पार्तना-विंति किय्वलिक पडनङ नेकिङ
9
1 बगवंतल, इज्रयेल पर्जतुन सीता मोदोडा नियम्नगा, माय्नना केय्दे तयर आता अद पार्तना-विंति किय्वल डेरत बारेते अनि नेकि-बदिन बारेते मत्ता.*
बलि चडि किय्वल बोव्ला
2 अद पार्तना-विंति किय्वल डेरतुन नड्डुम उंदि पड्दा टाङि कीसि, तान रंड बागल्क कीतेर.
मुनेता बागम्नगा उंदि डिवेना जल्करा अनि निवोद्नङ सारिङ इर्वल टेबल मंदु.
इद बागमुन पवित्रा जागा इंदिर.
3 अद पड्दतुन पेजेटा बागमुन बेय पवित्रा जागा इंदिर.
4 अद बागम्नगा उंदि सोनेते तयर कीता ऊद निरुस्वल कुंडि अनि नियम्ना संदोका मंदु.
अद संदोका सोनेता रेक्ने, पूरो अत्क वाट्सि मंदु.
अद संदोकत रोपो मंना* इर्ता अद सोनेता कोपा, अहरोंता कोड्स्ता बेड्डे,* हुकुम्क लिहि कीतङ पाटिन दात्नङ चेक्तङ रंड बंडङ मंदुङ.
5 अद संदोकता मुचडा पोरोडा बाजुन पाप्क मापि किय्वल जागा* इंतेर.
बगवंतना मय्मता वेड्चितुन तोह्वलिक रूप्क* अद जागतुन केप्सेर मारेल्क्ने मुच्चि मंदुङ.
इव सम्दोन बारेते, इंके पोडि कीसि वेह्ले वकत सेले.
6 इव सम्दो इहिन तयर कीता पेजे, कटोडलिर पार्तना-विंति किय्वल डेरता मुनेता बागम्नगा सोन्जि, नेकितङ कार्यन रोजि कीसेर मंदिर.
7 बति सिरिप पेर्सोर कटोडल तंवङ पापकुन साटि अनि पर्जा करे माय्वक कीतङ पापकुन साटि, अर्पना सिय्ले, नेतुर पिय्सि, सालदुन उंदि जोका पड्दतुन पेजेटा बेय पवित्रा जागतगा सोंदुर.+
8 इव सम्दोन पिय्सि, बस्के वेरिते ईतल पार्तना-विंति किय्वल डेरता जागा मंदंतयो, अस्के वेरि, स्वर्ग्ना बेय पवित्रा जागता सरि कोले मायो इन्जेर पवित्रा आत्मा तोह्चेर मत्तोर.
9 अद सम्दो इंकेडा कालम्नगा जर्ग्वडा नमुना आंद.
अव सेसङ अनि बलिदान्क, पार्तना-विंति किय्वलिर बक्तलिरा मन-दिलदुन कसुकनल असले मोक्डो सुटि किया परोङ.
10 बहन इत्तेके, इव तिंले-उंले अर्पना सिय्वलिक अनि सुदुड आय्वलिक काम्क, सिरिप मेंदोडुन साटिन कामि सींतङ.
इव काम्क सिरिप बगवंतना पूना नियम वानल वेरि कामि सींतङ.
येसुना नेतुडा अर्पना
11 किरिस्तु पेर्सोर कटोडल आसि, माकुन चोकोट्नङ आसिर्वाद्क तत्तोर.
वोर स्वर्ग्नगा मंवल पार्तना-विंति किय्वल बेय डगुर अनि बर्पुर वाले डेरता जागतगा सेवा किय्ले सोत्तोर.
अद जागा मायनल निव्डि कीता आयो, इत्तेके इद कलिता आयो.
12 किरिस्तु हेरेना नेतुरे आयि, पड्डना नेतुरे आयि, पिय्सि अगा सोन्मकि.
बति उंदिय जोका तंवा नेतुडा अर्पना सीसि, अद बेय पवित्रा जागतगा सोत्तोर.
अदेन हिंदल, माकुन बस्केट पिस्वल मुक्ति पुट्ता.
13 मोसेना कानुंतुन पिय्सि, इव हेरेङ कोंदना नेतुर अनि पड्डता नीर, वूर बे-सुदुड वालिर पोरो सिड्का वाड्तेके, सिरिप वूरा बहिडा मेंदोडुन सुदुड कींतङ.
14 बति किरिस्तुना नेतुर पाप्ने निन्चि मंवलिक मावङ मन-दिलकुन उंडे गिर बचोरो सुदुड कींता.
