चर्चितुरकुन सव्लु दुक्सा सिय्वल
8
1-3 कहितुर बक्तलिर जोर्ते आड्सेर, दुक्सते स्टीपेंता कूरदुन वोसि माति कीतेर.
बति स्टीपेंता मरन सव्लुन आनंद सीता.
अव दिवोसकुन रोपो सव्लु येसुनुर बक्तलिरङ रोह्क रोह्क नेङ्सि, वेय्लो-माय्नलिरकुन येरिसेर तचि, जेल्क्नगा वाट्सेर मंदुर.
इहिन वूरकुन दुक्सा सिय्वल सुरु कीतोर.
ते अपोस्तुल्क तपुसि, मेय्तुर सम्दिर यूदया अनि समरया येरियनगा परर आतेर.
समरयतगा चोकोट्ना कबुर पग्रे माय्वल
4 अदेन साटि, अगटल बेंदुर-हके वेलेटिर बक्तलिर पग्रे मासि, वूर सोत्ता हर जागतगा, येसुन बारेता चोकोट्ना कबुडुन पचर कीतेर.
5 पिलिपु इंवल वोरोर बक्तल समरया येरियता उंदि नगुडे सोन्जि किरिसतुन बारेते पचर कीतोर.
6 पर्जतङ गुब्डङ पिलिपु कीतङ मय्मतङ काम्क सूड्सि, वोर वेह्ता बोदा दिहंते केन्ज्तेर.
7 अद गट्कते वेलेटिर्गा सोप्रे मासि मंवलिक, बूत्क जोर्ते किलिसेर बह्रि पेसिसि सोंदुङ.
वेलेटिर केय-काल्क अर्सि सोत्तुर अनि कूटलिर चोकोट आतेर.
8 अदेन साटि, अद चहर्तुर वेले कुसिते मत्तेर.
सोदेङ किय्वल सीमोन
9 अदे नगुडे सोदेङ किय्वल सीमोन मत्तोर.
वोर चमत्कार्क कीसेर तना बेय डगुर मय्मा वालेना इन्जेर वेह्चेर मंदुर.
अद सूड्सि समरयतुर पर्जा गुल आंदिर.
10 चुडुक-डगुक सम्दिरे, “बगवंतना सर्वा सक्ति इंवल वेरे आंदुर” इन्जेर इंदिर.
11 वोर वेले साल्कनल तंवङ मंतर्क्ने चमत्कार्क कीसेर मत्ता काड्कि, वोर वेह्तङ दिहंते केन्चेर मंदिर.
12 बति पिलिपु बगवंतना राजुन बारेते अनि येसु किरिसतुन बारेते, चोकोट्ना कबुर पचर कीतोर.
अद केन्चि वेलेटिर वेय्लो-माय्नलिर नम्सि, बाप्तिस्मा येत्तेर.
13 वोर सीमोन गिर नम्सि बाप्तिस्मा येत्तोर.
पिलिपुन करुम मन्जेर वोर किय्वलिक चमत्कार्क अनि मय्मतङ काम्क सूड्सि, बेय गुल आतोर.
14 समरयतुर बगवंतना वचंतुन वोप्तेर इंवल गोस्टितुन येरुसलेम्नगा मंवलिर अपोस्तुल्क केन्चि, पेतुरतुन अनि योहंतुन वूर्गा सारि कीतेर.
15-17 बारितेके इदेन मुने, वूर येसु पर्बुना पोरोडे बाप्तिस्मा सिरिप येच्चि मत्तेर अचोरे, वूर्गा पवित्रा आत्मा रेय्सि वाय्लेके मत्ता.
वूर वाता बरोबर पवित्रा आत्मा वायना इन्जेर, बक्तलिर पोरो केय्क इर्सि पार्तना कीतेर.
अस्के पवित्रा आत्मा वूर बक्तलिर्गा वाता.
18 अपोस्तुल्क वूर पर्जत पोरो केय्क इर्ततुन हिंदल, पवित्रा आत्मा वाय्वल सूड्सि, सीमोन कोतङ वूर्गा इर्तोर.
19 अनि, “नना बोन पोरोते केय्क इरंतोनो, वूर्गा पवित्रा आत्मा वानल, इद अदिकार नाक गिर सीम्ट” इन्जेर अपोस्तुलकुन पूसि कीतोर.
20 अस्के पेतुरु, “बगवंतना वरमुन निमे कोतने येत्ले सूड्ता काड्कि, कूरतङ नी कोतङ नी बरोबरे नासेडम आयिङ.
21 बगवंतना नदुडे नीवा दिल्ता बुदि नीटम सेले.
अदेन साटि इद सेवतगा नीकुन ईसा सेले.
22 ईतल नीवा करब बुदितुन बारेते, चुक चुके मासि पर्बुन पार्तना कीम.
मोका नीकुन पर्बु मापि किया वचो.
23 बारितेके, निमे पूरो केय्मुल विक्ने अनि बगड-नियत्ने कोंडे मासि मंति” इन्जेर सीमोंतुन वेह्तोर.
