4
1-2 उंदुंदि जोका वासि तंवा राज ताकुस्वल अनि सातुरकुन अनि पिसि मंवलिरकुन तस्वा किय्वल येसु किरिस्तुना नदुडुन मुने, अनि बगवंतना नदुडुन मुने गिर, नीकुन वेह्वल बतल इत्तेके, बगवंतना कबुडुन पचर किय्ले, हर गट्का तयर मन.
गल्तिन सुद्रि कीम, दम्कि सीम अनि गटि-दीर्या सीसेर वोर्चि, वूरकुन करुसेर मन.
3 बारितेके पर्जा चोकोट्ना बोदतुन केन्ज्वक्ने मंवल वकत वांता.
वूर तम्वा इचा मत्ता तीर कींतेर.
सिरिप तमकुन केन्जा वस्तङ अव बोदङ वेह्वलिर गुरुर्कुने तम्वा सिर्मुट मीरि कींतेर.
4 वूर सतुन केन्ज्वक्ने लङ दांतेर अनि बनि कीसि वेह्वलिकुन केन्ज्ले करुम वांतेर.
5 बति निमे हर वकत्ने मंदुन जरब्ने इरा.
तक्लिब बोगे माय्ले तयर मन.
चोकोट्ना कबुडुन पचर किय्ले काया-कस्टम कीम.
नीवा सेवता काम्नगा जिमेदारि येता.
6 नावा पूरो जिन्गनितुन अर्पनतुन मोडि सीतोन.
नावा जीवा सुटि कीसि सोंवल गट्का करुम येव्ता.
7 येसुन पोरो इर्ता बरोसता पोटितगा, नना बेय चोकोट वित्तोन.
बरोसतल बह्के माय्वक्ने वित्वल पूरि कीतोन.
8 इंके ना साटि नियत्ना किरिट तयर मंता.
नियत्ने तस्वा किय्वल पर्बु तना मल्सि वाय्वल दिनमुन नेटि, नाकुन अद किरिट इनम सींतोर.
नाकुने आय्वा, पर्बुना मल्सि वाय्वल दिनमुन साटि, बेय आसते सूड्वलिर सम्दिरकुन अद इनम पुटंता.
आक्रितङ सूचनङ
9 नह्गा वेय्ने वायन साटि कोसिद कीम.
10 बारितेके देमल इद दुनियतङ आसन पोरो अर्सि, नाकुन सुटि कीसि तेसलोनिका नगुडे सोत्तोर.
केरस्कल गलतिया येरियते सोत्तोर.
तीतु दल्मतिया येरियते सोत्तोर.
11 सिरिप लूकले ना सङा मंतोर.
मार्कु बगा मंतोरो करि कीसि, नी सङा पिय्सि वरा.
वोर इद सेवता काम्नगा नाकुन चोकोट सात सींतोर.
12 नना तुकिकुन एपेस नगुडे सारि कीतोन.
13 त्रोया नगुडे कर्पस इंवना रोन नावा गर्मि कोट अनि पुस्तक गिर इर्सि वातोन.
तिमोति निमे वानेके, अवेन पिय्सि वरा.
मुके बतल इत्तेके, तोल्दे तयर कीतङ कागुतकुन मरुङ्वक्ने तरा.
14 अलेग्जांडर इंवल काति नाकुन वेले तक्लिब सीतोर.
अहन सीता तक्लिबुन पिय्सि, पर्बु वोन बरोबर सिक्सा वाटंतोर.
15 मरट वेह्वल बोदतुन बेय बय्मन आसि वड्क्तोर.
अदेन साटि वोन बारेते निमे गिर वेले दिहंते मन.
16 नाकुन मोदोल जोका तस्वा किय्वलिर अदिकारिर मुने तत्तेर अस्के, बोरे मदत किय्मकि.
नाकुन वोरोने सुटि कीसि, सम्दिरे सोडितेर.
बगवंतल वूरकुन मापि कियिर.
17 ना हिंदल सम्दो यूदुल्क आयुर वूर सम्दिरकुन, इद चोकोट्ना कबुर बर्पुर पचर आयना इन्जेरेन, पर्बु ना बग्ला निल्सि, नाकुन सक्ति सीतोर.
मरंतल गिर नाकुन बचि कीतोर.
18 वाय्वल हर संकटनल पर्बु नाकुन बचि कीसि, स्वर्ग्नगा मंवल तंवा राज्नगा चोकोटे वोंतोर.
वोर पर्बुन बर्पुर मय्मा पिडिनङ-पिडिङ वायि!
आमेन.
पव्लु आक्रिता दंडोस वेह्वल
19 पिरिस्किला बायिन, अकुला दादन, वोनेसिपोरन अनि वोना कुटुंबतुरकुन नावा दंडोस वेहा.
20 कोरंति नगुडगन एरस्तु रेहे मातोर.
तोर्पिम इंवल बेमरिते मत्ता काड्कि, वोन मिलेतु चहर्ते सुटि किय्वल आता.
21 पीनि-गालुम वाय्वक मुनेन निमे इगे वाय्ले कोसिद कीम.
युबूलु, पुदेंस, लिनस, कलव्दिया अनि मेय्तुर सम्दिर दादलिर-बायिक नीकुन दंडोस वेह्चेर मंतेर.
22 पर्बु नीवा आत्मतुन सङा मनिर अनि वोना पेर्मता-दया नी पोरो मनि.