10
1 मोसेना कानुन सिरिप मुने जर्ग्वलिक चोकोट्नङ आसिर्वाद्क्ना दड्मित दात्नय आंद बति, ताना करल रूप आयो.
अदेन साटि, अद कानुंतुन पिय्सि, हर साल सिय्वलिक उंदि तीर्दङ बलिदान्क, बक्तलिरकुन सम्दो तीर्क्ने बर्पुर सुदुड बस्केट्के किया परोङ.
2 उंदि मोका बक्तलिरकुन अव करल सुदुड किय्मड इत्तेके, वूर तम्वङ मन-दिल्क्नगा पापकुन बारेते, बस्केन चुक चुके माय्वक मंदिर अनि अव बलिदान्क्नङ अर्पनङ सिय्वल आपुसींदिर.
3 बति अदेन बद्लि, वूर सीतङ अव बलिदान्क वूर कीतङ पापकुन हर साल हेतु कियुसंतङ.
4 बारितेके, कोंदना नेतुर आयि, हेरेना नेतुर आयि, पापकुन बस्केट्के कंडि किया परोङ.
5 अद कारंतुन हिंदले, किरिस्तु इद परिपन्चम्नगा वानेके, बगवंतन सङा,
“बलिदानकुन आयि, अर्पनन आयि,
निमे कोर्मकि,
बति नी साटि अर्पना सिय्ले,
ना साटि उंदि मेंदोल निव्डि कीति.
6 जंवरकुन डुंडुसि अर्पना सिय्वले आयि,
पापुन कंडि किय्लेक सीतङ बलिदान्क आयि,
नीकुन आनंद सिय्मकि.
7 अस्के नना, ‘इचुला बगवंता!
नना नीवा इचतुन पूरि कियन साटि, इगे वातोन.
ना बारेते, ग्रंत्क्नगा लिहि कीतेर’”+
इन्जेर वेह्तोर.
8 बलिदान्क, सेसङ, जंवरकुन बोड्सि सिय्वलिक अर्पनङ अनि पापुन कंडि किय्लेक बलिदान्क सियना इन्जेर मोसेना कानुंतगा लिहि कीसि मनेके गिर बति, “अव नीकुन आनंद सिय्मकि” इन्जेर किरिस्तु वेह्तोर.
9 अहन वेह्ता पेजे, वोर “इचुला बगवंता!
नना नीवा इचतुन पूरि कियन साटि, इगे वातोन” इन्जेर इत्तोर.
वोर रेंडवा नियमुन मोदोल कियन साटि, मोदोडा नियमुन बंद कीतोर.
10 बारितेके, येसु किरिस्तु, बगवंतना इचतुन पूरि कियन साटि, बस्केट मंले तंवा मेंदोडुन सिरिप उंदिय जोका बलिदांता अर्पना सीसि, माकुन सुदुड-पान कीतोर.
11 हरियेक कटोडल दर्मता सेवा कियन साटि, रोजि निल्सिन मंदा लागर.
सीतङ अवे बलिदान्क केपत सीसेर मंदंतोर, बति इव बलिदान्क पापकुन नोरा परोङ.
12 बति पेर्सोर कटोडल किरिस्तु मावङ पापकुन साटि, बस्केट मंले सिरिप उंदिय जोका अर्पना सीसि, बगवंतना तिना बग्ला उद्तोर.
13 अस्केडल तंवुर पगा-दारकुन तंवङ काल्क्ना कुतुडुन दात, बगवंतल दाबि कीसि, बस्के इरनुर इन्जेर किरिस्तु सूड्सेर मंतोर.
14 वोर सिरिप उंदिय जोका बलिदांता अर्पना सीसि, सुदुड-पान आय्वलिर माकुन बस्केट गिर मंले बर्पुर कीतोर.
15-16 इद बर्पुर गोस्टितुन बारेते:
“‘अद आता पेजे, नना वूर सङा
उंदि पूना नियम टरि कींतोन.
अद बतल इत्तेके, नना नावा कानुंतगा मंवलिक आगेन
वूरा मंदगा हेतु इरनल कींतोन.
अवेन वूरा दिलतगा लिहि कींतोन’
इन्जि बगवंतल वेहंतोर”+
इन्जेर पवित्रा आत्मा माकुन गवा सीतोर.
17 उंडे मर्ला, “‘वूरङ पापकुन अनि अव करेबलिक कामकुन उंडे बस्केन हेतु कियोन’+ इन्जेर बगवंतल वेहंतोर” इन्जि, पवित्रा आत्मा वेह्तोर.
18 बगवंतल अव सम्दो पापकुन मापि कीता काड्कि, उंडे बस्केन अवेन साटि, बलिदांता अर्पना सिय्वल जुरत मनो.
बरोसतुन सुटि किय्वक्ने बगवंतन करुम दाकट
19 दादलिर-बायिक्निट!
येसु तंवा नेतुडा अर्पना सीतोर.
इदेन हिंदल स्वर्ग्ना बेय पवित्रा जागतगा वेरिवक्ने सोंदा परंतट.
20 बारितेके, येसुना मरन आनेके, अद मंदिर्ता बेय पवित्रा जागतगा मंवल पड्दतुन बगवंतले सरुस्तोर.
इंके येसुना मेंदोडुन हिंदल, माकुन पुड्ता अद पूना जीवते, बगवंतनगा वेरिवक्ने सोंदा परंतट.
