बगवंतल मावोर बाबो आंदुर
12
1 मा सिर्मुट्नुर अचोर वेलेटिर बगवंतनुर बक्तलिर गवा सीसेर मंतेर.
अदेन साटि, मावा सरदुन अड्डम वाय्वलिक तक्लिबकुन मेय्सेर मुने दाकट.
माकुन गट आव्रि कीतङ पापकुन सुटि कीसेर, मरट वित्वल पोटितगा पट पिय्सि, मुने वित्कट.
2 मावा नदुर येसुन पोरो इर्कट.
मा रोपो बरोसतुन पुटुसिय्वल अनि तान पूरि किय्वल वोरे आंदुर.
येसु मोदुन तोच्वल
अस्के, तनकुन वाता अप्मांतुन लेका किय्मकि.
इंके वोर, बगवंतना राजा-गादितुन तिना बग्लता जागतगा उच्चि मंतोर.
3 वोर येसु, पापेस्तलिर तंवा पोरो सोङ पिय्सि, सीता दुक्सतुन बहन वोप्के पिय्सि ताक्तोरो, दिहंते सोन्च कीम्ट.
अस्के, मिरट अविवक्ने अनि बरोसतुन सुटि किय्वक्ने, मंदा परंतिट.
4 मिरट पापुन सङा किय्वल लडेयतगा, इंके वेरि, नेतुर तुह्वडा जुरत अर्मकि.
5 मी सम्दिरकुन तंवुर मर्क इन्जेर सोन्च कीसि, बगवंतल वेह्ता, इद गटि-दीर्या सिय्वल कबुडुन पूरो, मरुङ्तिट कि बतल?
“ना मरिनि पर्बु वेह्तोर,
अद सिक्सांतुन कात्रि किय्वक मन्मा.
नी गल्तितुन पर्बु सुद्रि कीका इत्तेके,
मंदगा दुक्सा लागसिय्मा.
6 बारितेके, बगवंतल बोंते लाड कींतोरो,
वोने सिक्सा सींतोर.
अचोरे आय्वा, बोंते मरि इन्जेर वोपंतोरो,
वोने सिक्सा सींतोर”+
इन्जेर लिहि कीसि मंता.
7 जरब्ने इर्वलिक सिक्सङ आंदुङ इन्जेर तक्लिब्क बोगे मासेर ताकट.
बगवंतल मीकुन तंवुर मरकुन दात सूडंतोर.
हर वोरोर बाबो, तंवोर मरिन जरब्ने इर्ले, सिक्सङ सींतोर.
8 ते, बगवंतल मिह्गटल बोने जरब्ने मंवल करुस्वेके, वोर मीकुन बाबो आयोर अनि मिरट वोनुर करल मर्क आय्विट इन्जेर करि कियना.
9 माकुन जल्मा सीतुर मा बाबुर जरब्ने इर्वल सिक्सन माकुन करुसंतेर.
अदेन हिंदल, मरट वूरकुन वेले मानि कींतट.
ते, बस्केट गिर मरट पिसन साटि, मावङ आत्मन बाबो आय्वल बगवंतन उंडे बचोर मानि कियनयो सोन्च कीम्ट.
10 कहि साल्क वेरि, मा अवल-बाबो तमकुन सम्जे माता तीर, माकुन जरब्ने मंवल करुसींतेर.
बति, माकुन बविसत्ने चोकोट जर्ग्ले, तंवा दात पवित्रा आयन साटि, बगवंतल जरब्ने मंवल करुसंतोर.
11 इव सिक्सङ येत्नेके दुक्सा लागंता.
आनंद मनो.
बति अद आता पेजे, अव सिक्सङ करितुर वूरकुन नियत, सांति इंवलिक पंडिङ पुटंतङ.
12 अदेन साटि, मीवङ जिगि सेलेङ अव केयकुन अनि तरा तरा आय्वलिक टोङ्रन मज्बुत कीम्ट.
13 मिरट ताक्वल बरोसता सरि-मारगुन सड्कल कीम्ट.
अस्के, बरोसा कमि वालिर मीवा बरोसतुन सूड्सि, तम्वा बरोसतगा गट आंतेर.+
बगवंतन बय्मन आसि ताक्वलिरकुन दम्किङ
14 सम्दिर पोरो सांति तोह्चेर, सुदुड-पांदे पिसन साटि, कोसिद कीम्ट.
