2वा तिमोति
तिमोतिन लिहि कीता रेंडवा चिटि
पव्लुना आसिर्वाद
1
1 इद चिटितुन पव्लुना आय्वना लिहि कीतोन.
मा बाबो बगवंतना इचतुन हिंदल, येसु किरिस्तुनोर अपोस्तुल्ता आंदुन.
येसुन पोरो बरोसा इर्तुरकुन बस्केट पिस्वल जीवा पुटंता इन्जेर बगवंतल वाग्दन सीतोर.
इदेन बारेते दुस्रुरकुन वेह्ले, बगवंतल नाकुन सारि कीतोर.
2 तिमोति!
नना मिय्तोर लाड्नोर मरिन दात मंवल नीकुन इद चिटि लिहि कीसेर मंतोन.
बाबो बगवंतल अनि मा येसु किरिस्तु पर्बु, नी पोरो किवुल तोह्चि, नीकुन पेर्मता-दया अनि सांति सियिर!
बरोसतगा निल्सि मंट
3 ना तोत्तुर दात बगवंतन सुदुड-पान वाले मन-दिल्ते सेवा कीसेर, नावा पार्तनतगा नीकुन नर्का-पियल हेतु कीसेर मंतोन.
अनि नी साटि बगवंतन दनेवाद वेह्चेर मंतोन.
4 मरट पाके मानेके निम तुह्ता काडेर हेतु कीसि, नीकुन बस्के सूड्का इनल आसेर मंता.
नीकुन सूड्का अस्के नावा दिल आनंद्ने निंदर.
5 नीवा कपट सेले अद बरोसा नाकुन हेतु मंता.
आतल बरोसा मी काको लोयिस्नगा अनि नीवा बेये युनिस्नगा गिर मत्ता.
अदे निह्गा गिर मंता इन्जेर नम्सेर मंतोन.
6 इद कारंतुन हिंदल, बगवंतना वरमुन उंडे वेले वाडकम कियना इन्जेर नीकुन हेतु कियुसेर मंतोन.
अद वरम नावङ केय्क नी पोरो इर्तोन अस्के, नीकुन पुट्ता.
7 बारितेके बगवंतल माकुन सीतोर अद आत्मा, वेरे-कोंडल आयो.
बति अद आत्मा, सक्ति सिय्वल, लाड किय्वल अनि मंदा आसन आपुस्वल आंद.
8 अदेन साटि मा पर्बुन बारेतेन आयि, वोर पर्बुन साटि जेल्दे अर्सि मंवल ना बारेतेन आयि, दुस्रुरकुन गवा वेह्ले लजे माय्मा.
इदेन बद्लि चोकोट्ना कबुडुन साटि तक्लिब्क येत्ले, बगवंतल सिय्वल सक्तिते, ना बरोबर तयर आम.
9 बगवंतल माकुन बचि कीसि, सुदुड-पांदे पिस्ले नेमि कीतोर.
इद कार्या मरट कीतङ कामकुन हिंदल जर्ग्मकि.
बति सिरिप वोना पिलंते अनि पेर्मता-दयतेन जर्ग्ता.
इद पेर्मता-दयतुन, बगवंतल कलि गडे मायन मुनेने, येसु किरिसतुन हिंदल, माकुन सीतोर.
10 बति इदेन बारेते बचि किय्वल येसु किरिस्तु पावे माततुन हिंदल, माकुन इंके करे माता.
वोर येसु, मरंता सक्तितुन मेय्सि, चोकोट्ना कबुडा वेड्चितुन हिंदल, बस्केट पिस्वल जीवतुन बह्रि अरुस्तोर.
11 इद चोकोट्ना कबुडुन पचर किय्ले अनि दुस्रुरकुन बोदा वेह्ले, बगवंतल नाकुन अपोस्तुलतुन दात नेमि कीसि, सारि कीतोर.
12 इद कारंतुन साटिने नना जेल्दगा तक्लिब्क बोगे मासेर मंतोन.
तेर बति नना लजे मायोन.
बारितेके नना बोन्गते बरोसा इर्तोनो, वोर नाकुन टावये.
नना वोना केय्दे हव्लि कीता अदेन, आक्रिता दिवोस वेरि बचि कींतोर इन्जेर नाकुन बर्पुर बरोसा मंता.
13 येसु किरिसतुन हिंदल मह्गा मंवल बरोसा अनि लाड्दे, नना वेह्तङ सते बोदना नमुना येच्चि ताका.
14 मह्गा मंवल पवित्रा आत्मता सक्तिते, नीकुन बगवंतल सीता चोकोट्ना गोस्टितुन बचि कीम.
15 आसिया येरियतुर सम्दिरे नाकुन सुटि कीसि सोत्तेर इंवल, नीकुन टावय.
वूर्गटल पुगेलस अनि हेर्मोगेनेस इंवलिर गिर मंतेर.
16 ना केयकुन बेडिङ अर्तङ इन्जेर लजे माय्वक्ने वोनेसिपोरस इंवल, वेले जोकङ नाकुन बेटे मासि, आनंद सीतोर.
वोन अनि वोना कुटुंबतुन येसु पर्बु दया तोहिर.
17 वोर रोम नगुडे वासि, नना दिसनल वेरि ना साटि मह्क्तोर.
18 नना एपेस नगुडे मनेके, वोर नाकुन वेले तीर्क्ने मदत कीतोर इंवल, नीकुन टावये.
आक्रिता दिवोसुन नेटि, वोन पोरो पर्बु दया तोहना इन्जेर कोरंतोन.