24 अद केन्चि सीमोन, “मिरट वेह्ता अद बदे गिर जर्ग्वक्ने, ना हिंदल आसि, पर्बुन मापि तल्कट” इन्जेर अपोस्तुलकुन कोर्तोर.
25 अद आता पेजे, पेतुरु अनि योहन, समरया येरियतङ वेले नह्क्ने वेलिसेर, पर्बुन बारेता चोकोट्ना कबुर पचर कीतेर.
अद आता पेजे, वूर येरुसलेम मल्सि वातेर.
पिलिपु अनि इतियोपियतोर मंत्रि
26 अस्के बगवंतनोर दूतल, “निमे तेच्चि काल्वडा बाज्ना, येरुसलेमनल उस्के बोमिता गाजतेके सोंवल सर्दगा सोन” इन्जेर पिलिपुन वेह्तोर.
इद सरि बोडि गुटनगा मत्ता.
27 तेर बति, वोर तेच्चि दूतल वेह्ता तीर सोत्तोर.
अगा वोरोर इतियोपियतोर हिज्डल मत्तोर.
वोर इतियोपियता रानिना* दन-दव्लतुन सूड्वल मंत्रि आंदुर.
वोर येरुसलेम पार्तना-विंति किय्ले वातोर.
28 अनि इंके वोर मल्सि सोन्जेर रतुन रोपो उच्चि, येसया पर्वक्तल लिहि कीता ग्रंतुन जोर्ते वाचि कीसेर मत्तोर.
29 अद वकत्ने, “निमे अद रतुन करुम सोन” इन्जेर बगवंतना आत्मा पिलिपुन वेह्ता.
30 ते पिलिपु विच्चेर रतुन करुम सोत्तोर.
अस्के वोर मंत्रि येसया पर्वक्तल लिहि कीता पुस्तक्ना बागम वाचि किय्वल केन्चि, “निमे वाचि कीततुन अर्तम किया पर्सेर मंति कि?”
इन्जेर पिलिपु वोन पूसि कीतोर.
इतियोपियता रानिनोर मंत्रिन सङा पिलिपु रत्नगा उच्चि चोकोट्ना कबुर वेह्वल
31 ते, “बोरे पोडि कीसि, वेहा बीगर नाकुन बहन अर्तम आयर” इन्जेर इन्जि, तंवा सङा रत्नगा उदा इन्जेर पिलिपुन कोर्तोर.
32 वोर मंत्रि,
“वोन वूर कोयन साटि वोय्वल गोरेतुन दात ताकुस्तेर.
तंवा बूरा कत्रि किय्वन मुने गोरे बहन दब मंदंतयो,
अह्ने वोर तोड्डि मुह्चि मत्तोर.
33 वोना हिजत वोसेर, कपट्ने तस्वा कीतेर.
वोना जीवतुन इद दर्तुरित पोरो मंवक तेंड्सि वाड्ता काड्कि,
वोना कांदांता गोस्टितुन बारेते बोरे वड्का परुर+”
इंवल दर्मा-ग्रंत्ना बागमुन वाचि कीसेर मत्तोर.
34 ते वोर हिज्डल, “पर्वक्तल बोन बारेते इगे वेह्चेर मंतोर?
तंवा बारेते कि, सेलेके दुस्रोन बारेते?
दया कीसि, नाकुन वेहा” इन्जेर पिलिपुन पूसि कीतोर.
35 अस्के पिलिपु येसया ग्रंत्ना अद वचंतल मोदोल कीसि, येसुन बारेता चोकोट्ना कबुडुन वोन वेह्तोर.
36 अहन वूर सरिय सोन्जेर मनेके, येर मंवल जागतगा येव्तेर.
ते वोर हिज्डल, “इचुला!
इगे येर मंता.
नाकुन बाप्तिस्मा सिय्ले बतय अड्डम मंता कि?”
इन्जेर पूसि कीतोर.
37 *[“नीवा बर्पुर दिल्ते बरोसा इर्तेके, बाप्तिस्मा येता वचो” इन्जेर पिलिप इत्तोर.
ते वोर मंत्रि, “येसु किरिस्तुये बगवंतनोर करल मरि इन्जेर बरोसा इर्सेर मंतोन” इन्जि जवब सीतोर.]
38 अद रतुन आपुसा इन्जेर हुकुम सीता पेजे, पिलिपु अनि हिज्डल इविर्ते येतुन रोपो नेङ्तेर.
अस्के पिलिपु वोन बाप्तिस्मा सीतोर.
39 अद येतल बह्रि वाता पेजे, अचनक पर्बुना आत्मा पिलिपुन वोता.
ते वोर मंत्रि उंडे बस्केन पिलिपुन सूड्मकि.
बति वोर बर्पुर आनंद्ने तंवा सरिय सोत्तोर.
40 पिलिपु अजोतु इंवल चहर्ते दिस्तोर.
अगटल सिजरिया नगुर वेरि, मंवलिक सम्दो चहर्क तिरिसेर बगवंतना चोकोट्ना कबुडुन पचर कीतोर.