आक्रितङ दिवोस्क्नङ तक्लिब्क
3
1 बति इंके इव आक्रितङ दिवोस्क्ने वेले कटिंतङ कालम्क वांतङ इन्जेर करि कीम.
2 बारितेके, अव दिवोस्क्ने पर्जा दुस्रुर बारेते असले सोन्च कियुर.
दनमुन पोरो आसा किय्वलिर, तम्वा बारेते पोक्डा वेह्वलिर, गर्वते मंवलिर, रेह्चि वड्क्वलिर, बेये-बाबन मानि कियुर वूर, दनेवाद वेह्वक्ने मंवलिर, बे-सुदुड मंवलिर,
3 लाड सेल्वक्ने मंवलिर, मापि किय्वल गुन सेलुर वूर, चह्डियलिर, मंदा आसतुन मेयुर वूर, केडता जंवरतुन दात्नुर, चोकोटुन माने मायुर वूर,
4 पसि किय्वलिर, आड-मूट वालिर, गर्वते पोके माय्वलिर, बगवंतन तेर अदिक सुक-बोगुन पोरो आसा किय्वलिर सम्दि तीर्क्नुर मंदंतेर.
5 वूर पोरो पोरो बक्ति तोह्वलिर दात मंदंतेर, बति अद बक्तिता सक्तितुन वोपुर.
वूर आतुर्गटल हब्रि मन.
6 वूर आतुर, करब्ना आसतगा कोंडे मासि पाप्नगा पिस्वलिक बुदि सेलेङ अव वेय्लोक्नङ रोह्क्नगा नेङ्सि, अवेकुन गुमि कीसि तम्वा बाजुन ऊमंतेर.
7 इव वेय्लोक बस्केट करिसेर मंदंतङ बति, सते बतल इंवल इवेन अर्तम आयो.
8 यनेस अनि यंबेरेस इंवलिर मोसेन मर्ला बड्तपिनय वीर पर्जा गिर करब मंदे, बरोसतल बह्के मासि, सतुन मर्ला-बडंतेर.
9 बति वीर मुने सोंदा परुर.
बारितेके मोसेन मर्ला बड्तुर वूर दाते, वीर गिर अकल सेलुर वूर इन्जेर हर वोरोन करे मांता.
बरोसा कीतन पिय्सि ताक्वल
10 बति नावा बोदा, नावा ताक्वल, नावा उदेस, नावा बरोसा, बस्केट सांत्ने मंवल नावा मन, नावा लाड अनि नावा वोर्च्वल गुंतुन बारेते नीकुन टावय.
11 अंतियोकया, इकोनिया अनि लुस्त्रा इंवलिक चहर्क्ने नना बोगे मातङ अव दुक्सङ नीकुन टावये.
इव तक्लिब्कनल, पर्बु नाकुन बचि कीतोर इंवल गिर नीकुन टावय.
12 येसु किरिस्तुना बक्तितगा पिस्कोम इंवलिर, सम्दिरे दुक्सा बोगे माया लागर.
13 करब किय्वलिर, कपट्ने मंवलिर, पसि कीसेर तमो पसे मासेर उंडे इचुर करेबलिर आंतेर.
14 बति निमे बोन्गटल करितियो वोन पोरो बरोसा इर्ता काड्कि, अव सत्नङ इन्जेर टावा.
अवेन पिय्सि ताक्सेर मन.
15 अचोरे आय्वा, निमे चुडुर-पांदले पवित्रा दर्मा-ग्रंत करे मातोनि आंदि.
अव नीकुन बुदि-गियन सीसि, येसु किरिसतुन पोरो इर्ता बरोसतुन हिंदल बचि कीतङ.
16 दर्मा-ग्रंत्नगा लिहि कीतङ वचन्क पूरो, बगवंतले वेहुसीतङ आंदुङ.
सते बोदा वेहन साटि, दम्कि सियन साटि, गल्तिन सुद्रि कियन साटि, नियतुन करुसन साटि, अव कामि सींतङ.
17 बगवंतल दर्मा-ग्रंतुन हिंदल, हरियेक चोकोट्ना कामुन कियन साटि, बक्तलिरा मंदुन तयर कींतोर.