बरोसा
11
1 आसा कीतङ तप्वक पुटंतङ इन्जेर नम्वल अनि मरट सूडा पर्वट अवेन गिर करलेन मंतङ इन्जेर नम्वले बरोसा आंद.
2 मावुर तोत्तुर्गा ईतल बरोसा मत्ता.
अदेन साटिने, बगवंतल वूरकुन मेच्तोर.
कलिता जिव्रस अनि मरा मेटा गडे माय्वल
3 बगवंतल तंवा गोस्टिते इद कलि गडि कीतोर इन्जेर बरोसतुन हिंदल, मरट अर्तम कींतट.
इत्तेके दिसो अदेने दिस्वलिक गडे मातङ.+
4 बरोसतुन हिंदले, हेबेल, कयिंतुन तेर चोकोट्ना अर्पना बगवंतन सीतोर.
कयिन सीता अर्पनतुन तेर, हेबेल सीता अर्पनतुन बगवंतल मेच्चि, वोर हेबेलतुन नियत्नोर इन्जेर वोप्तोर.
मावा बरोसा बहन मंदना इंवल हेबेलु मार्ता पेजे गिर, वोना बरोसा माकुन करुसींता.
5 हानोक्ना बरोसतुन हिंदल, बगवंतल वोन जीवतेन स्वर्ग्नगा वोतोर.
अद कारंतुन हिंदले, वोना कूर बोने पुट्मकि.
+ स्वर्ग्नगा वोयन मुने हानोकु बगवंतन आनंद सीतोर इन्जेर ग्रंत्नगा लिहि कीसि मंता.
6 बरोसा सेल्वा बगवंतन आनंद सिया परुर.
बगवंतना बक्ति कीका इंवल बोरे आयि, बगवंतल मंतोर इन्जेर अनि कोर्तुरकुन पंडि सींतोर इन्जेर बरोसा किया लागर.
7 बरोसतुन हिंदल नोवहु, जल गंडमनल कुटुंबतुन बचि किय्ले, डगुर रूकतुन तयर कीतोर.
नोवहु तंवा कुटुंबतुन बचि किय्ले रूका तयर कीतोर
वोन्गा मंवल बरोसा, दुनियतुर पूरो गल्ति कीतेर इन्जेर निरुपन कीता.
अद बरोसतुन हिंदल, वोर नियत्नोर आतोर.+
8 बरोसतुन हिंदल अब्राहम, बगवंतल सीका इत्ता, अद देसुन ईसत दात येत्ले, बगवंतना गोस्टि पिय्सि, तंवा देसनल पेसिसि, तना बगा दांतोर इंवल टावा सेल्वेके गिर सोत्तोर.+
9 बरोसतुन हिंदल अब्राहम, बगवंतल वाग्दन सीता देस्नगा, ईसदार्क आय्वलिर, इसक अनि याकोब सम्दिर गिर डेरनगा पिस्तेर.
+ अहन डेरतगा पर्देसिन दात अब्राहम पिसेर मत्तोर.
10 बारितेके, बस्केट मंवलिक बुनदिने बगवंतल दोह्ता अद स्वर्ग्ना नगुडुन साटि, वोर बरोसते सूड्सेर मत्तोर.
11 बरोसतुन हिंदल (अब्राहम्ना बाय्को) सारल, मातरि पांदे गोड्डुय मत्ता तेर बति, बगवंतल सीता वाग्दंतुन पोरो बरोसा इर्वल कीनेके, अद अवल आया पर्ता.
12 ते, मरि-मियडुन जल्मा सियपरोर अचोर डुगा डुगा आतोर, वोर अब्राहमुन हाबडगा मंवलिक सुकुकुन दात अनि सम्दुर्ता डर्डितगा मंवल उस्केतङ कडकुन दात, लेका किया परुर अच्विर संतान बगवंतल वाग्दन सीता तीर पय्दोस आतेर.
13 बगवंतल सीता वाग्दंतुन पोरो वूर सम्दिर बरोसा इर्सि, तम्वा पिस्वडुन रोपो पूरे माय्वक्नेन सातेर.
