंवा परन सुटि कीतोर.