बहन इत्तेके बस्केट मंवल पवित्रा आत्मता सक्तितुन हिंदल, बे-कसुर वाले येसु तंवा तना बगवंतन साटि बलिदान सीतोर.
मरट जीवते मंवल बगवंतना पार्तना-विंति कियन साटि, वोर किरिस्तु इहिन कीतोर.
15 इद कारंतुन हिंदल किरिस्तु इद पूना नियमुन सुर्वेर्तल आसि निल्तोर.
अनि केय्सि मत्तुर वूर, बगवंतल वाग्दन सीता बस्केट मंवल आसिर्वाद्नगा ईसा येतनल वोर कींतोर.
अदेन लासिने, मोदोडा नियमुन पिय्सि पापिरङ पापकुन कंडि कियन साटि, तंवा जीवा सुटि कीतोर.
चिटि लिहि किय्वल
16-17 जाय्जतुन बारेते, बोरे नियम्ना चिटि लिहि कीतेके, वोना मरन आया बीगर, अद चिटि कामि सियो.
वोर मार्ता पेजेने, अद चिटि कामि सींता.
18 इदेन हिंदले, मोदोडा नियम गिर जंवर्ता नेतुर सिया बीगर कामि सिय्मकि.
19 मोसे पर्जा सम्दिरकुन दर्मता कानुंतङ हुकुमकुन वेह्ता पेजे, पड्डना अनि हेरेना नेतुडुन येतगा मिस्डि कीसि, पोदेलता डेटेतगा* गोरेना रगल बूरा दोह्चि, दर्मता कानुंता पुस्तकुन पोरो अनि सम्दिर पर्जतुन पोरो सिड्का वाटुस्तोर.
20 “बगवंतल मीकुन इद हुकुम सीसि ताकट इन्जेर वेह्ता नियम्ना नेतुर आंद” इन्जेर वेह्तोर.+
21 अदे तरिकते, वोर अद नेतुडुन पार्तना-विंति किय्वल डेरतगा अनि सेवा कीनेके वाडकम किय्वलिक चीजकुन पोरो सिड्का वाट्तोर.
22 मोसेना कानुंतुन हिंदल सूड्तेके, कमि जास्ता सम्दि चीजकुन नेतुडे सुदुड-पान कियना.
नेतुर तुहबीगर पापकुन मापि पुटो.
23 इदेन हिंदल, माय्नलिर निव्डि कीतङ इव स्वर्ग्नगा मंवलिक्नङ नक्लि रूपकुन साटि, जंवर्क्ना बलिदान सीसि, सुदुड-पान किय्वल जुरत अर्ता.
बति स्वर्ग्नगा मंवलिकुन सुदुड-पान किय्ले, जंवर्क्ना नेतुडुन तेर उंडे चोकोट्नङ बलिदान्क पह्जे.
24 बोमित पोरोडा बेय पवित्रा जागा सिरिप स्वर्ग्ना करल बेय पवित्रा जागता मोकोटा आंद.
किरिस्तु माय्नलिर निव्डि कीता, पवित्रा जागत रोपो सोन्मकि, बति इंके वोर मा हिंदल आसि स्वर्ग्ने सोन्जि, बगवंतन मुने निल्तोर.
25 पेर्सोर कटोडल हर साल जंवर्क्ना नेतुडे बेय पवित्रा जागतगा सोत्तपिनय, वोर किरिस्तु तंवा तना केपत बलिदांता अर्पना सिय्ले, स्वर्ग्ने सोन्मकि.
26 किरिस्तु उंदि मोका अहन बलिदान सिय्मड इत्तेके, कलि गडे मातगटल्ते इंके वेरि, बचोङो जोकङ तंवा जीवा सिया लाग्ंदु.
बति इंकेडा, इद आक्रिता गट्कते बस्केट मंले, सिरिप उंदिय जोका, तंवा तना सम्दिरा पापुन साटि, अर्पना सिय्ले वातोर.
27 हर वोरोर बद गिर उंदि गट्का मरन आया लागर.
अद आता पेजे, बगवंतल तस्वा कींतोर.
28 अदेन साटि, किरिस्तु उंदिय जोका, तंवा तनय सम्दिरङ पापकुन साटि, बलिदांता अर्पना सीतोर.
वोर उंडे उंदि जोका मल्सि वांतोर.
पापुन तन पोरो वाट्सि वोय्ले आयो बति, तंवा साटि बस्के वानुर इन्जेर सूड्सेर मंवलिरकुन बचि किय्ले वांतोर.