बति वूर अद वाग्दन तमकुन पावे मातप अनुबव कीसि, मानि कीतेर.
इद बोमित पोरो वूर तमा मुसपरिर दात जिन्गनि किय्वलिर इन्जेर वोप्तेर.
14 वूरा वड्क्वडा तरिका सूड्तेके, वूर तम्वा सोंता देसुन साटि, मह्क्सेर मत्तेर इंवल करे मांता.
15 उंदि मोका, वूर तमा सुटि कीसि वाता देसुन बारेते, सोन्च किय्मड इत्तेके, तम्वा देसुन मल्सि सोंवल मोका वूरकुन मत्ता.
16 इदेन बद्लि, वूर उंडे चोकोट्ना देस्नगा इत्तेके, स्वर्ग्नगा सोंदना इन्जेर आसा कीतेर.
अदेन साटि, वूर तम्वोर बगवंतल इन्जेर केय्वल बगवंतन आनंद सीता.
इदे आय्वा, तंवुर साटि उंदि चहर वोर बगवंतल दोह्तोर.
अब्राहम इसकुन बलि सिय्ले तयर आय्वल
17-18 बरोसतुन हिंदल अब्राहम, बगवंतल तनकुन परिक्सा कीनेके, इसकुन बलिदान सिय्ले तयर आतोर.
बति अदेन मोदोले बगवंतल, “इसकुन हिंदल साङ्ता वेलिये, नीवा संतांदा लेकते वांतेर”+ इन्जेर अब्राहमुन वाग्दन सीसि मत्तोर.
तेर बति, तनकुन वोरोरे मंवल मरिन बलिदान सिय्ले गिर तयर मत्तोर.
19 बगवंतल सातुरकुन पिसुसा परंतोर इन्जेर अब्राहमुन टावये.
सातोन नेंडुसीतपिनय, इसकुन बगवंतल, अब्राहमुन मल्सि सीतोर.
20 बरोसतुन हिंदल इसक, याकोबुन अनि येसवुन वूरा बविसतुन बारेते, आसिर्वाद सीतोर.
याकोब योसेप्नुर मरकुन आसिर्वाद सिय्वल
21 बरोसतुन हिंदल याकोबु, तंवा मरंतुन मुने योसेप्नुर इविर मरकुन आसिर्वाद सीनेके, बेड्डेत पोरो तंवा जोक इर्सि* बगवंतन पार्तना-विंति कीतोर.
22 बरोसतुन हिंदल इज्रयेल पर्जा ईजिप्ट देसनल पेसिसि दांतेर इन्जेर योसेप, तंवा मरन आय्वक मुनेने वेहा पर्तोर.
अचोरे आय्वा, तंवङ बोकन बतल कियना इंवल वूरकुन हुकुम सीतोर.
23 बरोसतुन हिंदल, मोसेनुर अवल-बाबो वोर पुट्ता पेजे, मूंद महिनङ वेरि, वोन मकुसि इर्तेर.
मोसे सादरन मोड्डल आयोर इन्जेर वूर करि कीसि, राजल सीता हुकुमुन गिर कात्रि किय्मकि.
24 बरोसतुन हिंदल मोसे, तना बेर्सि डगुर आता पेजे, परो राजना मियडोर मरि इन्जेर केयुस्ले वोप्मकि.
25 बोमित पोरो जरसि कालम वेरि, पाप्कनल पुट्वल आनंदुन बद्लि, बगवंतनुर पर्जतुन बरोबर तक्लिब्क बोगे माय्ले, मुने वातोर.
26 वोर अदेना इनमुन साटि, सूड्सेर मत्ता काड्किने, ईजिप्ट्ना दन-दव्लतुन तेर किरिसतुन साटि, बोगे माय्वले चोकोट इन्जेर सम्जे मातोर.
27 बरोसतुन हिंदल मोसे, राजल सोङुन वातेके गिर वेरिवक्ने, ईजिप्ट देसुन सुटि कीसि, सोत्तोर.