इद सुदुड-पान सेल्वा सोन्जि, बोरे आयि पर्बुन सूडा परोर.
15 बगवंतना पेर्मता-दयतल वोरोर गिर, बह्के माय्वक्ने सूडट.
उंदि मोका, वोरोर करेबल मिह्गा मत्तेके, वोर सम्दिरकुन बे-सुदुड कीसि वाटंतोर.
इदेन बारेते दिहंते मंट.
16 मिह्गा बोरे पीर किय्वल मंवक्ने सूडट.
बगवंतन कात्रि किय्वक्ने, उंदि पूटता कानेतुन साटि, तमुर याकोबुन तंवा डगुर-पांदुन वोम्तोर वोर येसवुन दात पिस्मट.
17 येसवु अद आता पेजे, आसिर्वाद येत्का इन्जेर सोत्तेके, बाबो वोन वोप्मकि इंवल गोस्टि मीकुन टावये.
वोर अद आसिर्वादुन येतना इन्जेर आड्तोर.
बति चुक चुके मासि आसिर्वाद येत्वल वकत वीड्सि सोडिता.
18 इटा परनल दिसेर मत्ता अद सिनायि गुटतगा, इज्रयेल पर्जा वातेर.
अद गुटा तड्मिते पोच्चेर, बेय पोया पेसिसेर, सिकटिते अनि वडि-दूंदडे निन्चि मत्ता.
बति, मिरट आतल गुटतगा वाय्मकि.
19 अद गुटतल तुरता आवज अनि वड्क्वल बयंकर लेङुन केन्ज्तेर अनि वूर वेरिसि, अद लेङ केन्जा परोम इन्जेर जुल्मा कीतेर.
20 अस्के बगवंतल, इद गुटतुन उंदि जंवर लाग्तेके गिर, अद जंवरतुन बंडने पासि जकना इन्जेर हुकुम सीतोर.
अद हुकुमुन वूर सोसि किया पर्मकि.+
21 अद दिस्ता गट्नतुन बारेते, “नना वेरेते तरा तरा आसेर मंतोन” इन्जेर मोसे इत्तोर.+
22 बति मिरट सियोनु गुटतगा वातिट.
इदे जीवा वाले बगवंतना स्वर्ग्नगा मंवल येरुसलेम नगुर आंद.
आनंद्ने मीरे मासि हजरकुन कोदि मंवलिर बगवंतनुर दूतलिर्गा वातिट.
23 स्वर्ग्नगा पोरोल्क लिहि कीसि मंवलिर मोदोल जल्मा आतुर वूर सम्दिर मंवल चर्चितुरा, लेकतगा मिरट वातिट.
सम्दितुन पोरो तस्वा किय्वल अदिकार वाले बगवंतनगा मिरट वातिट.
स्वर्ग्नगा इंके, सम्दि तीर्क्ने नियत्ने मत्तुर वूरङ आत्मनगा, मिरट वातिट.
24 बगवंतना अनि पर्जतुन नड्डुम मंवल पूना नियमुन वोरोरे सुर्वेर्तल आसि मंवल येसुन करुम मिरट वातिट.
वोना सुदुड-पान किय्वल नेतुर, हेबेल्ता नेतुडुन दात बद्लि येत्वल आयो, बति मापितुन बारेते वेह्वल आंद.*
25 दिहंते मंट!
मी सङा वड्क्वन मिरट केन्ज्वक्ने मन्मट.
इद दुनियतगा, मोसे वेह्तङ गोस्टिङ अद वकत्नुर पटि किय्मकि.
अदेन हिंदल, वूर सिक्सतल तपुसिया पर्मकि.
ते मरट इंके, स्वर्गनल वड्क्वनङ गोस्टिङ पटि किय्वक्ने मत्तेके, सिक्सतल असल तपुसिया पर्वट.
26 अद वकत्ने वोर बगवंतना लेङ बूकंप वायुसीता.
बति इंके वोर, “नना बोमितुने आय्वा, हाबडुन गिर, उंडे उंदि जोका हालि कींतोन”+ इन्जेर वाग्दन सीतोर.
27 “उंडे उंदि जोका” इंवडा अर्तम बतल इत्तेके, कलितगा गडे मातङ सम्दो हाले मासि नासेडम आंतङ.
बति बस्केट गिर मंवलिक, बातङ अह्ने मंदंतङ.