येसु किरिस्तुनोर चोकोट्नोर सिपायि
2
1 ना मरिन दात मंवल तिमोति!
येसु किरिस्तुनगा मंवल पेर्मता-दयतुन हिंदल सक्तिवंतनि आम.
2 नना वेलेटिर गवदारकुन मुने करुस्तङ बोदङ केन्ज्ति.
इव गोस्टिन दुस्रुरकुन गिर बोदा करुसा पर्वलिर नंमकम वाले बक्तलिरकुन हव्लि कीम.
3 येसु किरिस्तुनोर चोकोट्नोर सिपायिन दात ना बरोबर तक्लिब बोगे माम.
4 सिपायि नव्करि कीनेके, अद नव्करि तनकुन सियुस्तोन आनंद सियना इन्जेर दुनियतुर मोडि पिस्वल बेपरितगा कोजि वाट्वक्ने मंदंतोर.
5 अदे तीर्दे कर्स्वडगा जेटि आय्वल, सिरिप अवेनङ नियमकुन पिय्सि कर्स्तेकेन, इनम मेया परंतोर.
6 मेह्नत किय्वल केतिदारने, पंड्ता पंटता मोदोल ईसा येत्वल हक मंदंता.
7 नना वेह्वलिक गोस्टिन सोन्च कीम.
पर्बु इवेकुन अर्तम कीनल गियन सींतोर.
8 नना वेह्वल चोकोट्ना कबुडुन पिय्सि, दाविद्ना कांदांतगा पुट्सि सासि-नेंड्तोर वोर येसु किरिसतुन हेतु कीम.
9 बारितेके इद चोकोट्ना कबुडुन पचर कीततुन हिंदले, बेडिङ अर्सि कले-कङ्रन दात तक्लिब्क बोगे मासेर मंतोन.
बति बगवंतना चोकोट्ना कबुडुन मात्रम बेडिङ अर्सि सेलेङ.
10 अदेन साटिने, बगवंतल नेमि कीतुरकुन, येसु किरिस्तुना केय्दे बचे मासि, बस्केट मंवल मय्मा पुटना इन्जेर इव सम्दिन वोर्चेर मंतोन.
11 इद बोदा बरोसा कीनल मंता:
उंदि मोका येसुन बरोबर मावा मरन आतेके,
वोन बरोबरे पिसंतट.
12 उंदि मोका मरट सम्दितुन वोर्च्तेके,
वोन सङा मीरे मासि राज ताकुसंतट.
उंदि मोका माकुन वोर येसु टावा सेलोर इंद्कट्ते,
वोर गिर माकुन टावा सेलुर इंतोर.
13 मरट नमकम्ने मंवेके गिर,
वोर येसु मात्रम नमकम्नेन मंदंतोर.
बारितेके तंवा गुन-गांतुन बतय उल्टा किया परोर.
बगवंतल नेमि कीतोर सेव्कल
14 सम्दिरकुन इंके वेरि लिहि कीतङ गोस्टिन हेतु कियुसेर मन.
सिरिप केन्ज्वलिरकुन करब किय्लेके तपा, बततुने काम सियोङ अव गोस्टिन बारेतङ जग्डङ किय्वक्ने मंट इन्जेर बगवंतना नदुडुन मुने हुकुम सीम.
15 बगवंतल वोपनल मंवल सेव्कन दात मंले वेले कोसिद कीम.
बस्केन इद सेवतुन बारेते लजे माय्मा अनि इद सत्ना बोदतुन मततीर पोडि कीसि वेहा.
16 बाव-बक्ति सेलुर वूर किय्वलिक करेबलिक चर्चनल लक मन.
आतङ चर्चङ किय्वलिर, उंडे इचुर करब आसि दांतेर.
17 वीर ईतुरङ गोस्टिङ रोपो रोपो मेय्वल पुंदुन दात पग्रे मांतङ.
हुमेनयु अनि पिलेतु ईतङ गोस्टिङ वड्क्वलिरे आंदिर.
18 वीर सतुन बह्के मातेर.
सातुर वूर नेंड्वल काम जर्ग्सि सोत्ता इन्जेर बक्तलिरा बरोसतुन करब कीसेर मंतेर.
19 बति बगवंतनङ सते गोस्टिङ गट बुनदित दात मंतङ.
तान बोरे हालि किया परुर.
इद बुनदित पोरो, “तंवुर बूर आंदिर इंवल पर्बुन टावा”+ अनि, “पर्बुन पोरो बरोसा कीतोर, हर वोरोर करबुन सुटि कियना” इन्जेर लिहि कीसि मंतङ.
20 दनेवंतलिरङ रोह्क्नगा, सोने-कूरतङे बासन्क आय्वा, कटेते अनि तोडिते तयर कीतङ बासन्क गिर मंदंतङ.
इवेनगटल बारितङ कहि बासन्क बस्के पुति मात्रमे वाडकम कींतेर.
उंडे कहितङ सादरन वालेकुन हर रोज वाडकम कींतेर.
21 करब-पांदुन सुटि किय्वन, बगवंतल तंवङ मुके काम्क किय्ले वाडकम किय्वल बासंतुन दात वाडकम कींतोर.
आतोर मायनल पवित्रा मन्जेर तंवोर माल्कन साटि, हरियेक चोकोट्नङ काम्क किय्ले तयर मंदंतोर.
22 जवनिते मनेके लह्कि वर्सि किय्वलिक करब आसनल लक मन.
सुदुड-पांदा दिल्ते पर्बुन पार्तना किय्वलिर सङा मीरे मासि, बरोसते, नियत्ने, लाड्दे अनि सांतिते मंले कोसिद कीम.
23 काम सियोङ अव गोस्टिना चर्चा किय्वलिर्गटल लक मन.
इव चर्चङ जग्डङ पुटुसंतङ.
24 अचोरे आय्वा, पर्बुनोर सेव्कल लोलि किय्वा.
सम्दिर पोरो दया तोहना.
बोदा वेहनल मंदना.
वोर्च्वल गुन मंदना.
25 तंवा बोदतुन वोपुर वूरकुन सादु-पांदे सुद्रि किय्ले कोसिद कियना.
आतुरङ दिलकुन मोका बगवंतल मार्युसि, सतुन करि कीनल कींतोर इन्जेर बगवंतन पोरो आसा इरना.
26 अस्के वूरकुन बुदि वासि, सय्तंदा करब्ना सरितुन सुटि कींतेर.
बारितेके सय्तन तंवा इचतुन पूरि कियन साटि, वूरकुन कोंडि कीसि इर्तोर.