दिस्वक्ने मंवल बगवंतन सूड्तपिनय सम्जे माता काड्कि, वोना बरोसता पट उंडे इचुर बडे मासि, पेजे मल्सि सोन्मकि.
28 बरोसतुन हिंदल मोसे, इज्रयेल पर्जतुर मडनुर मरकुन, मरंतोर दूतल जक्वा इन्जेर नेतुडुन दर्वजन पोरो सोकना इंवल, हुकुम सीसि, पस्का सड्दुन* मोदोल कीतोर.
इज्रयेल पर्जा रगल सम्दुर्ता वत्ता बोमितल ताक्सेर सोंवल
29 बरोसतुन हिंदल इज्रयेल पर्जा, रगल सम्दुर्ता येतुन नड्डुम तयर आता अद वत्ता बोमितल ताक्सेर वीड्तेर.
बति ईजिप्ट्नुर वूर दात ताकना इन्जि, अद सम्दुरतगा मुडुङ्सि सातेर.
30 बरोसतुन हिंदल इज्रयेल पर्जा, येरिको चहरतुन सिर्मुट येडुङ रोज्क तिरितेर.
अस्के, अद चहर्तङ गोडङ अर्तङ.
31 बरोसतुन हिंदल लन्जे आसि गिर राहबु, येहोसुवल सारि कीतोर वूर कब्रियलिरकुन, तंवा रोन केय्सि, मान-मर्यदा कीता.
इद कारंतुन हिंदले, बगवंतन बय्मन आतुर बरोबर ताना मरन आय्मकि.
32 उंडे बोन बारेते वेहना इंतिट?
गिदियोंतुन बारेते, बारकुन, सम्सोंतुन, येप्तन, दाविदुन, समुयेलतुन बारेते अनि पर्वक्तलिर बारेते, वेहन साटि, नाकुन वकत सेले.
33 वीर सम्दिर, बगवंतन पोरो बरोसा इर्वडुन हिंदले, दुस्रोक राजकुन मेया पर्तेर.
नाय्ते राज ताकुस्तेर.
बगवंतल वाग्दन सीततुन येता पर्तेर.
चिहोनङ तोड्डिन मुहा पर्तेर.
34 वेरिनल पोत्वल तड्मितुन पिहा पर्तेर.
तल्वर्क्नङ दन्कनल तम्वा तमा बचि किया पर्तेर.
वूर्गा सक्ति सेल्वेके गिर, सक्ति वालिर दात मारितेर.
वूर लडेय्क्नगा तम्वा वेले सक्ति तोह्चेर, दुस्रोक देस्क्नुर सिपायिरकुन मेय्तेर.
35 बगवंतन पोरो बरोसा इर्ततुन हिंदले, कहि वेय्लोक तम्वुर लाक्तुर सासि, नेंड्ता अद सूडा पर्तङ.
बति, दुस्रुर बगवंतन पोरो बरोसा कीता काड्कि, वेले तक्लिब्क अनि दुक्सङ बोगे मातेर.
वूर तमा सासि-नेंड्ता पेजे, स्वर्ग्नगा चोकोट पिसना इंवल आसतुन पिय्सि, अहन बोगे मासेर मार्तेर.
36 वीर्गटल कहि जनकुन पगा-दार्क चेडि कीसेर, चाटल्क्ने पातेर.
उंडे कहितुरकुन पिय्सि, जेल्क्नगा वाटुसीतेर.
37 कहितुर जनकुन बंडने पासि, रंपेने कोय्सि रंड टुक्डेङ कीतेर.
तल्वर्क्ने पासि जव्क्तेर.
उंडे कहितुर बक्तलिर गरिब मन्जि, हेरेनङ अनि गोरेनङ तोल्क केर्सि तिरितेर.
दुस्रुर वूरकुन बूड दिव्सेर दुक्सा सीतेर.
38 पडिद्क्नगा, गुटनगा, बंडनङ संदिनगा, बुयरिनगा पिस्तेर.
इद परिपन्चम, वूर आतुर लासि चोकोट्ना आयो.