मंदिर्ता पड्दा पोरोडल्ते बूड सर्वल
21 अचोरे आय्वा, वोर मावोर पेर्सोर कटोडल बगवंतनुर बक्तलिर पोरो राज ताकुसेर मंतोर.
22 वोर मावङ मन-दिलकुन तंवा नेतुडे सुदुड-पान कीतोर अनि मावङ मेंदोलकुन सीग्ना येते नोर्तोर.
अदेन साटि, बर्पुर बरोसते मंवलिक दिल्क्ने, बगवंतना चर्नते दाकट.
23 माकुन वाग्दन सीतोर वोर बरोसतोर आंदुर.
अदेन साटि, मरट सम्दिर दुस्रुरकुन वेह्ता बरोसता आसा सुटि किय्वक्ने, गटि-दीर्यते मंद्कट.
24 वोरोन वोरोर लाड किय्वल अनि चोकोट्नङ काम्क बहन कियुस्वल इंवडुन बारेते, सोन्च कीकट.
25 बगवंतना पार्तना-विंति किय्ले वाय्वक्ने मंवल, कहितुरकुन आदत आता.
मुके बतल इत्तेके, येसु पर्बु उंदुंदि जोका वाय्वल दिवोस करुम वासेर मंता.
अदेन साटि, मरट सम्दिर मीरे मासि, मावा मरट वोरोन वोरोर चोकोट-पांदे, मुने दाकट इन्जेर वेह्चेर मंद्कट.
26 सतुन करि कीता पेजे गिर, मरट बुदि पिय्सिन पाप्क कीसेर सोत्तेके, अव पाप्क्ना मापितुन साटि, उंडे बतय बलिदान सिया पर्वट.
27 तेन बद्लि, बगवंतन बय्मन आसि ताक्तुरकुन नाय्दा तस्वा कीसि, वूरकुन बरा बरा पोत्वल तड्मिते नासेडम कींतोर इंवलिक, वेरेङे मेय्सि मंदंतङ.
28 मोसेना कानुंतुन बय्मन आसि ताक्तुरकुन, सिरिप इविर सेलेके मुविर वेह्तङ गवन पिय्सि, वूर पोरो दया तोह्वक्ने मरंता सिक्सा वाट्ंदिर.
29 ते, इंके बगवंतनोर मरिन राङि सिय्वन, पवित्रा कीता अद नेतुडा नियमुन अपवित्रा इंवन अनि पेर्मता-दया तोह्वल बगवंतना आत्मता लजा वोय्वन, उंडे बचोर कटिंता सिक्सा वाटनयो, मिरटे सोन्च कीम्ट.
30 अहन बगवंतले, “पगा येत्वल काम नावा आंद.
ताना बर्पेय किय्वना ननय आंदुन”
इन्जेर वेह्तोर.
अनि उंडे,
“पर्बु तंवा पर्जत पोरो तस्वा कींतोर”+
इन्जेर गिर वेह्तोर इंवल, माकुन टावये.
31 जीवते मंवल बगवंतन पाप्नगा साप्डे माय्वलिरकुन सिक्सा इंवल गोस्टि बेय वेरिनल मंता.
32 मिरट बगवंतना चर्नते वातङ मोदोल दिवोसकुन हेतु कीम्ट.
अव दिवोसकुन रोपो बचोङो तक्लिब्क बोगे मातिट.
तेर बति, मिरट अवेन वोर्च्तिट.
33 कहि जोकङ अप्मांतुन अनि दुस्रुर सिय्वल दुक्सतुन सम्दिर मुने बोगे मातिट.
उंडे कहि जोकङ, अव तक्लिब्क्ने बोगे माय्वलिर करुम मिरट निल्तिट.
34 अचोरे आय्वा, जेल बोगे माय्वलिरकुन मिरट दयते सूड्तिट अनि मीवङ जाय्जतुन लूटि कीतेके, आनंद्ने वोप्तिट.
बारितेके, मिह्गटल लूटि कीता, अदेन तेर, बगवंतल सीतङ अव वेले चोकोट्नङ अनि बस्केट गिर मंवलिक आंदुङ इन्जेर करि कीतिट.
35 अदेन साटि, बतल आतेके गिर बति, मीवा बरोसतुन सुटि किय्मट.
इदेन हिंदल चोकोट्ना पंडि पुटंता.
36 मिरट पट पिय्सि मंदा लागर.
बगवंतना इचा पिय्सि ताका लागर.
अद आता पेजे बगवंतल तना वाग्दन कीसि मत्तोर अदेन, मीकुन सींतोर.
बारितेके दर्मा-ग्रंत्नगा,
37 “जुलुक्ने वाय्ले मंवल,
कोरुम किय्वक्ने वांतोर.
38 बरोसतुन हिंदल नियत्नोर इन्जि,
बगवंतल बोंते वोपंतोरो वोर पिसंतोर.
बति, वूर्गटल बोरे आयि,
पेजे मल्सि ताक्तेके नाकुन आनंद लागो”+
इन्जेर लिहि कीसि मंता.
39 तेर बति मरट बह्के मासि नासेडम आय्वलिर दात्नुर आय्वट.
इदेन बद्लि, बरोसतुन हिंदल बचे माय्वलिर दात्नुर आंदट.